नेपालगञ्ज–१ स्थित धम्बोझीको वाटर पार्क क्षेत्र पहिलो नजरमै मन लोभ्याउने गन्तव्य हो। तालको किनारमा फुलिरहेका रङ्गीबिरङ्गी फूल, हरियाली र शान्त वातावरणले जो–कोहीलाई आकर्षित गर्छ।
तर यही सुन्दरताभित्र एउटा मौन पीडा लुकेको छ।
वृक्षारोपणका बेला संरक्षणका लागि राखिएका ट्री गार्ड अहिले व्यवस्थापन अभावका कारण समस्या बनेका छन्। बिरुवा हुर्किएर रुख बन्ने चरणमा पुग्दा पनि ती फलामे संरचना हटाइएका छैनन्, जसले गर्दा रुखको वृद्धि अवरुद्ध भएको छ। कतिपय रुखका जरासम्म तारले जेलिँदा तिनको स्वास्थ्यमा गम्भीर असर परेको देखिन्छ।
प्रकृतिलाई जोगाउने नाममा गरिएको संरक्षण नै अहिले रुखका लागि बन्धन बनेको छ। समयमै व्यवस्थापन नहुँदा हरियालीलाई सघाउनुपर्ने संरचना उल्टै अवरोधको कारण बनेको स्थानीयको गुनासो छ।
वाटर पार्कजस्तो आकर्षक स्थलमा देखिएको यस्तो लापरवाहीले सरोकारवाला निकायको ध्यान तान्न जरुरी देखिन्छ। ट्री गार्ड हटाएर रुखलाई स्वतन्त्र रूपमा बढ्न दिने वातावरण सिर्जना गर्न ढिलाइ नगर्नु आवश्यक छ—ताकि यी बिरुवाहरू साँच्चिकै आकाश छुने रुखमा परिणत हुन सकून्।
