नेपालगन्जस्थित चार तारे होटल ‘कल्पतरु’ले आफ्नो १० औं बार्षिकोत्सव मनाउँदै सेवा विस्तारको महत्वाकांक्षी योजना सार्वजनिक गरेको छ, जसले सुदूर–मध्यपश्चिमको पर्यटन बजारमा उत्साहजनक सन्देश दिएको छ ।
आइतवार होटल व्यवस्थापनले आयोजना गरेको वार्षिकोत्सवमा कल्पतरुका प्रवन्ध निर्देशक दिपु बैश्यले आफ्ना आगामी योजना सार्वजनिक गर्दै आफ्ना पिता जगदिश वैश्यको सपनामा भइरहेका काम उजागर गरेका हुन् ।
नेपालगन्ज उद्योग वाणिज्य संघका अध्यक्ष टंक बहादुर धामीको प्रमुख आतिथ्यतामा आयोजना भएको समारोहमा अतिथिहरूले होटलले दशकभरमा आफूलाई विश्वसनीय ब्रान्डका रूपमा स्थापित गर्न सफल भएको उल्लेख गर्दै आगामी विस्तार योजनाले क्षेत्रीय पर्यटनलाई नयाँ उचाइमा पु¥याउने विश्वास व्यक्त गरे ।
कार्यक्रममा बोल्दै प्रवन्ध निर्देशक बैश्यले सन् २०२७ को मध्यसम्ममा कर्णाली प्रदेश राजधानी सुर्खेतमा पाँच तारे स्तरको होटल स्थापना गर्ने र सन् २०२८ सम्ममा सुदूरपश्चिम प्रदेश राजधानी धनगढीमा समेत होटल विस्तार गर्ने तयारी भएको जानकारी दिए ।
नेपालगन्जमा रहेको चार तारे सेवालाई अझ गुणस्तरीय बनाउँदै आधुनिक सुविधासहित अतिथिलाई सम्झनलायक बसाइँ उपलब्ध गराउने प्रतिबद्धता प्रवन्ध निर्देशक बैश्यको थियो ।
होटलका महाप्रबन्धक लक्ष्मण पन्थीले अतिथिलाई स्वागतयोग्य, सुरक्षित र पुनःफर्किन चाहने वातावरण निर्माण नै होटलको मूल उद्देश्य भएको बताए भने मानव संसाधन प्रमुख शिवानी गुप्ताले भविष्यका योजना सार्वजनिक गरिन् ।
महाप्रवन्धक पन्थीका अनुसार, बार्षिकोत्सवकै दिन कल्पतरु परिवारले सडक सरसफाइ अभियान सञ्चालन गर्दै सामाजिक उत्तरदायित्वप्रति प्रतिबद्धता प्रकट गरेको थियो ।
दशक अघि नेपालगन्जका रैथाने कपडा व्यवसायी जगदिश बैश्यले नेपालगन्जमा पर्यटकीय सम्भावनालाई मध्यनजर कल्पतरुको जग हालेका हुन् । तीन तारे उक्त होटललाई विस्तार योजनासहितको कल्पतरु चार तारे बनाइएको छ । अहिले आएर भएको पहलकदमीले नेपालगन्ज, सुर्खेत र धनगढीलाई क्षेत्रीय पर्यटनका प्रमुख गन्तव्यका रूपमा उभार्ने सकारात्मक संकेत कल्पतरु नेतृत्वले दिएको छ ।
वार्षिकोत्सवका अवसरमा प्रमुख अतिथि धामी, नेपालगन्ज उद्योग बाणिज्य संघका पूर्व अध्यक्षद्वय कृष्ण प्रसाद श्रेष्ठ र नन्दलाल बैश्य, नेपाल पत्रकार महासंघ बाँकेका अध्यक्ष नवीन गिरी, नाट्टा बाँकेका अध्यक्ष डिल्ली रेग्मी, निवर्तमान अध्यक्ष श्रीराम सिग्देल, उपभोक्ता अधिकारकर्मी बसन्त गौतम लगायतले शुभकामना ब्यक्त गरेका थिए ।
