सुनाखरी रेष्टुरेन्ट प्रा.लि.ले आफ्नो सातौं बार्षिक साधारणसभा गर्दै सामाजिक उत्तरदायित्वका लागि आफ्नो लगानी बढाएको जनाएको छ ।
शनिबार गरिएको बार्षिक साधारणसभामा सुनाखरीका प्रबन्ध निर्देशक घनश्याम शर्माले आर्थिक मन्दी बीच पनि कम्पनी आफ्नो गतिमा सफलिभूत ढंगले अगाडि बढिरहेको जानकारी दिंदै भने, ‘त्यसको अनुपातमा सामाजिक उत्तरदायित्वका क्षेत्रमा लगानी बढाइरहेका छौं ।’
कम्पनीका अध्यक्ष पवित्र प्रकाश चन्दको अध्यक्षतामा भएको साधारणसभामा प्रबन्ध निर्देशक शर्माले शिक्षा र खेलकुद लगायतका सामाजिक क्षेत्रमा आफुले लगानी गरिरहेको जानकारी दिए । ‘अघिल्लो बर्षदेखि आर्थिक अवस्था कमजोर भएका जेहेन्दार विद्यार्थीलाई बर्षेनी १२ हजारका दरले छात्रवृत्ति प्रदान गरिएको छ’, असहाय आश्रित आश्रमहरूमा खाना खुवाउने, स्थानीयबासीहरूको सहकार्यमा सरसफाई अभियान चलाउने, सामाजिक अभियानमा आर्थिक साझेदारी गर्ने लगायतका सामाजिक उत्तरदायित्वका कामहरूको फेहरिस्त सार्वजनिक गर्दै प्रबन्ध निर्देशक शर्माले भने, ‘आर्थिक मन्दीले व्यवसाय चलाउन अप्ठयारो भैरहँदा पनि ५० बढीलाई प्रत्यक्ष रोजगारी दिंदै सुनाखरी अगाडि बढिरहेको छ ।’
सात बर्ष अघि सवा एक करोड लगानीमा १४ जना लगानीकर्ताबाट सञ्चालनमा ल्याइएको सुनाखरीका सञ्चालकहरूले शाखा सञ्चालनमा जोड दिए । ‘दाङ्गदेखि धनगढीसम्म शाखा सञ्चालनको सम्भाव्यतामा सकारात्मक अवस्था देखिएको छ’, सञ्चालकहरूका तर्फबाट शेयर सदस्य हर्क बोहराले भने ।
अर्का सञ्चालक प्रदिप ज्ञवालीले पर्याप्त आर्थिक गतिविधि नभईरहँदा पनि सुनाखरीले सन्तोषजनक कारोबार गर्न सफल भएको बताए ।
कार्यक्रमका प्रमुख अतिथि, होटल व्यवसायी संघ बाँके नेपालगन्जका अध्यक्ष रंग बहादुर खड्काले अर्थतन्त्र धराशयी हुँदा त्यसको प्रत्यक्ष प्रभाव होटल, रेष्टुरेन्ट तथा पर्यटन व्यवसायमा परिरहेको बताए ।
‘त्यस प्रभावबाट उद्दार गर्ने सरकारी नीति नहुँदा व्यवसायीहरूलाई निकै मर्का परिरहेको छ’, अध्यक्ष खड्काले भने, ‘तीन तहकै सरकारले व्यवसायीहरूलाई पलायन हुनबाट रोक्न आर्थिक आवश्यक छ ।’
उपभोक्ता हित संरक्षण मञ्च बाँकेका अध्यक्ष, अधिवक्ता बसन्त गौतम, पत्रकार तुला अधिकारी, झलक गैरे लगायतले कार्यक्रममा शुभकामना मन्तव्य व्यक्त गरेका थिए । साधारणसभाको उद्घाटन सत्रमा रमेश बस्नेत, राजन शाही, कल्याण यादव र चन्द्र बहादुर खत्रीलाई उत्कृष्ट कर्मचारी सम्मान प्रदान गरिएको प्रबन्ध निर्देशक घनश्याम शर्माले जानकारी दिए ।
पत्रकारिता क्षेत्रको माध्यमबाट सामाजिक सरोकारका मुद्दाहरूमा निरन्तर कलम चलाएको भन्दै रेडियो कृष्णसारका प्रमुख तुला अधिकारी, दैनिक नेपालगन्जका प्रधानसम्पादकका झलक गैरे र वरिष्ठ रामप्रसाद आचार्यलाई सम्मान पनि गरिएको थियो । सुनाखरीका कानुनी सल्लाहकार समेत रहेका अधिवक्ता गौतमलाई पनि अध्यक्ष पवित्र प्रकाश चन्द र प्रबन्ध निर्देशक शर्माले सम्मान गरे ।
