कर्णाली प्रदेशको काक्रेबिहार स्पोर्ट्स क्लबलाई ४–२ गोलले हराउँदै नवलपरासीको ‘फोर ब्रदर्स एफसी’ एमटी एरिना प्रथम खजुरा गोल्डकप फुटबल प्रतियोगिताको सेमिफाइनलमा प्रवेश गरेको छ ।
बाँकेको खजुरा गाउँपालिका–४ डिगाउँस्थित मिनी रंगशालामा मंगलबार भएको खेलमा फोर ब्रदर्स एफसीका कप्तान नवीन महत्तो एक्लैले ४ गोल गर्दै टिमलाई सेमिफाइनलमा पुर्याएका हुन् । सुर्खेतको काँक्रेविहारका तर्फबाट गणेश पुलामी मगर र सन्दीप देवुवाले १/१ गोल गरेका थिए ।
खेलमा फोर ब्रदर्स एफसीका नवीन महत्तो ‘प्लेयर अफ द म्याच’ घोषित भए । उनले नगद १० हजारसहित ट्रफी, मेडल प्राप्त गरेका गोल्डकपका प्रचार संयोजक खगेन्द्र दाहालले जानकारी दिए । प्रतियोगितामा बुधबार आयोजक टिम न्यू डाँफे स्पोर्ट्स क्लब खजुरा बाँके र भारत लखनउको जेबिएम फुटबल एकेडेमीबीच खेल हुने आयोजकले जनाएको छ ।
न्यू डाँफे स्पोर्ट्स क्लबको आयोजना तथा खजुरा गाउँपालिकाको संरक्षणमा सोमबारदेखि प्रतियोगिता चैत ३० गतेबाट सुरु भएको हो । प्रतियोगितामा कुल ८ वटा टिम सहभागी भएका छन् । नकआउट आधारमा खेलाइने उक्त प्रतियोगिता वैशाख ६ गतेसम्म चल्ने क्लबका उपाध्यक्ष दान बहादुर गुरुङले जानकारी दिए ।
प्रतियोगिताका विजेता टिमले नगद ७ लाखसहित ट्रफी, मेडल र प्रमाणपत्र तथा उपविजेता टिमले नगद ४ लाखसहित ट्रफी, मेडल र प्रमाणपत्र प्राप्त गर्नेछन् । साथै विभिन्न विधागत उत्कृष्ट खेलाडीलाई नगदसहित ट्रफी, मेडल र प्रमाणपत्र प्रदान गरिनेछ । प्रतियोगितामा प्रथम हुने टिमलाई प्रदान गरिने पुरस्कार राशिलाई अमेरिकामा रहेका खजुरावासी लीलबहादुर थापाले सहयोग गरेका छन् ।
प्रतियोगिता हेर्न आउने दर्शकको सङ्ख्यामा पनि उल्लेख्य वृद्धि भइरहेको क्लबका अध्यक्ष बालाराम खत्रीले जानकारी दिए ।
