नेपालगन्जस्थित आदर्श माध्यमिक विद्यालयमा कक्षा ११ अध्ययन गर्न चाहने विद्यार्थीको संख्या उल्लेख्य रूपमा बढेको तथ्यांकले दखाएको छ । विद्यालयले बिहीबार प्लस टु अन्तर्गत नयाँ शैक्षिक सत्रका लागि लिएको प्रवेश परीक्षामा १ हजारभन्दा बढी विद्यार्थी सहभागी भएपछि विद्यालयप्रतिको आकर्षण थप स्पष्ट भएको हो ।
विद्यालयका अनुसार, विज्ञान र व्यवस्थापन संकायमा भर्नाका लागि सञ्चालन गरिएको प्रवेश परीक्षामा लुम्बिनी, कर्णाली र सुदूरपश्चिमका विभिन्न जिल्लाबाट विद्यार्थी सहभागी भएका थिए । यस वर्ष करिब ६ सय ३० जनालाई मात्रै अध्ययन गराउने क्षमता रहे पनि त्यसको झण्डै दोब्बर संख्यामा विद्यार्थी प्रवेश परीक्षामा सहभागी भएका हुन् । परीक्षा सञ्चालन भएको दिन विहीवारनै नतिजा सार्वजनिक गरिएको विद्यालयले जनाएको छ ।
विद्यालयका प्राचार्य महेश्वर जोशीले पछिल्लो समय नेपालगन्जमै गुणस्तरीय शिक्षा लिन चाहने विद्यार्थीको संख्या बढ्दै गएको बताए । उनले उच्च जिपिए ल्याएका विद्यार्थीसमेत काठमाडौं नगई आफ्नो विद्यालय रोज्न थालेको उल्लेख गरे ।
प्राचार्य जोशीले दैनिक नेपालगन्जसँग भने, ‘आदर्श माध्यमिक विद्यालय यो क्षेत्रमै धेरै विद्यार्थीको पहिलो रोजाइ बनेको छ । करिब ९ जना ४ जिपिए ल्याएका विद्यार्थीले पनि यही विद्यालय रोजेका छन् । काठमाडौं जानुभन्दा नेपालगन्जमै राम्रो शिक्षा लिन सकिन्छ भन्ने विश्वास विद्यार्थी र अभिभावकमा बढेको छ ।’
प्राचार्य जोशीका अनुसार, अहिलेको प्रतिस्पर्धात्मक शैक्षिक वातावरणलाई ध्यानमा राखेर विद्यालयले प्रवेश परीक्षा सञ्चालन गरेको हो । उनका अनुसार, गुणस्तरीय शिक्षा, अनुशासन, सीप र संस्कारलाई सँगसँगै अघि बढाउने उद्देश्य विद्यालयको छ ।
विद्यालयले विज्ञान र व्यवस्थापन संकायअन्तर्गत विभिन्न विषयमा अध्यापन गर्दै आएको छ । तीमध्ये आइटीतर्फ विद्यार्थीको आकर्षण सबैभन्दा बढी देखिएको विद्यालयले जनाएको छ । फाइनान्स र होटल म्यानेजमेन्टतर्फ पनि विद्यार्थीको रुचि उल्लेख्य रहेको विद्यालय प्रशासनको भनाइ छ ।
विद्यालयका चिफ डाइरेक्टर ईश्वर पोखरेलले प्रवेश परीक्षा विद्यार्थी र विद्यालय दुवैका लागि मूल्यांकनको माध्यम भएको बताए । उनका अनुसार, यसले विद्यार्थीको तयारीको स्तर देखाउने मात्रै होइन, विद्यालयले पनि कुन स्तरका विद्यार्थी भर्ना गरिरहेको छ भन्ने स्पष्ट पार्छ ।
पोखरेलले भने, ‘प्रवेश परीक्षाले विद्यार्थीलाई म कुन लेभलमा छु भन्ने कुरा बुझाउँछ । विद्यालय र अभिभावकलाई पनि हाम्रो शैक्षिक स्तर कस्तो रहेछ भन्ने जानकारी दिन्छ ।’
प्रवेश परीक्षा उत्तीर्ण गरेका विद्यार्थीको भर्ना प्रक्रिया बिहीबारदेखि सुरु भएको विद्यालयले जनाएको छ । भर्ना जेठ २० गतेसम्म चल्नेछ । नयाँ शैक्षिक सत्रको नियमित पठनपाठन भने असार १ गतेदेखि सुरु गरिने तयारी गरिएको छ ।
विद्यालय व्यवस्थापन समितिका अध्यक्ष सञ्जय थापाले विद्यालयले लामो समयदेखि शैक्षिक गुणस्तरमा सम्झौता नगरेकाले विद्यार्थीको विश्वास बढेको बताए । उनले विद्यालयमा राम्रो शैक्षिक वातावरण निर्माण गरिएको दाबी गरे ।
अध्यक्ष थापाले दैनिक नेपालगन्जसंगको कुराकानीमा भने, ‘यो शिक्षाविद्हरूले सञ्चालन गरेको विद्यालय हो । यहाँ शिक्षकको वर्गीकरण गरिएको छ । शैक्षिक वातावरण राम्रो भएकैले विद्यार्थीको आकर्षण निरन्तर बढिरहेको छ ।’
आदर्श माध्यमिक विद्यालयले नेपालगन्जमा विगत २६ वर्षदेखि निरन्तर पठनपाठन सञ्चालन गर्दै आएको छ । विद्यालयमा हाल नर्सरीदेखि कक्षा १० सम्म ९ सय ९७ जना विद्यार्थी अध्ययनरत छन् । कक्षा ११ र १२ मा यसअघि १ हजार २ सय ४४ जना विद्यार्थी भर्ना रहेका थिए ।