शनिबार साँझ सुर्खेतको वीरेन्द्रनगरमा भएको गोली काण्डले नेपालगन्जको सुरक्षा अवस्थालाई सतहमा ल्याइदिएको छ । उक्त घटनाको ‘मास्टर प्लान’ र गोलीसँगै पेस्तोल लिनेदिने काम नेपालगन्जमै भएको थियो । नेपालगन्जमा यसरी सुटरहरु गोलीसहितको पेस्तोलसँग खुलेआम हिँड्डुल गर्ने र अपराधिक योजना बनाउने गरेको पुष्टि यस घटनाले गरेको छ ।
यदी नेपालगन्जको सुरक्षा व्यवस्था प्रभावकारी हुन्थ्यो भने उनीहरु पेस्तोलसहित यही नै पक्राउ पर्न सक्थ्ये या यो योजना अन्यत्र बन्थ्यो । तर, सुटरका लागि सुरक्षित स्थान नेपालगन्ज बन्यो र यही सुट गर्ने योजना बन्यो । त्यसपश्चात, उनीहरु वीरेन्द्रनगर पुगेर स्थानीय विनोद गिरीलाई एक राउण्ड गोली प्रहार गरे ।
यस्तो छ घटना श्रृंखला, कैलाली गौरीगंगा नगरपालिका वडा नम्बर २ का १८ वर्षीय ईन्द्र बिक (चालक) को शंकित (फरार रहेका परिचय गोप्य राखिएका व्यक्ति) व्यक्तिसँग बिगत डेढ महिनादेखि ह्वाट्सएपमा चिनजान भएर कुराकानी सुरु भएको थियो । यस घट्नाभन्दा करिब २०/२५ दिन अगाडि ईन्द्र र शंकित व्यक्तिको कैलालीको अतरियामा भेटघाट भई सामान्य कुराकानी भएको प्रहरीले जनाएको छ । करिब १०/१२ दिन अगाडि शंकित व्यक्तिले कैलालीको लम्कीस्थित एक होटेलमा ईन्द्र र १८ वर्षीय भरत भुल तथा भारत उत्तर प्रदेश बिजनौर जिल्ला दादानगरगन्ज जोसीपन मोहल्लाका १९ वर्षीय रोहित राजपुत (सुटर) समेतलाई बोलाई घटनाको सम्बन्धमा पूर्व योजना बनाएको जिल्ला प्रहरी कार्यालय सुर्खेतका प्रमुख रुपेश खड्काले जानकारी दिए ।
घटना हुनुभन्दा करिब आठ/नौ दिन अगाडि ईन्द्र र भरतलाई शंकित व्यक्तिले नेपालगन्ज बोलाएका थिए । त्यतिबेला हामीसँग सुटर छ सुर्खेत बस्ने विनोद गिरीलाई मार्नुपर्छ भन्दै एक लाख ५० हजार रुपैयाँ लिनेदिने कुरा भएको थियो । नेपालगन्जमा शंकित व्यक्तिले ईन्द्रलाई एक नाल कटुवा पेस्तोल र दुई राउण्ड गोली उपलब्ध गराएका थिए । त्यसको दुई दिनपछि भारत उत्तर प्रदेश बिजनौर जिल्ला दादानगरगन्ज जोशीपन मोहल्लाका १९ वर्षीय रोहित राजपुत, ईन्द्र, भरत र शंकित व्यक्तिको नेपालगन्जमा भेटघाट भएको जिल्ला प्रहरी कार्यालय सुर्खेतका प्रमुख खड्काले बताए । त्यतिबेला नै थप योजनासहित ईन्द्रले रोहित राजपुतलाई उक्त कटुवा पेस्तोल र गोली दिएका थिए ।
शंकित व्यक्तिले रोहित राजपुतलाई दुई लाख रुपैयाँ दिने सहमति भएको थियो । नेपालगन्जमा ईन्द्रले रोहित राजपुतलाई उक्त कटुवा पेस्तोल र गोली राउण्ड दिएपछि फागुन ७ गते रोहित राजपुत सुर्खेत पुगेका थिए । उनी वीरेन्द्रनगर नगरपालिका वडा नम्बर ४ स्थित गणेश होटेलमा बास बसेका थिए ।
वीरेन्द्रनगर नगरपालिका वडा नम्बर ४ का ३७ वर्षीय राजन गिरीले रोहित राजपुतलाई होटेलमा बस्ने व्यवस्था मिलाएका थिए । ९ गते ईन्द्र र भरतलाई नेपालगन्जमा शंकित व्यक्ति र एकजना अर्को नाम थाहा नभएको व्यक्तिले मोटरसाइकल दिएका थिए । सोहीअनुसार नेपालगन्जदेखि सुर्खेत पुगेका तीनजनासँगै बसेका थिए ।
एकजना शंकित व्यक्तिले प्रतिवादीहरुलाई विनोदको घर ठेगानालगायत जानकारी गराएका थिए । १२ गतेअर्थात शनिबार राति विनोदको गाडीलाई उनीहरुको मोटरसाइकलले पिछा गरेको थियो । वीरेन्द्रनगर-१ स्थित गैरीचोकमा विनोदमाथि एक राउण्ड गोली प्रहार गरेका थिए । त्यतिबेला उक्त गाडी र मोटरसाइकल एकआपसमा ठक्कार खाई दुर्घटनासमेत भएको प्रहरीले जनाएको छ । उनीहरुले चलाएको गोली विनोदलाई नलागी गाडीको सीसामा लागेको प्रहरीले जनाएको छ ।
उक्त घटनामा संलग्न भारतीय नागरिक रोहित राजपुत, मोटरसाइकल चालक ईन्द्र, भरत र उनीहरुलाई होटेलमा बस्ने व्यवस्थापन गर्ने भनिएको राजन गिरीलाई प्रहरीले पक्राउ गरिएको छ । सुटर भनिएका भारतीय नागरिक रोहित राजपुतलाई भौगोलिक अवस्थाका विषयमा जानकारी नहुनु र प्रहरी टोली नजिकै गस्तीमा भएकाले थप ठूलो घटना हुनबाट जोगिएको प्रहरीले जनाएको छ । सुर्खेत प्रहरीले घटनामा संलग्न चारजनालाई २४ घण्टा नबित्दै सुर्खेतबाट नियन्त्रणमा लिएको छ । यस विषयमा थप अनुसन्धान भइरहेको जिल्ला प्रहरी कार्यालय सुर्खेतका एसपी खड्काले जानकारी दिए ।
