बाँकेमा मतदाता बढेपनि मतदान प्रतिशत घट्दै गएको छ । प्रतिनिधिसभा निर्वाचनमा वि.सं. २०७४ र २०७९ भन्दा वि.सं. २०८२ मा खसेको मत प्रतिशत कम रहेको छ ।
२०७९ को स्थानीय तह निर्वाचनमा बाँकेमा आठ स्थानीय तहमा ७२ देखि ८१ प्रतिशतसम्म मत खसेको थियो । २०७९ को प्रतिनिधिसभा सदस्य निर्वाचनमा बाँकेका तीन वटै निर्वाचन क्षेत्रमा ६५.७३ प्रतिशत मत खसेको थियो । वि.सं. २०७४ सालको प्रतिनिधि सभा निर्वाचनमा बाँक्ेका तीन स्थानीय तहमा ७१ प्रतिशत बढी मतदान भएको थियो ।
वि.सं. २०७९ को प्रतिनिधिसभा निर्वाचनमा बाँकेका तीन वटै निर्वाचन क्षेत्रमा ३ लाख ३२ हजार २ सय ३१ मतदाता रहेकोमा कुल २ लाख १८ हजार ५५ मत खसेको थियो ।
त्यस्तै, वि.सं. २०७४ मा २ लाख ७६ हजार ७ सय १६ मतदाता रहेकोमा १ लाख ९६ हजार ४ सय ८० मत खसेको थियो ।
वि.सं. २०८२ को प्रतिनिधिसभा निर्वाचनका लागि बाँकेमा मतदाता थपिएर बाँकेमा ३ लाख ५० हजार ३ सय ७१ पुगेका थिए । जसमध्ये १ लाख ७२ हजार २ सय २३ महिला, १ लाख ७८ हजार ३ सय ३९ पुरुष र ९ जना अन्य मतदाता रहेका छन् । यसमध्ये १ नं. निर्वाचन क्षेत्रमा एक लाख २४ हजार ७ सय २७, निर्वाचन क्षेत्र नं २ मा एक लाख आठ हजार २ सय ९० र निर्वाचन क्षेत्र नं ३ मा एक लाख १७ हजार ३ सय ५४ मतदाता रहेको निर्वाचन अधिकृतको कार्यालयले जनाएको छ ।
विगतको दुई वटा प्रतिनिधिसभा सदस्य भन्दा यसपटक मतदान प्रतिशत कम रहेको छ । जिल्ला निर्वाचन कार्यालय बाँकेका प्रमुख टेक बहादुर शाहीले बाँकेमा ६३.१६ प्रतिशत मतदान भएको जानकारी दिएका छन् । बाँकेमा २ लाख २१ हजार ३ सय ९ जनाले मतदान गरेका थिए ।
बाँके जिल्लामा मतदाता संख्या बढे पनि मतप्रतिशत घट्नुका विभिन्न कारण हुन सक्ने अनुमान दलका नेताहरु गर्छन् ।
‘नयाँ मतदातामध्ये धेरै युवाहरू रोजगारी, अध्ययन वा वैदेशिक कामका लागि बाहिर बस्ने भएकाले मतदानका दिन उपस्थित हुन नसक्ने सम्भावना हुन्छ’, स्थानीय भन्छन् ।
मतदातामा राजनीतिक निराशा, उम्मेदवारप्रति असन्तुष्टि वा चुनावप्रति कम रुचि हुनु पनि कारण बन्न सक्छ । कतिपय मतदाता मतदान केन्द्र टाढा हुनु, गर्मी वा व्यवस्थापन समस्या जस्ता कारणले पनि मतदानमा सहभागी हुँदैनन् । यसरी मतदाता संख्या बढे पनि वास्तविक रूपमा मतदान गर्नेको संख्या कम हुँदा कुल मतप्रतिशत घट्न सक्छ ।
‘स्थानीय तहमा स्थानीय स्तरका धेरै नेता हुने भएकाले प्रतिनिधिसभा सदस्यमा भन्दा बढी मतदान हुने गर्छ’, स्थानीय भन्छन् ।
