‘विभागीयसँगै निर्वाचन कसुरमा कारबाही’
प्रतिनिधिसभा सदस्य निर्वाचनका लागि बाँकेमा मतदान अधिकृत र सहायक मतदानअधिकृतका लागि प्रशिक्षण कार्यक्रम नेपालगन्जमा सञ्चालन भएको छ । ‘१४ गतेसम्म निरन्तर प्रशिक्षण दिइँदैछ,’ निर्वाचन कार्यालय, बाँकेका प्रमुख टेकबहादुर शाहीले दैनिक नेपालगन्जसँग भने ।
निर्वाचन कार्यालयका प्रमुख शाहीका अनुसार, तीन निर्वाचन क्षेत्र रहेको बाँकेमा ४०३ मतदान केन्द्र छन् । यी मतदान केन्द्रमा ८०० मतदान अधिकृत तथा सहायक मतदान अधिकृत परिचालन हुने जिल्ला निर्वाचन कार्यालय, बाँकेले जनाएको छ ।
शाहीका अनुसार, आइतवारको प्रशिक्षणमा १६० जना मतदान अधिकृत तथा सहायक मतदान अधिकृत सहभागी छन् । सो प्रशिक्षण चरण चरणमा हुने र नमूना मतदान अभ्याससमेत भइरहेको निर्वाचन कार्यालय, बाँकेका प्रमुख शाहीले जानकारी दिए ।
आइतवार प्रशिक्षण शुभारम्भ गर्दै बाँकेका प्रमुख निर्वाचन अधिकृत दीपककुमार दाहालले अपेक्षा नगरेको समयमा प्रतिनिधिसभा सदस्य निर्वाचनमा होमिनुपरेको बताए । उनले भने, ‘निर्वाचनलाई तनावका रुपमा लिन हुँदैन र त्यसलाई तनावका रुपमा लिँदा कठिनाइ आउन सक्ने भएकाले तनावको व्यवस्थापन गर्न सिक्नुपर्छ, जान्नुपर्छ र गर्नुपर्छ ।’
दाहालले आगोको सानो झिल्कोले वन सखाप पारे जस्तै हाम्रा बोली, बचन र व्यवहारको सानो रुपले ठूलो रुप लिन सक्छ भन्ने कुरामा सचेत हुन जरुरी रहेको उल्लेख गरे । हरेक बोली र आचरणलाई होसियारिपूर्वक लिनुपर्नेमा जोड दिँदै मुख्य निर्वाचन अधिकृत दाहालले मतदान केन्द्रमा आउने अशक्त, धेरैबेर उभिन नसक्ने मतदाताका लागि स्थानीय तहको सहयोगमा टेन्टको व्यवस्थापन गर्न आग्रह गरे ।
‘आचरण र अनुशासनलाई नियन्त्रणमा राख्ने जिम्मा यहाँहरुको हातमा छ’, दाहालले भने । आचरणको विषय निर्वाचन कसुरसँग जोडिएको जानकारी दिदै मुख्य निर्वाचन अधिकृत दाहालले विभागीय कारबाहीसँगै निर्वाचन कसुरमा कारबाही हुने चेतावनी दिए ।
प्रशिक्षणमा बाँकेका प्रमुख जिल्ला अधिकारी दिलकुमार तामाङले मतदान अधिकृत तथा सहायक मतदान अधिकृतले निर्वाचन आचारसंहिता पालना गरेको वा नगरेको भन्ने विषयमा निगरानीमा रहेको बताए ।
प्रजिअ तामाङले मतदातामध्ये अनुपस्थित मतदाताको पनि मतदान गर्ने चेष्टा हुनसक्ने भएकाले त्यसमा सर्तकता अपनाउन आग्रह गर्दै निर्वाचनको कार्यविधि अनुसार कडाइ गर्न निर्देशन दिए । ‘मतदातामध्ये अनुपस्थित मतदाताको मतदान भयो भने भयावह अवस्था हुनसक्छ’ प्रमुख जिल्ला अधिकारी तामाङ्ले भने ।
बाँकेको सुरक्षा संवेदनशीललाई ध्यान दिएर सुरक्षाकर्मी परिचालन गरिएको उल्लेख गर्दै प्रजिअ तामाङले मतदानस्थलमा मतदानको वातावरण निर्माण गर्न स्थानीय तहको वडा कार्यालयबाट प्राप्त हुने स्रोतसाधनको सदुपयोग गर्न आग्रह गरे ।
आइपुग्यो निर्वाचन सामाग्री
बाँकेमा आवश्यक निर्वाचन सामग्री आइपुगेको छ । ‘मतदानमा प्रयोग हुने आवश्यक सबै सामाग्री आइपुगेको छ,’ निर्वाचन कार्यालय, बाँकेका प्रमुख टेकबहादुर शाहीले दैनिक नेपालगन्जसँग भने,’ मतपत्र पनि एकाध दिनमा आइपुग्छ ।’ शाहीका अनुसार, मतदानमा ४९ किसिमका सहायक सामाग्री आवश्यक पर्न भएकाले सबै आइपुगेको हो ।
यसैबीच, देशभरका ४३ जिल्लामा नेपाली सेनाले निर्वाचन सामग्री पु¥याएको छ ।
निर्वाचन पूर्वको काम अन्तर्गत नेपाली सेनाले अहिले निर्वाचन सामग्रीहरूको ढुवानी गरिरहेको छ । नेपाली सेनाका प्रवक्ता तथा सहायक रथी राजाराम बस्नेतले अहिलेसम्म ४३ जिल्लाहरूमा निर्वाचन सामग्री पुगिसेकेको बताए ।
‘४३ जिल्लामा निर्वाचन सामग्रीहरू पुगिसेकका छन् । बाँकी जिल्लाहरूमा पनि जाने क्रममै छन्,’ सहायक रथी बस्नेतले संवाददतातासँग भने । उनका अनुसार, १२ जिल्लाहरुमा अहिले निर्वाचन सामग्रीहरू लाने क्रम भइरहेको छ । त्यसपछि बाँकी रहेका २२ जिल्लाहरूमा निर्वाचन सामग्रीहरू पुग्नेछन् ।
तीन हिमाली जिल्लामा भने सेनाले हवाई साधनमार्फत निर्वाचन सामग्री ढुवानी गरेको छ । जसमा अहिलेसम्म हुम्ला, मुगु र डोल्पामा हवाई साधनमार्फत निर्वाचन सामग्री लगिएको सैनिक प्रवक्ता बस्नेतले बताए ।
डोल्पामा आइतबार मात्रै नेपाली सेनाको स्काई ट्रकमार्फत निर्वाचन सामग्री लगिएको छ ।
नेपाली सेनाको स्काई ट्रकबाट मतपत्र, मतपेटिका, मसीका मार्कर, स्वस्तिक छाप, स्टिकर, रंगिन मतदाता नामावलीजस्ता निर्वाचन सामग्रीहरु डोल्पा पुगेका हुन् ।
अब मनाङ र मुस्ताङमा पनि हवाई साधानमार्फत निर्वाचन सामग्री लैजाने सेनाको तयारी रहेको बताइएको छ ।
