मंगलवार, नयाँ वर्षको पहिलो बिहानीसँगै नेपालगन्जको वीपी चोकमा फहराएको राष्ट्रिय झण्डाले केवल समयको नयाँ चक्रको सुरुवात मात्र होइन, राष्ट्रिय गौरव र एकताको भावनालाई पनि थप उचाइ दिन खोजेको देखियो । विक्रम संवत २०८३ को पहिलो दिनलाई विशेष बनाउँदै नेपालगन्जमा ११औँ राष्ट्रिय झण्डा दिवस भव्य रूपमा मनाइएको हो ।
बास नेपालको आयोजनामा नेपालगन्जको बीपी चोकमा भेला भएका स्थानीय बासिन्दा, अगुवा तथा देशप्रेमी नागरिकहरू हातमा राष्ट्रिय झण्डा बोकेर उत्सवमा सहभागी भए । झण्डासहितको उपस्थितिले वातावरण नै देशभक्तिमय बनेको थियो—जहाँ नयाँ वर्षको उमङ्गसँगै राष्ट्रिय अस्मिताप्रतिको सम्मान झल्किन्थ्यो ।
कार्यक्रममा सहभागीहरूले वैशाख १ नेपालीहरूका लागि केवल पात्रो फेरिने दिन मात्र नभई सांस्कृतिक पहिचान र राष्ट्रिय एकताको प्रतीक दिन भएको बताएका थिए । ‘राष्ट्रिय झण्डाको दुरुपयोग बन्द गरौं,’ कार्यक्रमका एकजना वक्ता, नेपाल पत्रकार महासंघका पूर्व केन्द्रीय सदस्य झलक गैरेले राजनीतिमा भइरहेको झण्डा दुरुपयोग रोक्न माग गर्दै भने ।
नेपालगन्ज उपमहानगरपालिकाकी पूर्व उपप्रमुख उमा थापा मगरले विक्रम संवतलाई नेपालको मौलिक पहिचानको आधार मान्दै यही दिन राष्ट्रिय झण्डा दिवस मनाउनु गौरवको विषय भएको बताइन् । उनका शब्दमा, ‘नागरिकहरू स्वतःस्फूर्त रूपमा सडकमा उत्रेर राष्ट्रिय झण्डाको सम्मानमा उत्सव मनाउनु आफैँमा गर्वको क्षण हो ।’
बास नेपाल र अन्तरालको संयुक्त आयोजनामा भएको उक्त महोत्सवले स्थानीय स्तरमा राष्ट्रिय चेतना जागृत गराउने महत्वपूर्ण भूमिका खेलेको देखिन्छ । नेपालगन्जमा हरेक वर्ष निरन्तर रूपमा मनाइँदै आएको यो दिवसले बिस्तारै परम्पराको रूप लिँदै गएको छ । व्यवसायिक अगुवा कृष्णप्रसाद श्रेष्ठ, प्याब्सन लिडर हेमन्तराज काफ्ले, पत्रकार महासंघका जिल्ला अध्यक्ष नवीन गिरीलगायतले कार्यक्रममा बोलेका थिए ।
कार्यक्रमका परिकल्पनाकार, अन्तरालका प्रमुख कार्यकारी जय नारायण शाहले राष्ट्रिय झण्डालाई नेपालीहरूको साझा पहिचान र एकताको प्रतीकका रूपमा व्याख्या गर्दै नयाँ वर्षको पहिलो दिन यसप्रति सम्मान प्रकट गर्न महोत्सवको सुरुवात गरिएको बताए ।
नयाँ वर्षको उज्यालोसँगै फहराएको राष्ट्रिय झण्डाले नेपालगन्जमा केवल उत्सव मात्र सिर्जना गरेन, यसले प्रत्येक सहभागीको मनमा देशप्रेमको भावना अझ गहिरो बनायो। यस्तो पहलले राष्ट्रिय पहिचानको संरक्षण र प्रवद्र्धनमा महत्वपूर्ण सन्देश प्रवाह गरेको छ । कार्यक्रमको सहजीकरण बास नेपालका कार्यकारी निर्देशक नमस्कार शाहले गरेका थिए, अध्यक्षता अध्यक्ष शिवकुमार बर्माले गरेका थिए ।