गाजा पट्टीमा इजरायलले शनिबार रातभर गरेको हवाइ हमलामा कम्तीमा ३० जना प्यालेस्टाइनीको मृत्यु भएको छ । हमलामा थुप्रै घाइते भएको प्यालेस्टाइनी सुरक्षा र चिकित्सा स्रोतहरूले आइतबार बताएका छन्।
स्रोतले सिन्ह्वालाई बताए अनुसार इजरायली लडाकु विमानहरूले गाजामा हिजो राति ५० पटकभन्दा बढी आक्रमण गरेका थिए । गाजाका रफाह, खान युनिस, देर अल–बालाह र जबलिया शहरका घर र अन्य मानवीय संरचनाहरूलाई आक्रमणको निशाना बनाइएको थियो ।
दक्षिणी गाजाको रफाहको अल–सलामस्थित घरमा गरिएको आक्रमणमा बालबालिका र महिलासहित १६ जना प्यालेस्टाइनीको मृत्यु भएको स्थानीय चिकित्सा स्रोतहरूले बताएका छन्। यसैगरी इजरायली विमानले गाजा शहरको उत्तरमा रहेको अल–सफ्तावी नजिकैको घरमा बम आक्रमण गरेको थियो जसमा ४ जना प्यालेस्टाइनीको मृत्यु भएको छ भने अन्य थुप्रै घाइते भएका छन् ।
यसैगरी उत्तरी गाजा पट्टीको जबलिया शरणार्थी शिविरमा इजरायली सेनाले गरेको आक्रमणबाट १० जना प्यालेस्टाइनीहरू मारिएका छन् । द्वन्द्वले विस्थापित व्यक्तिहरूको आवास नजिक आक्रमणको निशाना बनाइएको स्रोतले दाबी गरेको छ ।
उता इजरायली सेनाले गाजा पट्टीको दक्षिणमा रहेको खान युनिस शहरमा शनिबार आफ्ना ३ जना सैनिक मारिएको बताएको छ । इस्लामिक प्रतिरोध आन्दोलन (हमास) को सशस्त्र शाखा, अल–कसाम ब्रिगेड्सले पनि शनिबार खान युनिस शहरको उत्तरमा रहेको अल–सतार क्षेत्रमा इजरायली सैनिकहरू मारिएको र घाइते भएको बताएका छन् ।
यसैबीच इजिप्टका अधिकारीहरूसँग युद्धविराम सम्झौतामा वार्ता गर्न हमासको उच्चस्तरीय प्रतिनिधिमण्डल कायरो पुगेको छ । प्राप्त विवरण अनुसार गत २४ घण्टामा गाजामा इजरायली हमलाबाट ९० जना प्यालेस्टाइनीको मृत्यु भएको छ भने १७७ जना घाइते भएका छन् ।
योसँगै इजरायल–हमास संघर्ष शुरु भएदेखि मृत्यु हुनेको सङ्ख्या ३० हजार ४१० पुगेको र ७१ हजार ७०० घाइते भएको हमासद्वारा सञ्चालित स्वास्थ्य मन्त्रालयले उल्लेख गरेको छ ।
इजिप्टले कतार र संयुक्त राज्य अमेरिकासँग मिलेर मुस्लिमहरूको पवित्र महिना रमजान अघि युद्धविराम सम्झौता गर्ने प्रयास गरेको छ । 
