नेपालगन्जस्थित आदर्श माध्यमिक विद्यालयले आज बुधवार शैक्षिक सत्र २०८२÷८३ का लागि प्लस टु (कक्षा ११) को भर्ना प्रवेश परीक्षा सञ्चालन गर्दैछ ।
विज्ञान र व्यवस्थापन दुवै संकायमा अध्ययनका लागि विद्यार्थीको उल्लेखनीय सहभागिता देखिँदा विद्यालय परिसरमा केही दिनदेखिनै चहलपहल बढेको छ ।
विद्यालयका प्रधानाध्यापक महेश्वर जोशीका अनुसार, पछिल्ला वर्षहरूमा विद्यालयप्रति विद्यार्थी तथा अभिभावकको आकर्षण झनै बढिरहेको छ । ‘यो वर्ष ५ सयभन्दा बढी विद्यार्थीले भर्ना फारम भरिसकेकाले उनीहरु प्रवेश परीक्षा दिंदैछन्,’ उनले भने ।
विद्यालयले आजको प्रवेश परीक्षामार्फत योग्य तथा इच्छुक विद्यार्थीहरू छनोट गर्नेछ । विद्यार्थीको क्षमता र उत्कृष्टताका आधारमा छात्रवृत्ति पनि दिने व्यवस्था गरिएको विद्यालयले जनाएको छ ।
शैक्षिक सल्लाहकार प्रकाश लामिछानेका अनुसार, राजधानीस्तरको शिक्षालाई स्थानीय स्तरमै उपलब्ध गराउने लक्ष्यसाथ विद्यालयले अनुसन्धान आधारित शिक्षण, साइकोलोजिकल सपोर्ट, आधुनिक ल्याब र दक्ष शिक्षकको संयोजनमार्फत शैक्षिक उत्कृष्टता कायम राख्दै आएको छ ।
विद्यालयका प्रमुख निर्देशक इश्वरप्रसाद पोखरेलले भने, ‘हाम्रो शैक्षिक गुणस्तर र पूर्वाधारले विद्यार्थी र अभिभावक दुवैको विश्वास जितिरहेको छ । आजको प्रवेश परीक्षामा भव्य सहभागिता त्यसैको प्रमाण हो ।’
लगातार २६ वर्षदेखि गुणस्तरीय शिक्षामा समर्पित आदर्श माविमा प्लस टु भर्ना प्रवेश परीक्षाको आजको आयोजना आगामी भविष्यका लागि विद्यालयको प्रतिबद्धता र विद्यार्थीको आकर्षणको संकेतको रूपमा हेरिएको विद्यालयका अध्यक्ष सन्जय थापाले बताए ।
नेपालगन्जको आदर्श माविको शैक्षिक उपलब्धि गौरवपूर्ण, एसईई, विएलईदेखि अन्तर्राष्ट्रिय स्तरसम्म विद्यार्थीको सफलता
नेपालगन्जस्थित आदर्श माध्यमिक विद्यालयले विगत केही वर्षदेखि लगातार शैक्षिक क्षेत्रमा उत्कृष्टता कायम राख्दै आएको छ । विद्यालयको एसईई नतिजा, बीएलई सफलता, भर्ना प्रक्रियामा बढ्दो आकर्षण तथा विद्यार्थीहरूको राष्ट्रिय र अन्तर्राष्ट्रिय उपलब्धिहरूले आदर्शलाई यस क्षेत्रकै विश्वासिलो शिक्षण संस्थाका रूपमा स्थापित गरेको छ ।
विद्यालयले कक्षा १० को राष्ट्रिय परीक्षा एसईईमा २०७७ सालदेखि हालसम्म प्रत्येक वर्ष शतप्रतिशत नतिजा ल्याउन सफल भएको छ ।
विद्यालयका अनुसार, २०७७ मा ८० जना विद्यार्थी सहभागी भएका थिए जसमा शृष्टि सापकोटा, प्रमिष गौतम, कृतिका आचार्य, लेबिन लामिछाने र अतिथ अधिकारीले पूर्ण ४ जीपीए ल्याएर विद्यालयको गौरव बढाए ।
२०७८ मा ९६ जना सहभागी विद्यार्थीमध्ये अमिशा सिंहले ३.९० जीपीए ल्याइन् । २०७९ मा ७३ विद्यार्थी सहभागी भए र बिबेक भट्टले ३.९५ जीपीए ल्याए । २०८० मा ६९ विद्यार्थीले परीक्षा दिए, जसमा कृति चौलागाईं र खुशी डाँगीले ३.९१ जीपीए प्राप्त गरे। २०८१ मा ७२ जना विद्यार्थी सहभागी भए, जसमा प्रतीक भण्डारीले ३.९५ जीपीए ल्याएका थिए ।
‘चालु शैक्षिक सत्र २०८२ मा ७९ विद्यार्थी एसईईमा सहभागी हुँदैछन्,’ विद्यालयको प्रगति प्रतिवेदन सुनाउँदै शैक्षिक सल्लाहकार प्रकाश लामिछाने भन्छन्, ‘निरन्तर शतप्रतिशत नतिजा र ४ जीपीएका लागि पूर्ण तयारीमा हाम्रा शिक्षक, विद्यार्थी लागिरहेका छन् ।’
एसईईमामात्रै होइन, बीएलई (कक्षा ८) मा पनि आदर्श विद्यालयले वर्षौंदेखि शतप्रतिशत नतिजा ल्याउँदै आएको जनाएको छ । पछिल्लो वर्ष स्मृति बोहरा र योग लामिछानेले ३.९७ जीपीए प्राप्त गर्दै उत्कृष्ट प्रदर्शन गरेका छन् ।
शैक्षिक नतिजासँगै आदर्शका विद्यार्थीहरू अन्य गतिविधिमा पनि चम्किरहेका छन् ।
कक्षा ७ की सुबेस्टा रोकाले नेपालगन्जमा हालै आयोजना भएको ‘ग्ल्यामर रनवे २०८२’ जितेकी छन् ।
कक्षा ६ की इशा गिरीले काठमाडौंमा आयोजित ‘नेशनल जुनियर चेस च्याम्पियनसिप २०२५’ मा प्रथम रनरअप भइन् । उनी नेपालगन्ज मेयर कप चेस प्रतियोगिता २०२५ मा पनि विजेता बनिन् ।
कक्षा ७ की मोनिका काठायतले मनीला, फिलिपिन्समा भएको ‘मिस ग्ल्याम इन्टरनेशनल २०२५’ जितेकी छन् । कक्षा ९ का कृशान्त घिमिरे र कक्षा ६ का संस्कार न्यौपाने पनि क्रमशः चेस र पौडी प्रतियोगितामा उत्कृष्ट बनेका छन् ।
यसैगरी कक्षा ९ की मन्यता शाहीले नेपालगन्ज प्याब्सन गेम्स २०२४ मा सटपुटमा स्वर्ण पदक जितेकी छन् ।
विद्यालयका सह–प्रधानाध्यापक टंक गौतमका अनुसार, यस वर्ष विद्यालयमा प्राइमरी, लोअर सेकण्डरी र सेकण्डरी तहका लागि २ सय विद्यार्थीले प्रवेश परीक्षा दिएका थिए, जसमध्ये उत्कृष्ट ५३ विद्यार्थी मात्र छनोट भएका छन् ।
शैक्षिक सल्लाहकार लामिछाने भन्छन्, ‘प्रतिस्पर्धात्मक छनोट प्रक्रियाबाट मेधावी विद्यार्थीलाई गुणस्तरीय शिक्षातर्फ अभिमुख गराउने लक्ष्यसहित विद्यालय अगाडि बढिरहेको छ ।’
आदर्शका प्रमुख निर्देशक इश्वर प्रसाद पोखरेलका अनुसार, विद्यालयले विज्ञान तथा व्यवस्थापन दुवै संकायमा अध्ययनको अवसर दिँदै आएको छ । त्यसका लागि हरेक संकायमा विभागीय प्रमुख नियुक्त गरि प्रत्यक्ष निगरानी र नियमनमा अध्ययन अध्यापनको व्यवस्थाप मिलाइएको उनको भनाइ छ ।
‘आदर्शले व्यवहारिक शिक्षा, इन्टर्नसीप, करियर काउन्सिलिङ, आधुनिक ल्याब, प्रशिक्षित शिक्षक, साइकोलोजिकल सपोर्ट जस्ता संरचना मार्फत विद्यार्थीको समग्र विकासमा जोड दिँदै आएको छ,’ पोखरेलले भने ।
उनी भन्छन्, ‘निरन्तर सफलता, अभिभावकको विश्वास, विद्यार्थीको सहभागिता र सकारात्मक परिणामले आदर्श विद्यालयलाई नेपालगन्जकै मात्र होइन, प्रदेशकै उत्कृष्ट शिक्षण संस्थामध्ये एकको रूपमा चिनाएको छ ।’
