आठ जनाको छुट्टै खाता, अरुले गरे अटेरी

आसन्न प्रतिनिधि तथा प्रदेशसभा निर्वाचनलाई स्वच्छ, पारदर्शी र मितव्ययी बनाउन बाँके जिल्लामा उम्मेदवारहरूको वित्तीय गतिविधिमाथि अनुगमन तीव्र पारिएको छ ।निर्वाचन आचार संहिता जिल्ला अनुगमन समिति बाँकेले सार्वजनिक गरेको अनुगमन प्रतिवेदन अनुसार, शुक्रवारसम्म जिल्लाका विभिन्न राजनीतिक दल तथा स्वतन्त्र गरी ८ जना उम्मेदवारले निर्वाचन खर्च व्यवस्थापनका लागि छुट्टै बैंक खाता सञ्चालनमा ल्याएको पाइएको छ । ‘बाँकीलाई ताकेता गरेका छौं,’ अनुगमन अधिकृत समेत रहेका बाँकेका सहायक प्रमुख जिल्ला अधिकारी पूर्ण बहादुर खत्रीले दैनिक नेपालगन्जसँग भने, ‘ यसरी अटेरी गर्नु राम्रो होइन ।’निर्वाचन आचारसंहिताअनुसार उम्मेदवारहरूले व्यक्तिगत तथा अन्य खाताबाट खर्च नगरी निर्वाचन प्रयोजनका लागि अलग बैंक खाता प्रयोग गर्नुपर्ने व्यवस्था कार्यान्वयन भए÷नभएको विषयमा अनुगमन गरेको जनाएको छ ।शुक्रवार निर्वाचन आयोगमा उम्मेदवारको नाम, सम्बन्धित दल, निर्वाचन क्षेत्र र बैंक तथा शाखाको विवरण उल्लेख गरि अनुगमन प्रतिवेदन पठाइएको सहायक प्रजिअ खत्रीले पुष्टि गरे ।‘पारदर्शिता कायम गर्न र निर्वाचन खर्चको सही लेखाजोखा राख्न यस्तो अनुगमन नियमित रूपमा जारी रहनेछ,’ निर्वाचन आचार संिहता अनुगमन अधिकृत खत्रीले भने, ‘निर्वाचन खर्चलाई व्यवस्थित र पारदर्शी बनाउन सबै उम्मेदवारले तोकिएको नियमअनुसार छुट्टै खाता प्रयोग गर्नुपर्छ ।’यसले निर्वाचन खर्च नियन्त्रण, कालोधन प्रयोग न्यूनीकरण तथा स्वच्छ प्रतिस्पर्धा सुनिश्चित गर्न सहयोग पुग्ने अपेक्षा गरिएको छ । ‘मैले निर्वाचन अवधीभरका लागि छुट्टै खाता खोलिसकेको छु,’ बाँके निर्वाचन क्षेत्र नम्बर २ का उम्मेदवार दिपेन्द्र विष्टले दैनिक नेपालगन्जसँग भने, ‘सु–शासननै मेरो प्राथमिकता भएकाले आचारसंहिता पालना मेरो अनिवार्य शर्त हो ।’