उद्घाटनमा गोर्खा ब्वाइज र संकटाबीच प्रतिस्पर्धा
आज सोमवार देखि बाँकेको खजुरामा प्रथम खजुरा गोल्डकप फुटबल प्रतियोगिता–२०८२’ को आयोजना हुने भएको छ । त्यसको सम्पूर्ण तयारी पूरा भएको आयोजकले जनाएको छ ।
आयोजक न्यू डाँफे स्पोट्र्स क्लबले आइतवार पत्रकर सम्मेलन गर्दै खजुरा गाउँपालिकाको संरक्षकत्वमा आयोजना हुन लागेको प्रतियोगिता तयारी पुरा भएको जनाएको हो ।
प्रतियोगिता संयोजक बालाराम खत्रीका अनुसार, खजुरा गाउँपालिका–४ डिगाउँस्थित मिनी रंगशालामा सञ्चालन हुने प्रतियोगिता नकआउट प्रणालीमा खेलाइनेछ र आगामी २०८३ बैशाख ७ गतेसम्म जारी रहनेछ । प्रतियोगितामा स्वदेश तथा विदेशका गरी कुल ८ टोलीको सहभागिता रहने आयोजकले जनाएको छ ।
प्रतियोगितामा गोर्खा ब्वाइज स्पोट्र्स क्लब (बुटवल), संकटा स्पोट्र्स क्लब (काठमाडौं), काँक्रेबिहार स्पोट्र्स क्लब (सुर्खेत), फोर ब्रदर्स एफसी (नवलपरासी), जेबिएम फुटबल एकेडेमी (लखनउ, भारत), विभागीय टोली एपीएफ क्लब, नाइजेरियन जोन क्लब (नाइजेरिया) र आयोजक न्यू डाँफे स्पोट्र्स क्लब प्रतिस्पर्धामा उत्रिनेछन् । उद्घाटन खेलमा आज सोमवार गोर्खा ब्वाइज स्पोट्र्स क्लब र संकटा स्पोट्र्स क्लबबीच प्रतिस्पर्धा हुनेछ ।
प्रतियोगिताको ‘टाइटल स्पोन्सर’ एमटी एरिना रहेको छ भने विजेतालाई प्रदान गरिने पुरस्कार रकम अमेरिकामा रहेका खजुरावासी समाजसेवी लिलबहादुर थापाले व्यवस्थापन गर्ने भएका छन् । प्रतियोगिताको विजेता टोलीले नगद ७ लाख रुपैयाँसहित ट्रफी, मेडल र प्रमाणपत्र प्राप्त गर्नेछ भने उपविजेताले नगद ४ लाख रुपैयाँसहित ट्रफी, मेडल र प्रमाणपत्र हात पार्नेछ । साथै, विभिन्न विधागत उत्कृष्ट खेलाडीलाई नगदसहित ट्रफी, मेडल र प्रमाणपत्र प्रदान गरिनेछ ।
प्रतियोगिताको उद्घाटन सोमवार दिउँसो ३ बजे हुने औपचारिक समारोहबीच खजुरा गाउँपालिकाका अध्यक्ष डम्बर बहादुर बिक ‘तुफान’ले गर्ने कार्यक्रम रहेको छ । उद्घाटनअघि परम्परागत बाजागाजासहित झाँकी प्रदर्शन गरिने आयोजकले जनाएको छ ।
प्रतियोगिता अवधिभर ५० हजारभन्दा बढी दर्शकले प्रत्यक्ष अवलोकन गर्ने अपेक्षा गरिएको छ । उद्घाटन समारोह तथा उद्घाटन खेल निःशुल्क अवलोकन गर्न पाइनेछ भने अन्य दिनका खेलका लागि प्रतिव्यक्ति ५० रुपैयाँ प्रवेश शुल्क निर्धारण गरिएको छ । साथै, टिकट काटेर प्रवेश गर्ने दर्शकमध्ये दैनिक ७० जनालाई टिसर्ट उपहार प्रदान गरिने व्यवस्था गरिएको छ ।
प्रतियोगितालाई सफल बनाउन स्वदेश तथा विदेशमा रहेका खजुरावासीबाट आर्थिक सहयोग प्राप्त भइरहेको आयोजकले जनाएको छ । प्रतियोगिताले स्थानीय खेलाडीको पहिचान, प्रोत्साहन तथा नयाँ प्रतिभा उत्पादनमा टेवा पुग्ने विश्वास गरिएको छ । साथै, यसले खजुरा क्षेत्रको खेलकुद पर्यटन प्रवद्र्धनमा समेत महत्वपूर्ण योगदान पु¥याउने अपेक्षा गरिएको छ ।
वि.सं. २०३८ सालमा स्थापना भएको न्यू डाँफे स्पोट्र्स क्लबले स्थापना कालदेखि नै विभिन्न खेलकुद प्रतियोगिता, सांस्कृतिक कार्यक्रम तथा सामाजिक गतिविधिहरू सञ्चालन गर्दै आएको छ । यसअघि ‘डाँफे कप फुटबल प्रतियोगिता’को १०औँ संस्करण सफलतापूर्वक सम्पन्न गरिसकेको क्लबले जनाएको छ ।