‘वेडिङ डेष्टिनेशन’ बन्दै नेपाल
नेपालगन्जमा ‘क्रस बोर्डर टुरिज्म कन्क्लेभ’
नेपाल र भारतबीचको सीमापार आवागमनलाई सहज बनाउँदै भारतीय पर्यटकलाई नेपाल भित्र्याउने उद्देश्यका साथ नेपालगन्जमा ‘क्रस बोर्डर टुरिज्म कन्क्लेभ’ आयोजना भएको छ ।
नेपाल पर्यटन बोर्डको आयोजना तथा नेपाल एसोसिएसन अफ टुर एण्ड ट्राभल एजेन्ट्स (नाट्टा) बाँके च्याप्टरको संयोजनमा भएको कन्क्लेभ शनिवार नेपालगन्ज उपमहानगरपालिकाका प्रमुख प्रशान्त विष्टले उद्घाटन गरे ।
कन्क्लेभको उद्घाटन गर्दै नगर प्रमुख विष्टले धार्मिक पर्यटनका दृष्टिले नेपालगन्ज महत्वपूर्ण गन्तव्य भएको उल्लेख गरे । भारतीय पर्यटकलाई आकर्षित गर्न नेपाल र भारत दुबै पक्षको साझा प्रयास आवश्यक रहेको उनले बताए । नगर प्रमुख विष्टले सीमा नाकामा सहजीकरण, आतिथ्यपूर्ण वातावरण र धार्मिक पर्यटन प्रवद्र्धनलाई उपमहानगरपालिकाले प्राथमिकतामा राखेको स्पष्ट पारे ।
नेपाल पर्यटन बोर्डका कार्यकारी अधिकृत दीपकराज जोशीले बाँके जिल्लामा पर्यटनको ठूलो सम्भावना रहेको उल्लेख गर्दै सीमापार पर्यटन प्रवद्र्धनका लागि यस्ता कन्क्लेभ प्रभावकारी माध्यम बन्ने बताए । उनका अनुसार, नेपालगन्जलाई पश्चिम नेपालकै प्रमुख पर्यटन प्रवेशद्वारका रूपमा विकास गर्न भारतसँगको सहकार्य अपरिहार्य छ । ‘त्यसको पहल र प्रयास पनि भइरहेको छ,’ उनले नेपालको पर्यटन बजार क्रमशः व्यवसायिक हुँदै गएको बताउँदै भने । नेपाल वेडिङ डेष्टिनेशनको राम्रो अवसरका रुपमा विकास हुने सम्भावनामा जोशीले आवश्यक सहजीकरण गरिरहेको बताए ।
कन्क्लेभमा सहभागी भारतीय टुर अपरेटरहरूले सीमा र हवाई यात्रासँग जोडिएका समस्या औंल्याएका छन् । भारतीय टुर अपरेटर शैलेश अग्रवालले भारतीय पर्यटकबाट हवाई उडानमा तोकिएकोभन्दा बढी शुल्क लिइने गरेको गुनासो गरे । भारतीय पत्रकार मनिराम शर्मा, एसके मधेसिया लगायतले नेपाल प्रवेश गर्दा सन्देहको दृष्टिले हेरिने अवस्था अन्त्य हुनुपर्ने बताए । शर्माले भारतीय पर्यटकलाई कानुनी झमेलाभन्दा पारिवारिक र सुरक्षित वातावरण प्रदान गर्नुपर्नेमा जोड दिए ।
त्यसक्रममा सीमापार धार्मिक पर्यटन सर्किट निर्माणमा समेत छलफल भएको छ ।
हान नेपालगन्जका अध्यक्ष दिवाकर खनालले पशुपतिनाथ–केदारनाथ, जनकपुर–अयोध्या तथा लुम्बिनी–बोधगया जस्ता धार्मिक सर्किट विकास गर्न सके नेपाल–भारत पर्यटन सहकार्य नयाँ उचाइमा पुग्ने बताए । बागेश्वरी मन्दिरका मूल महन्त चन्द्रनाथ योगीले धर्मको विकाससँगै पर्यटन स्वतः प्रवद्र्धन हुने धारणा राखे ।
नाट्टा बाँकेका निवर्तमान अध्यक्ष तथा कन्क्लेभ संयोजक श्रीराम सिग्देलले दुबै देशका पर्यटन साझेदारलाई एउटै थलोमा ल्याएर सीमा क्षेत्रमा देखिने समस्या पहिचान र समाधान खोज्ने प्रयास गरिएको बताए । सीमा नाकामा यात्रु सहजीकरण, अध्यागमन प्रक्रिया सरल बनाउने, यातायात सञ्जाल सुदृढ गर्ने तथा संस्थागत समन्वय मजबुत बनाउने विषय कन्क्लेभको मुख्य एजेन्डा रहेको उनको भनाइ छ ।
नाट्टा बाँके च्याप्टरका अध्यक्ष डिल्लीराज रेग्मीले नेपाल–भारत पर्यटन क्षेत्रलाई चलायमान बनाउन ‘क्रस बोर्डर टुरिज्म कन्क्लेभ’ महत्वपूर्ण पहल भएको बताए । उनका अनुसार, करिब ३० जना भारतीय टुर अपरेटरसहित ३२ वटा स्टल सहभागी छन् । उल्लेख्य संख्यामा भारतीय पत्रकारहरुको सहभागिता पनि कार्यक्रममा छ । सहभागी टुर अपरेटर र भारतीय पत्रकारलाई ग्रामीण पर्यटनबारे जानकारी गराउने तथा बाँके राष्ट्रिय निकुञ्जमा जंगल सफारी गराउने कार्यक्रमसमेत समावेश गरिएको छ ।
कन्क्लेभअन्तर्गत प्यानल डिस्कसन, बी–टु–बी बैठक, प्रपर्टी भिजिट तथा ‘वेडिङ डेष्टिनेशन नेपालगन्ज’ अवधारणामाथि समेत छलफल गरिएको आयोजकले जनाएको छ । वेडिङ डेस्टिनेशनका प्लानरले कम लागत, नजिकको दूरी, सांस्कृतिक समानता र उपलब्ध पूर्वाधारका कारण नेपालगन्ज भारतीय बजारका लागि आकर्षक विवाह गन्तव्य बन्न सक्ने आयोजकको विश्वासमा सहमत हुँदै भने, ‘सांस्कृतिक मूल्यमान्यताले यसलाई अभैm उच्च बनाएको छ ।’ उनीहरुले भन्सार र सुरक्षाका नाममा दिइने अनावश्यक झन्झट भने हटाइनुपर्ने धारणा राखे ।
कन्क्लेभ उद्घाटनमा बाँकेका प्रमुख जिल्ला अधिकारी दिलकुमार तामाङले पर्यटनमैत्री व्यवहारका लागि आफुले आवश्यक सहजीकरण गरिदिने आश्वासन दिए । नेपालगन्जका पूर्व नगर प्रमुख विजयकुमार गुप्ताले नेपाल–भारतमा धार्मिट पर्यटन सर्किटको राम्रो सम्भावना औल्याए ।
कन्क्लेभका क्रममा निवर्तमान प्रतिनिधिसभा सदस्य डा. धवल शम्शेर राणाले नीतिगत सुधारसँगै पर्यटनमैत्री राज्यसंयन्त्रको आवश्यकता औल्याए । त्यसका लागि आफ्ुले संसदमै निरन्तर आवाज उठाएको बताए । निवर्तमान नेपालगन्ज नगर प्रमुखसमेत रहेका डा. राणाले नेपालगन्ज– दिल्ली उडानको आवश्यकतामा जोड दिइनैरहे ।
बाँके प्रहरी प्रमुख, प्रहरी उपरीक्षक अंगुर जीसीले पर्यटनमैत्री व्यवहारका लागि आफु तत्पर रहेको भन्दै कहिंकतै दुख दिने संस्थागत नियत नरहेको स्पष्ट पारे । कसरी सहजता ल्याउन सकिन्छ आफु तयार रहेको भन्दै प्रहरी उपरीक्षक जीसीले सरोकारवालाहरुबीच समन्वयको आवश्यकता औल्याए ।
आयोजकका अनुसार, यो कन्क्लेभले नेपाल–भारतबीचको पर्यटन सहकार्यलाई थप मजबुत बनाउँदै सीमापार पर्यटनसँग जोडिएका दीर्घकालीन समस्या समाधानतर्फ ठोस पहलको आधार तयार गर्ने अपेक्षा गरिएको छ ।
कन्क्लेभको उद्घाटन सत्रलाई नेपाल पर्यटन बोर्डका वरिष्ठ अधिकृत सुर्य थपलियाले सञ्चालन गरेका थिए भने अध्यक्षता सिइयो जोशीले गरेका थिए । कन्क्लेभलाई सम्यक मिडिया हबका अध्यक्ष झलक गैरेले सहजीकरण गरे ।
