बालबालिकाका लागि ‘सिद्धार्थ किड्स रेस’नेपालगन्ज साइक्लिङ क्लब ले २०८२ फाल्गुन ७, ८ र ९ गते आयोजना हुने ‘नेपालगन्ज साइक्लिङ फेस्टिभल २०२६’ अन्तर्गत विभिन्न कार्यक्रम सार्वजनिक गर्दै तयारी पुरा भएको जनाएको छ । तयारीबारे जानकारी दिन मंगलवार गरिएको पत्रकार सम्मेलनमा कार्यक्रम संयोजक प्रदीप सापकोटाले भने, ‘फेष्टिबलको मुख्य आकर्षणका रूपमा ‘टुर डे ठाकुरद्वारा’को आठौँ संस्करण फागुन ८ र ९ गते सञ्चालन हुनेछ ।’त्यसको अघिल्लो दिन, भोलि विहीवार फागुन ७ मा बालबालिकाका लागि साइक्लिङ ‘किड्स रेस’ गरिंदैछ । त्यसका लागि टाइटल स्पोन्सरका रुपमा जोडिएको सिद्धार्थ ग्रुप अफ हस्पिटालिटीसँग सहकार्य गरिएको कार्यक्रम संयोजक सापकोटाले बताए ।फेस्टिभलअन्तर्गत फाल्गुन ७ गते बिहान सुर्खेत रोडस्थित प्रहरी तालिम केन्द्रदेखि भ्यु सिद्धार्थ होटलसम्म १० वर्षमुनिका बालबालिकाका लागि ‘किड्स साइक्लिङ रेस’ आयोजना गरिनेछ । विजेतालाई प्रथम, द्वितीय, तृतीय र सान्त्वना पुरस्कार स्वरूप आकर्षक गिफ्ट ह्याम्पर प्रदान गरिने आयोजकले जनाएको छ ।करिब नौ वर्षअघि स्थापना भई जिल्ला खेलकुद विकास समितिमा आबद्ध क्लबले साइक्लिङमार्फत स्वास्थ्य, खेलकुद, पर्यावरण संरक्षण र पर्यटन प्रवद्र्धनमा योगदान दिँदै आएको जनाएको छ । ओझेलमा परेका पर्यटकीय गन्तव्यको पहिचान र प्रचार–प्रसार गर्दै क्षेत्रीय पर्यटनलाई पुनर्जीवित गर्ने उद्देश्यले कार्यक्रम निरन्तर आयोजना हुँदै आएको क्लबको दाबी छ ।आयोजकका अनुसार, यस वर्षको ‘टुर डे ठाकुरद्वारा’मा स्वदेश तथा विदेशबाट करिब २५५ जना साइक्लिस्ट सहभागी हुनेछन्, जसमा भारतबाट २० जना आउनेछन् । ‘सहभागीमध्ये २० जना महिला र २३५ जना पुरुष रहनेछन् भने अफिसियल, मिडिया र अतिथिसहित कुल करिब ३०० जनाको सहभागिता रहनेछ,’ कार्यक्रम संयोजक सापकाटाले भने ।पत्रकार सम्मेलनमा दिइएको जानकारी अनुसार, यस वर्षको ‘टुर डे ठाकुरद्वारा’ कार्यक्रम फागुन ८ गते बिहान ८ बजे वागेश्वरी मन्दिर परिसरबाट सुरु हुनेछ । पहिलो दिनको यात्रा त्रिभुवन चोक, बीपी चोक, सुर्खेत रोड, कम्दी, कोहलपुर, चप्परगौडी, खड्कवार हात्तीसार, बाँके निकुञ्जको सुत्तैया ताल हुँदै गाभर भ्याली होमस्टेसम्म पुगेर विश्राम हुनेछ । दोस्रो दिन च्यामा चोक, सम्झना चोक, मान खोला, ओम केदारेश्वर धाम, सतखलवा, बबई–भुरिगाउँ हुँदै ठाकुरबाबा मन्दिरसम्म करिब १३० किलोमिटर दूरी तय गरिनेछ । ‘यसवर्षदेखि यस वर्षको ‘टुर डे ठाकुरद्वारा’को रुट परिवर्तन गरिएको छ,’ सापकोटाले भने । क्लबका अनुसार, यस संस्करणको अनुमानित खर्च २३ लाख रुपैयाँ रहनेछ । सातौँ संस्करणमा कुल आम्दानी १९ लाख २५ हजार ५०० रुपैयाँ र खर्च १८ लाख ७८ हजार ६८१ रुपैयाँ भएको विवरण पनि सार्वजनिक गरिएको छ । पर्यटन र स्थानीय अर्थतन्त्रमा टेवा क्लबले साइक्लिङमार्फत बाँके र बर्दियाका धार्मिक, सांस्कृतिक तथा प्राकृतिक गन्तव्य—जस्तै नरैनापुरको बावा बर्फानी, गोर्वद्धन धाम, सन्तानेश्वर मन्दिर, सतखलवा ताल, सुत्तैया ताल र कान्ति ताल—को प्रवद्र्धन गर्दै आएको उल्लेख गरेको छ । कार्यक्रमले लुम्बिनी प्रदेश सरकारले अघि सारेको ‘घुमौँ बर्दिया–ठाकुरद्वारा’ अभियानलाई समेत सघाउने विश्वास आयोजकको छ ।‘साइक्लिङ संस्कृति विस्तारसँगै नेपालगन्जलाई ‘साइक्लिङ सिटी’का रूपमा पहिचान दिलाउने, स्थानीय परिकार र बजार व्यवसाय प्रवद्र्धन गर्ने लक्ष्य पनि राखिएको छ,’ आयोजक क्लब अध्यक्ष कविराम बुढाथोकीले भने । उनले साइक्लिङमार्फत संस्कृति, प्रकृति, स्वास्थ्य, पर्यटन र खेलकुदलाई जोड्दै क्षेत्रीय सामाजिक तथा आर्थिक विकासमा योगदान पु¥याउने प्रतिबद्धता व्यक्त गरे ।
