सहकारी दिवस मनाइयो । मंगलबार र्र्याली र सभा कार्यक्रम गरी उक्त दिवस मनाइएको हो ।
‘सहकारीमा सुशासन, प्रविधि र एकीकरण’ नाराका साथ यस वर्ष सहकारी दिवस मनाइएको हो ।
ग्रामिण तथा सहरी क्षेत्रका विभिन्न ठाउँबाट आ–आफ्ना सहकारी संस्थाका ब्यानरसहित निस्किएका सहकारीकर्मीहरूले नेपालगन्जमा सहकारीका पक्षमा नारा लगाएर र्याली निकालेका थिए । र्याली पछि ६७ औं सहकारी दिवसको औपचारिक कार्यक्रम आयोजना गरियो ।
कार्यक्रमका प्रमुख अतिथि, नेपालगन्ज नगर प्रमुख प्रशान्त विष्टले अँध्यारोपछि उज्यालो आउने बताउँदै सहकारीकर्मीलाई निराश नहुन आग्रह गरे । ‘सहकारीले ठूलो योगदान रहेको छ, अहिले केही सहकारी समस्यामा र हेपनि फेरि सम्हालिएर अगाडि बढ्न सक्छ’, नगर प्रमुख विष्टले भने ।
नगर प्रमुख विष्टले अहिले सहकारीमा देखिएका समस्या सरकारले समाधान भोलिका दिनमा जटिलता थपिंदै समाधान नै गर्न नसकिने अवस्थामा पुग्न सक्ने औंल्याए । ‘जति समस्या भयो भयो, अब सहकारीलाई सम्हालेर लग्न आवश्यक छ’, नगर प्रमुख विष्टले भने ।
नगर प्रमुख विष्टले सहकारीमा मनोमानी गर्ने र ऋण नतिर्ने दुवैलाई कानुन बमोजिम कारवाही आवश्यक रहेको बताए ।
‘नागरिकले नै बचत गर्ने हो, ऋण पनि नागरिकले नै लिने हो’, नगर प्रमुख विष्टले भने, ‘ऋण लिनेले नतिर्दा अहिले बचत फिर्ता गर्न सहकारीले सकिरहेको छैन ।’
राज्यले सहकारीको समयमै नियमन नगर्दा समस्या देखिएको भन्दै नगर प्रमुख विष्टले सहकारीबाट लिएको ऋण तिर्नुपर्छ, नतिरे प्रशासनसँग समन्वय गरेर कानुन बमोजिम अगाडि बढ्छौं ।
‘उद्देश्यविहीन काम गरेका सहकारीलाई ट्रयाकमा ल्याउने प्रयास गरौं, नमाने नियमन बमोजिम कारवाही अगाडि बढाऔं’, नगर प्रमुख विष्टले भने ।
नगर प्रमुख विष्टले सहकारीले समाजमा पुर्याएको योगदानको प्रशंसा समेत गरे । ‘स–सानो लगानी गरेर व्यवसायी बनाउन तथा व्यवसाय फष्टाउन सहकारीले सहयोग गरेको छ’, नगर प्रमुख विष्टले भने, ‘लगानी नभएकालाई लगानी गरेर
व्यवसायी बन्ने उत्प्रेरणा सहकारी गरेको छ ।’
सहकारीले गरेको लगानीकै कारण, सेवा दिएकै कारण सहकारीकर्मी अहिले अपराधी जस्तो देखिएको बताए । ‘तर, अहिले पनि धेरै सहकारी स्थापित छन्, राम्रोसँग काम गरिरहेका छन्, जीवनस्तर उकास्न सहयोग गरिरहेका छन्’, उनले भने ।
नगर प्रमुख विष्टले सहकारी एकीकरण गर्न सुझाव दिंदै त्यसका लागि आवश्यक प्राविधिक सहयोगका लागि सरोकारवालासँग छलफल गर्न सकिने बताए । ज्ञान, सीप, तालिमका लागि उपमहानगरपालिकाको तर्फबाट प्रतिबद्धता जनाएका नगर प्रमुख विष्टले कसैले गरेको आन्दोलकै कारण सहकारीको ऋण माफ गर्न नसकिने र गर्न नहुने बताए ।
एकता शाह, जिल्ला सहकारी संघका अध्यक्ष प्रेम सुवेदी, नेफ्स्कुनका छत्र धमला लगायतले बोलेको कार्यक्रममा सांगीतिक प्रस्तुति पनि गरिएको थियो ।
कार्यक्रमका सहभागी तथा वक्ताहरूले सहकारीमा देखिएको समस्या प्रति चिन्ता व्यक्त गरेका थिए । उनीहरूले सीमित सहकारीका कारण सहकारी क्षेत्र बदनाम भएको भन्दै नियमन र बदमासी गर्नेलाई कारवाहीको दायरामा ल्याउनु पर्ने बताएका थिए ।
सहकारीकर्मीहरूले तरलता अभावले देखिएका समस्यामा ऋण असुलीमा अन्य निकायहरूले सघाउनु पर्ने बताएका थिए ।
कार्यक्रममा सहकारी सम्बद्धका उत्पादन समेत बिक्री तथा प्रदर्शनी गरिएको थियो ।
बाँकेमा ४ सय बढी सहकारीहरू रहेकोमा २ सय ६ वटा मात्रै अद्यावधिक छन् । संख्यामा ५÷६ वटा सहकारी समस्यामा रहेको भनिएपछि त्यसबाट बचत फिर्ता नपाउने बचतकर्ताको संख्या भने हजारौं रहेको छ ।
