लुम्बिनी प्राविधिक विश्वविद्यालयले शैक्षिक सत्र २०८२/८३ अन्तर्गत बिटेक इन सिभिल इन्जिनियरिङ, बिटेक इन आइटी इन्जिनियरिङ, बिटेक इन कम्प्युटर साइन्स एन्ड एआई तथा सूचना प्रविधि कार्यक्रमहरूमा भर्ना भएका नयाँ विद्यार्थीहरूको अभिमूखिकरण सञ्चालन गरेको छ ।
उपकुलपति प्रा. डा. विनोदप्रसाद ढकालको प्रमुख आतिथ्यतामा आयोजित कार्यक्रम इन्जिनियरिङ तथा सूचना प्रविधि संकायका डिन निरज केसीको अध्यक्षतामा सुरू भएको थियो । कार्यक्रममा विशेष अतिथिका रूपमा लुम्बिनी प्रदेशका सचिव तथा मुख्यमन्त्री तथा मन्त्रिपरिषद् कार्यालयका कवीन्द्र नेपाल, सेवा आयोगका सदस्य कृष्णप्रसाद घिमिरे, विश्वविद्यालयका रजिस्ट्रार रेग बहादुर भण्डारी, परीक्षा नियन्त्रक जेन्टिल गौतम लगायतको सहभागिता रहेको थियो ।
प्रदेशको गौरवका रूपमा अघि बढिरहेको लुम्बिनी प्राविधिक विश्वविद्यालयले हाल प्राविधिक तहका सम्पूर्ण कक्षाहरू सञ्चालन गरिरहेको छ । अभिमूखिकरण कार्यक्रममा विद्यार्थीहरूलाई आफ्नो–आफ्नो पाठ्यक्रमको विस्तृत अवलोकन गराइएको थियो । प्रत्येक संकायका समन्वयकर्ताहरूले पाठ्यक्रम संरचना, कोर्स डिजाइन तथा शैक्षिक ढाँचाबारे प्रस्तुति दिएका थिए ।
कार्यक्रममा मन्तव्य राख्दै प्रदेश सचिव कवीन्द्र नेपालले भने, ‘पढाउनु हाम्रो जिम्मेवारी हो र पढ्नु तपाईं विद्यार्थीहरूको कर्तव्य हो । कुनै पनि अवस्थामा गुणस्तरीय शिक्षामा हामी कमी गर्दैनौँ । तपाईंहरूले पनि त्यसलाई मनन गर्दै कर्मशील भएर अघि बढ्नुपर्छ ।’ त्यस क्रममा उनले विद्यार्थीलाई प्रेरित गर्दै भने, ‘दिनको अन्त्यमा मूल्यवान ज्ञान त कोठाबाट बाहिर निस्कन्छ ।’ अर्थात्, ज्ञानलाई आत्मसात् गर्न निरन्तर मेहनत, लगनशीलता र अभ्यास अत्यावश्यक छ । उनले थपे, ‘नवप्रवर्तन तब मात्र सम्भव हुन्छ जब विचार जन्मिन्छ, त्यसको अवधारणा विकास हुन्छ र त्यसलाई कार्यान्वयन गरिन्छ—तब मात्र वास्तविक उपयोगमा आउँछ ।’
त्यसैगरी सेवा आयोगका सदस्य कृष्णप्रसाद घिमिरेले भने, ‘विद्यार्थीको गहना अनुशासन हो ।’ उनले यो गौरवपूर्ण योजना अन्तर्गत विश्वविद्यालयले सबै प्रकारका सेवाहरू उपलब्ध गराउने बताउँदै विद्यार्थीले पनि आफूलाई सक्षम, अनुशासित र जिम्मेवार बनाउँदै अघि बढ्नुपर्छ भनेर कविता मार्फत सन्देश दिए ।
कार्यक्रमको अध्यक्षता गरेका डिन निरज केसीले विश्वविद्यालयको प्रमुख लक्ष्य उच्चतम स्तरसम्म गुणस्तरीय शिक्षा पु¥याउनु रहेको उल्लेख गर्दै भने, ‘विद्यार्थीहरूले आँट र आत्मविश्वासका साथ अध्ययनमा लाग्नुपर्छ। तपाईंहरूको भविष्यमा आवश्यक सहयोग र साथका लागि हामी सधैं तत्पर छौँ ।’
