नेपाली कम्युनिष्ट पार्टी (नेकपा)को तर्फबाट बाँके निर्वाचन क्षेत्र नम्बर २ का प्रत्यक्षतर्फका युवा उम्मेदवार दिपेन्द्र विष्टले विभिन्न १४ शिर्षक, धेरै उपशिर्षकमा ६ पृष्ठ लामो प्रतिबद्धता पत्र सार्वजनिक गरेका छन् ।
विष्टले पार्टी नेताहरुसहित आइतबार नेपालगन्जमा आयोजित औपचारिक कार्यक्रमबीच सार्वजनिक गरिएको उक्त दस्तावेजले सुशासन, प्रविधि, कृषि–उद्योग, पर्यटन र सामाजिक न्यायलाई समेट्दै समग्र विकासको बहुआयामिक खाका प्रस्तुत गरेको छ ।
‘भ्रष्टाचार शून्य बाँके–२’ अभियान
प्रतिबद्धता पत्रको मूल आत्मा ‘भ्रष्टाचार शून्य बाँके–२’ अभियान रहेको देखिन्छ । विष्टले भ्रष्टाचारमुक्त क्षेत्र निर्माणका लागि शून्य सहनशीलताको नीति अवलम्बन गरिने स्पष्ट उल्लेख गरेका छन् ।
यसअन्तर्गत प्रविधिमा आधारित पारदर्शी प्रणाली लागू गर्ने, डिजिटल उजुरी प्रणाली सञ्चालन गर्ने, भ्रष्टाचारमा संलग्न व्यक्तिलाई तत्काल निलम्बन गरी कानुनी कारबाही अघि बढाउने व्यवस्था गर्ने जस्ता उपायलाई प्राथमिकतामा राखिएको छ । सुशासन, पारदर्शिता र आधुनिक प्रविधिलाई केन्द्रमा राखिएको यो अवधारणाले प्रशासनिक सुधारलाई राजनीतिक अठोटसँग जोड्ने प्रयास देखिन्छ ।
‘योनै जेनजी आन्दोलनको मूल मर्म हो,’ पत्रकारहरुको प्रश्नमा विष्टले भने, ‘म कुरामात्रै होइन, काम गरेरै देखाउन प्रतिबद्ध छु ।’
डिजिटल सेवा र आइटी हबको लक्ष्य
युवा उद्यमी विष्ट आफैपनि ‘आइक्यास’ नामक डिजिटल पे कम्पनीका सञ्चालक हुन् । उनको प्रतिबद्धतामा नेपालगन्जलाई सूचना प्रविधिमैत्री सेवा र नवप्रवर्तनको केन्द्रका रूपमा विकास गर्ने स्पष्ट दृष्टिकोण प्रस्तुत गरिएको छ । ‘नागरिकका दैनिक कामलाई सहज बनाउन सिफारिस, कर भुक्तानी तथा अन्य सरकारी सेवाहरू अनलाइनमार्फत उपलब्ध गराइनुपर्छ भन्ने हो,’ विष्टले भने ।
उनको प्रतिबद्धतामा, सबै शुल्क डिजिटल प्रणालीबाट तिरिने, फाइलको अवस्था नागरिकले आफैं अनलाइनमार्फत हेर्न सक्ने व्यवस्था लागू गरिने बताइएको छ ।
उच्च गतिको इन्टरनेटसहित टेक पार्क र इन्कुभेसन सेन्टर स्थापना गरी युवालाई कोडिङ, डिजिटल मार्केटिङ र फ्रिलान्सिङजस्ता सीपमूलक तालिम प्रदान गर्ने योजना अघि सारिएको छ । यसले युवा रोजगारी र उद्यमशीलतालाई प्रतिबद्धता पत्रको मेरुदण्डका रूपमा स्थापित गरेको छ ।
युवा रोजगारी र उद्यमशीलता
बेरोजगार युवाका लागि उत्पादनमा आधारित स्वरोजगार कार्यक्रम सञ्चालन गर्ने, युवा उद्यमीलाई बिना धितो सस्तो ब्याजदरमा स्टार्टअप कर्जा उपलब्ध गराउने तथा कर छुटको व्यवस्था गर्ने प्रतिबद्धता जनाइएको छ । स्थानीय स्तरमै अवसर सिर्जना गर्दै युवालाई वैदेशिक रोजगारीको विकल्प दिन सकिने दाबी गरिएको छ ।
बाढी समस्या र जोखिम व्यवस्थापन
डुडुवा र नेपालगन्ज क्षेत्रमा देखिँदै आएको बाढी समस्याको स्थायी तथा दीर्घकालीन समाधानलाई पनि प्राथमिकतामा राखिएको छ । राप्ती नदीमा वैज्ञानिक र दिगो तटबन्ध निर्माण गर्ने, बगर क्षेत्रलाई व्यावसायिक तरकारी खेतीसँग जोड्ने तथा बाढी–डुबान व्यवस्थापनमा स्थानीय समुदायको निर्णायक सहभागिता सुनिश्चित गर्ने रणनीति प्रस्तुत गरिएको छ ।
‘यसले विकासलाई जोखिम व्यवस्थापनसँग जोड्ने दृष्टिकोणलाई प्रतिविम्बित गर्छ,’ प्रतिबद्धता सार्वजनिक गर्न आयोजित कार्यक्रममा सहभागी नेकपा नेता नविन शर्माले दैनिक नेपालगन्जसंग भने ।
कृषि, उद्योग र व्यापारिक हब
औद्योगिक कृषि र व्यापारिक हब निर्माण गर्ने, एकीकृत कृषि बजार र हब स्थापना गर्ने, सिँचाइँ र प्रविधिमा लगानी बढाउने, कृषि पर्यटन र विशिष्टिकरणलाई प्रवद्र्धन गर्ने योजना समेटिएको छ । कृषक कार्ड वितरण तथा सहुलियत ऋणको व्यवस्था गरी किसानलाई प्रत्यक्ष राहत दिने नीति पनि उल्लेख गरिएको छ ।
‘यसले बाँके–२ लाई कृषि–आधारित उत्पादन केन्द्रका रूपमा विकास गर्ने लक्ष्य देखाउँछ,’ बाँके २ को निर्वाचन कमाण्ड गरिरहेकी नेतृ पूर्णकुमार सुवेदीको भनाइ छ ।
सामाजिक न्याय र शिक्षा
भूमिहीन सुकुम्बासी लगायत भूमि समस्याको नीतिगत समाधान गर्ने प्रतिबद्धताले सामाजिक न्यायको मुद्दालाई समेटेको छ । मदरसा शिक्षाको आधुनिकीकरण, शिक्षा, स्वास्थ्य र खेलकुदलाई प्राथमिकतामा राख्ने योजना पनि दस्तावेजमा उल्लेख छ ।
‘समावेशी र सन्तुलित विकासलाई प्राथमिकतामा राखिएको संकेत दिन खोजिएको हो,’ नेकपा नेता अक्कल बमको भनाइ छ ।
पर्यटन र धार्मिक अर्थतन्त्र
पर्यटन तथा धार्मिक अर्थतन्त्र सुदृढीकरणका लागि लुम्बिनी–नेपालगञ्ज पर्यटन सर्किटलाई बलियो बनाउने योजना अघि सारिएको छ । कम्दी–बालापुर क्षेत्रमा रहेको प्राचीन गुम्बा तथा बुद्धकालीन शहरको पुरातात्विक खोज तथा अनुसन्धानका लागि लुम्बिनी विकास कोष र नेपाल सरकारसँग समन्वय गर्ने उल्लेख गरिएको छ । ‘यो विल्कुलै नयाँ तर, गर्नैपर्ने कुरा अघि सारेका छौं,’ विष्टले पत्रकारका जिज्ञासामा भने ।
साथै बागेश्वरी मन्दिरलाई ‘स्मार्ट बागेश्वरी’का रूपमा विकास गर्दै डिजिटल व्यवस्थापन प्रणाली स्थापना गर्ने योजना पनि समेटिएको छ ।
प्रतिबद्धता सार्वजनिक कार्यक्रममा उम्मेदवार विष्टसँगै नेकपाकी नेतृ पूर्णाकुमारी सुवेदी, पार्टीका नेता अकलबहादुर बम लगायतले सम्बोधन गरेका थिए । वक्ताहरूले युवा नेतृत्वमार्फत सुशासन, प्रविधिमैत्री प्रशासन र समावेशी विकास सम्भव हुने विश्वास व्यक्त गरेका थिए ।
‘दिपेन्द्र विष्टको प्रतिबद्धता पत्रले भ्रष्टाचारविरुद्ध कडा अठोट, प्रविधि–आधारित प्रशासन, युवा उद्यमशीलता, कृषि–औद्योगिक विकास, बाढी व्यवस्थापन र धार्मिक–पर्यटन प्रवद्र्धनलाई एउटै रणनीतिक ढाँचामा प्रस्तुत गरेको छ,’ उनका प्रचार संयोजक डा. डक्ट धितालले दैनिक नेपालगन्जसंग भने, ‘अब मतदाताले यी योजनालाई व्यवहारमा उतार्ने क्षमता र विश्वसनीयताको आधारमा मूल्यांकन गर्ने अपेक्षा गरिएको छ ।’ जिल्लाका नेता तथा अगुवा कार्यकर्ताहरुको सहभागितामा प्रतिबद्धता सार्वजनिक गरिएको कार्यक्रम डा. धितालले सहजीकरण पनि गरेका थिए ।
