मध्यपश्चिम विश्वविद्यालयसँग सम्बन्धनपछि आफ्ना मागलाई बेवास्ता गरिएको भन्दै बागेश्वरी बहुमुखी क्याम्पसका प्राध्यापकहरुले आन्दोलनको चेतावनी दिएका छन् ।
मध्यपश्चिम विश्वविद्यालय सभा (सिनेट) मा आफ्ना मागहरु पुरा गर्न ध्यानाकर्षण गर्दै सुनुवाई नभए कडा आन्दोलन गर्ने चेतावनी दिएका प्राध्यापकहरुले ६ वर्षसम्म गरिएको बेवास्ताप्रति आक्रोशित भएका हुन् ।
‘क्याम्पस समायोजन हुने समयमा विश्वविद्यालयको आठौं विश्वविद्यालय सभाले निर्णय गरेको नियमावलीमा उल्लेखित अस्थायी, करार, घटुवा र आशिंक प्राध्यापकहरुलाई हालसम्म पनि सम्बोधन नगरेकाले आन्दोलनमा जानुको विकल्प देखिएन,’ बागेश्वरी बहुमुखी क्याम्पसका प्राध्यापक संघका सभापति राज कुमार चन्दले दैनिक नेपालगन्जसँग भने ।
प्राध्यापक संघले प्रेस विज्ञप्ति जारी गर्दै मध्यपश्चिम विश्वविद्यालयको आयोजनामा हुन लागेको विश्वविद्यालय सभा (सिनेट) बाट आफ्ना मागहरु पुरा नभए कडा आन्दोलन गर्ने चेतावनी दिएका छन् । विज्ञप्तिमा भनिएको छ, ‘प्राध्यापकहरुले क्याम्पस समायोजन भएको झण्डै ६ वर्ष पुग्दा पनि प्राध्यापकहरुका मागहरु पुरा भएनन्, आगामी हुने सिनेटबाट समेत मागहरु पुरा नभएपछि कडा आन्दोलन गर्नेछौं ।’
‘विश्वविद्यालयले प्राध्यापकहरुलाई अन्याय गरिरहने तर प्राध्यापक संघ टुलुटुलु हेरेर बस्दैन,’ चन्दले भने, प्राध्यापकहरुका मागहरु पुरा नभए अब आन्दोलनका कार्यक्रम घोषणा गर्ने योजना बनाएका छौं ।’
आगामी बस्ने विश्वविद्यालयको सिनेटले लोड पुगेका आंशिक प्राध्यापकहरूलाई करार, समायोजनका समयमा अस्थायीमा रहेका प्राध्यापकहरू र अन्य करार प्राध्यापकहरूलाई विशेष आन्तरिकबाट स्थायी र घटुवामा परेका प्राध्यापकहरूलाई सोही पदमा पुनर्वहाली र समय पुगेकालाई बढुवा प्रक्रियामा लैजाने गरी सम्वोधन गनुपर्ने सभापति चन्दको भनाइ छ ।
