तीन दशकभन्दा बढी समय शिक्षण पेशासँगै साहित्य साधनामा निरन्तर सक्रिय कवि खड्गबहादुर बोहराको नयाँ कवितासङ्ग्रह ‘पहिलो दिनको पहिलो प्रहर’ एक विशेष समारोहका बीच सार्वजनिक गरिएको छ ।
सोमवार कृतिको विमोचन गर्दै मध्यपश्चिम विश्वविद्यालयका पूर्व रजिस्ट्रार तथा समालोचक डा. महेन्द्रकुमार मल्लले बोहराको सिर्जनालाई ‘समय, समाज र चेतनाको ऐना’ को संज्ञा दिएका थिए ।
नेपालगन्जमा भएको कार्यक्रममा साहित्यप्रेमी, शिक्षक, विद्यार्थी तथा स्रष्टाहरूको उल्लेखनीय उपस्थिति रहेको थियो । सर्वदा साहित्य सङ्गमद्वारा प्रकाशित उक्त सङ्ग्रहमा बोहराका ५४ वटा कविताहरू समेटिएका छन्, जसले जीवन, राष्ट्र, अध्यात्म र समकालीन समाजका विविध आयामलाई संवेदनशील ढंगले उजागर गर्छन् ।
कृतिमाथि टिप्पणी गर्दै समालोचक डा. राजकुमार थारु र मेघराज वलीले बोहराका कवितामा राष्ट्रचेत, अध्यात्मचेत र समयचेतको गहिरो उपस्थिति रहेको उल्लेख गरे । उनीहरूले कविताले समसामयिक विकृति–विसङ्गतिप्रति तीखो व्यङ्ग्य र सचेत दृष्टिकोण प्रस्तुत गरेको धारणा व्यक्त गरे ।
कार्यक्रमका क्रममा साहित्यिक माहोलसँगै सम्मानको वातावरण पनि बनेको थियो । सपना राणा, रमेशबहादुर शाह र कृष्णमुरारी भट्टलाई शिक्षा तथा सांस्कृतिक उन्नयनमा पु¥याएको योगदानका लागि सम्मान गरिएको सङ्गमका अध्यक्ष खगेन्द्र गिरि कोपिलाले जानकारी दिए ।
दीर्घ शिक्षण अनुभव र निरन्तर साहित्य साधनाबाट सुसज्जित बोहराको यो कृति पाठकलाई समयसँग संवाद गर्न, भित्री संवेदनालाई छुन र समाजप्रति प्रश्न उठाउन प्रेरित गर्ने विश्वास आयोजकहरूको छ ।
‘पहिलो दिनको पहिलो प्रहर’ले नेपाली काव्यजगतमा बोहराको सृजनात्मक उपस्थितिलाई अझ सशक्त बनाउने अपेक्षा गरिएको छ ।
