पहिलो पटक नेत्रविक्रम चन्द ‘विप्लव’ नेतृत्वको नेकपा (माओवादी) ले निर्वाचनमा सहभागिता जनाउँदै छ ।
सधैजसो निर्वाचन बहिष्कार गर्दै आएको विप्लव नेतृत्वको माओवादीले यसपटक निर्वाचनमा सहभागिता जनाउने भएपछि संविधानको पुनर्लेखन गरी प्रत्यक्ष निर्वाचन प्रणालीबाट निर्वाचित कार्यकारी राष्ट्रपतिलगायतका एजेण्डासहितको २० बुँदे प्रतिबद्धता पत्र सार्वजनिक गरेको हो ।
आइतबार काठमाडौंमा पत्रकार सम्मेलन गर्दै नेकपा (माओवादी) ले चुनाव केन्द्रीत प्रतिवद्धता पत्र सार्वजनिक गरेको हो । प्रतिबद्धता पत्रमा प्रतिनिधिसभा र राष्ट्रियसभालाई पूर्ण समानुपातिक बनाइने, न्याय प्रणालीमा आमूल परिवर्तन गरिने, संघीयता उत्पीडित जाति र क्षेत्रलाई पहिचान र अग्राधिकार सहितको समाजवादी संघीयताको नीति लिइने उल्लेख छ ।
‘आम नागरिकको चाहना नयाँ विचार र प्रस्ताव सहितको नयाँ नेतृत्व हो, विप्लवले प्रतिबद्धता सार्वजनिक कार्यक्रममा भने, ‘यो निर्वाचनमा हाम्रो जनप्रिय पार्टी नेपाल कम्युनिस्ट पार्टी (माओवादी) पनि सहभागी हुँदैछ ।’ ‘हामी पूर्ण विश्वास, जिम्मेवारी बोध एवं आशा र भरोसाका साथ यो संक्षिप्त प्रतिबद्धता–पत्र सार्वजनिक गर्दछौँ’, विप्लवले प्रतिबद्धता जनाउँदै भनेका छन् ।
मओवादीले राज्य र निजी क्षेत्रको साझेदारीमा अगाडि बढ्ने नीति लिइने, उद्योग र व्यापार अर्थतन्त्रलाई नेपालका समृद्धिका आधार बनाइने भनेको छ । शिक्षा, स्वास्थ्य, रोजगारीलगायतमा नागरिकको पहुँच बढाइने सो पार्टीको नीति छ ।
कार्यक्रममा पार्टी महासचिव नेत्रविक्रम चन्द ‘विप्लव’ ले लगातार संघर्ष र क्रान्तिपछि जनताले चाहेजस्तो राज्य निर्माण हुन नसकेको बताए । अग्राधिकारसहितको समाजवादी संघीय ढाँचाको राज्य हुनुपर्नेमा जोड दिँदै विप्लवले राज्यले रोजगारीको क्षेत्रमा शून्य प्रयत्न गरेकाले युवामा निराशा देखिएको र वैदेशिक रोजगारीमा धकेल्ने नीति राज्यको देखिएको टिप्पणी गरे ।
बाँकेमा पनि उम्मेदवारी
दैनिक नेपालगन्ज
नेकपा (माओवादी) का तर्फबाट बाँके निर्वाचन क्षेत्र नं. १ बाट प्रतिनिधिसभा सदस्य पदका लागि दिपक बुढाथोकीले उम्मेदवारी दिएका छन् ।
सल्यान कुमाखका २९ वर्षीय उनी बाँकेलाई कार्यक्षेत्र बनाएर पार्टी राजनीति गर्दै आएका छन् ।
बाँके क्षेत्र नम्बर २ बाट नेकपा (माओवादी) का महेन्द्र प्रकाश चन्दले उम्मेदवारी दिएका छन् । सल्यान बागचौरका ४५ वर्षीय चन्द निर्वाचनमा उम्मेदवारी दिनु अघि सांगठनिक गतिविधिमा सक्रिय थिए । माओवादीले क्षेत्र नम्बर ३ मा भने उम्मेदवारी दिएन ।
