नेपालगन्जमा २० करोड लागतको नयाँ अस्पताल सञ्चालनमा आएको छ । १५ शैय्याको केयर सिटी अस्पताल औपचारिक रूपमा शुक्रबारदेखि सञ्चालनमा आएको हो ।
नेपालगन्ज उपमहानगर–पालिकाका नगर प्रमुख प्रशान्त विष्टले अत्याधुनिक सेवा सहितको इमरजेन्सी वार्ड शुभारम्भ गरे । उनले नेपालगन्जलाई स्वास्थ्य हबका रूपमा विकास गर्न उपमहानगरपालिकाले आवश्यक नीतिगत सहजीकरण गर्ने प्रतिबद्धता जनाए ।
डा। विष्णु कुमार थापाको नेतृत्वमा रहेको केयर सिटी अस्पतालले तीन बर्षदेखि प्रवाह गरेको सेवा सुविधालाई आधुनिक र विशेषज्ञ सेवा बिस्तार गरी औपचारिक रूपमा सञ्चालनमा ल्याइएको हो । ‘एक बर्षभित्र ५० शैय्याको सुपरस्पेशियालिष्ट अस्पताल सञ्चालनका लागि आवश्यक प्रक्रिया अगाडि बढाइ सकिएको छ’, बालरोग विशेषज्ञ समेत रहेका केयर सिटीका अध्यक्ष डा। थापाले भने, ‘त्यसका लागि आवश्यक २५ कठ्ठा जग्गा र आवश्यक पूर्वाधार हामीसँग छ ।’
अस्पतालका प्रबन्ध निर्देशक सन्तोष शाहले १७ जना विशेषज्ञ चिकित्सक, दुई जना मेडिकल अफिसर २१ जना नर्सिङ्ग स्टाफ सहित ७२ जनाको जनशक्तिले अस्पतालमा बालरोग, जनरल फिजिसियन, स्त्री तथा प्रसुति रोग, निसन्तान तथा बाँझोपन, हाडजोर्नी, न्यूरो सर्जरी, नाक, कान, घाँटी, जनरल सर्जरी र रेडियोलोजी विभागमा सेवा प्रवाह गरिरहेको बताए । ‘एउटा स्तरीय अस्पतालका लागि आवश्यक सबै सेवा, सुविधा प्रवाह गर्नेगरी केयर सिटीलाई अपरेशनमा ल्याएका हौं’, प्रबन्ध निर्देशक शाहले भने । उनका अनुसार, २४सै घण्टा चिकित्सक सहितको इमरजेन्सी, फार्मेशी, अत्याधुनिक प्रयोगशाला, भिडियो एक्सरे लगायतका सेवा सञ्चालन गरिरहेको हो ।
‘पछिल्ला बर्षहरूमा जिल्ला–जिल्लामा अस्पताल निर्माण भएपछि विशेषज्ञ सेवाका लागि मात्रै नेपालगन्ज आउनेहरूको संख्या बढेको छ’, नेपालगन्जमा स्वास्थ्य उपचारको सम्भावना र चुनौतिबारे पत्रकारले सोधेको प्रश्नमा केयर सिटीका अध्यक्ष डा। थापाले भने, ‘अब रेफरल केसहरू हेर्नका लागि आफुलाई सुपर स्पेशियालिष्ट हस्पिटलका रूपमा डेभलप नगरी सुखै छैन ।’ डा। थापाले नेपालगन्ज स्वास्थ्य उपचारका क्षेत्रमा स्तरीय रहेपनि पछिल्ला दिनमा अपेक्षित गतिमा सुधार हुन नसकेकाले नै पछि पर्ने सम्भावनालाई मध्यनजर चुनौति उठाउन तयार भएको बताए ।
‘पछिल्लो अपडेट अवस्थालाई लिड गर्नेको अभाव खट्कियो’, डा। थापाले केयर सिटीले आफुलाई स्तरीय प्रतिस्पर्धीका रूपमा नेपालगन्जमा खडा गर्न लागेको सन्देश प्रवाह गर्दै भने, ‘बिरामीलाई गुणस्तरीय र सुलभ उपचार सेवाका लागि सम्झौता नहुने गरी हामी अगाडि बढ्दैछौं ।’ उनले केयर सिटीमा आइसियु, एनआइसियु, भेन्टिलेटर, अपरेशन कक्ष र अत्याधुनिक प्रयोगशाला सञ्चालनमा आइसकेको जानकारी दिंदै पत्रकारसँग भने, ‘स्तरीय अस्पतालका लागि आवश्यक पूर्वाधार र जनशक्ति सहितको साधनस्रोत व्यवस्थापन गरेरै हामी आएका हौं ।’ त्यसका लागि डा। थापाले समयसापेक्ष नीति, नियमको आवश्यकता औंल्याउँदै सरकारले सहजीकरण गर्नुपर्ने बताए ।
शुभारम्भ कार्यक्रममा नगर प्रमुख विष्टले सरकारले तोकेको मापदण्डभित्र रहेर सेवा प्रवाह गर्न अस्पताललाई सुझाव दिएका थिए । कार्यक्रममा भेरी अस्पतालका पूर्व मेसु डा। विनोद थापा, डा। उर्मिला पराजुली, केयर सिटीका संरक्षक रमेश थापा लगायत सहभागी थिए ।
