‘लाइभ कन्सर्ट’मा मेनुकाले दिएको उत्साह
दैनिक नेपालगन्ज
दक्षिण एसियामै लोकप्रीय गायन रियालिटी शो इन्डियन आइडल सिजन १४ बाट बाहिरिएकी गायिका मेनुका पौडेल एक महिना अघि गृह जिल्ला पुगिन् । यसबीचमा उनले केही नेपाल गीत बजारमा ल्याइन् । तर, उनी स्टेज कार्यक्रममा जान भने भ्याएकी थिइनन् । उनै मेनुकाले आइतबार पहिलोपटक नेपालगन्जमा स्टेज सेयरिङ गरेकी छिन् । त्यो पनि नेपालगन्जमा अन्तरालले आयोजना गरेको कल्चर फेस्टिबलमार्फत ‘लाइभ कन्सर्ट’ ।
गृह जिल्ला प्रवेश गर्दा नै मेनकाले नेपालको सांगीतिक क्षेत्रमा आफूले अझ बढी मिहिनेत गर्ने प्रतिक्रिया दिएकी मेनुकाले स्टेजमा सिमसिमे पानीमा ज्यानले बेइमान गर्छकी जिन्दगानीमा गीत गाइन् । पुराना हिन्दी हुन वा नेपाली जुनसुकै गीत गाउँदा दर्शकको भरपुर साथ पाइन् ।
दर्शकबाट नेपाली र हिन्दी दुवैको लागि हुटिङ आएपछि मेनुकाले एउटा हिन्दी र नेपाली पालैपालो गरी गाउने निधो दर्शकलाई सुनाइन् । ‘जहाँ छन् बुद्धका आँखा’ भन्ने गीतलाई मेनुकाले न्याय गरेरै प्रस्तुत गरिन् । हिन्दीमा लता मंगेशकरका गीतमा खुलेर रमाएकी गायिका मेनुका नेपालीमा पनि उत्तिकै पोख्त प्रस्तुतिमा दर्शकलाई भरपुर मनोरञ्जन दिएर उत्साहप्रद बनाइन् ।
विहीवारदेखि आयोजित नेपाल कल्चर फेष्टिबल त्यही मञ्चबाट समापन गर्दै आयोजक अन्तरालका प्रमुख कार्यकारी जयनारायण शाहले नेपाली कला संस्कृतिलाई युवामार्फत् पुस्तान्तरण गर्न यसखालको आयोजना गरिएको बताए ।
यसअघि आइतवारनै पत्रकार सम्मेलनमा मेनुका पौडेल नेपालगन्जका पत्रकारका प्रश्नमा खुलेर प्रस्तुत भइन् । नेपालगन्जमा भएको यस फेस्टिबल आफ्नो पहिलो स्टेज कार्यक्रम भएको मेनुकाले बताइन् । ‘मेरा गीतहरु त्यतिधेरै हुटिङ गर्नेखालका हुँदैनन्,’ उनले भनिन्, ’मेरो आफ्नै विधा छ । तर, दर्शकलाई अन्याय चाहिँ गर्दिन् । उहाँहरुलाई भरपूर मनोरञ्ज गराउँछु ।’ इन्डियन आइडलमा पाएको आर्टिफिसियल इन्टिलिजेन्स (एआई) जडित स्मार्ट भिजन चस्मा अहिले प्रयोगमा नआएको उनले बताइन् । उक्त चस्मा लगाएर एक घण्टा किताब पढ्ने इच्छा रहेको मेनुकाको भनाइ थियो ।