बाँके क्षेत्र नं २ बाट प्रतिनिधिसभा सदस्य उम्मेदवार मोहम्मद इश्तियाक राईले महिलाहरूलाई स्वतन्त्ररूपमा आफ्नो मताधिकार प्रयोग गर्न आग्रह गर्नुभएको छ। महिलालाई समान अधिकार दिलाउने र सशक्तिकरण गर्ने सवालमा प्रतिनिधिसभा सदस्यको निर्वाचन महत्वपूर्ण अवसर भएको हुँदा महिलाहरूले यो अवसरलाई खेर जान दिन नहुने राईको भनाई थियो। नेकपा एमाले क्षेत्र नं २ को महिला निर्वाचन परिचालन कमिटीले आज नेपालगन्जमा आयोजना गरेको बृहत महिला भेलामा उम्मेदवार राईले समान हकअधिकार प्राप्तिका लागि महिलाहरू स्वयं चनाखो हुनुपर्ने बताउनुभएको थियो।प्रतिनिधिसभा सदस्यहरू खासगरी कानुन, नीति-नियम बनाउने र भौतिक पूर्वाधार निर्माणमा केन्द्रित हुने भएको जानकारी दिँदै राईले आफू विजयी भएमा विगतमा आफूले कानुन र पूर्वाधार निर्माणमा हासिल गरेको अनुभवले थप उल्लेख्य काम गर्नसक्ने दाबी गर्नुभयो।भेरी अस्पतालको सेवासुविधा विस्तारलाई आफ्नो प्रमुख चुनावी मुद्दा बनाउनुभएका एमाले उम्मेदवार राईले आफू प्रतिनिधिसभा सदस्य नहुँदा समेत बाँकेमा स्वास्थ्य सेवा सुदृढ बनाउन सक्रिय भएको जानकारी दिनुभयो। वहाँले प्रदीप यादव स्वास्थ्यमन्त्री हुँदा आफूले करिब सवा ३ अर्बको योजना भेरी अस्पतालका लागि पारेको भएपनि पछि यादव स्वस्थ्य मन्त्रीबाट हटेपछि त्यो कार्यान्वयनमा आउन नसकेको बताउनुभयो। भेरी अस्पतालको सुविधा विस्तार गरेरै छाड्ने दृढता व्यक्त गर्नुभएका राईले भन्नुभयो- ‘मन्त्री छँदा भेरी अस्पतालमा नयाँ भवनहरू बनाउन सकें। अब त्यहाँ पर्याप्त दक्ष जनशक्तिको व्यवस्था गर्ने हो। र, सेवासुविधा पनि विस्तार गर्ने हो।’ उम्मेदवार राई भेरी अस्पतालमा ट्रमा सेन्टर र मुटु रोगसम्बन्धी सहज उपचारको उपलब्धताका लागि सक्रिय हुनुहुन्छ।यसैबीच आजै उम्मेदवार राईले नेपालगन्ज वडा नं १८ मा पुगेर मतदाताहरूसँग भेटघाट गर्नुभएको छ। वडा नं १८ मा नयाँ पुस्ताका युवाहरू उल्लेख्य संख्यामा उम्मेदवार राईको समर्थनमा उत्रिएका थिए।
