“सार्वजनिक सरोकारका मुद्दामा अदालतबाट भएका फैसला तथा आदेशहरूको प्रभावकारी कार्यान्वयन हुनुपर्छ, फैसला कार्यान्वयनका लागि आन्दोलन गर्नुपर्ने अवस्थाको अन्त्य गरिनुपर्छ,” सर्वोच्च अदालतका न्यायाधीश अब्दुल अजिज मुसलमानले बताएका छन्।
नव वर्ष २०८३ को पावन अवसरमा सार्वजनिक सरोकार कानून व्यवसायी समूह, नेपालगंजद्वारा शुक्रबार आयोजित शुभकामना आदान–प्रदान तथा क्यालेन्डर सार्वजनिक कार्यक्रमलाई सम्बोधन गर्दै न्यायाधीश मुसलमानले न्यायिक निर्णयहरूको कार्यान्वयन न्यायको वास्तविक प्रत्याभूति भएको उल्लेख गरे। उच्च अदालतले फैसला कार्यान्वयनका लागि अधिकृत तोकी कार्य अघि बढाएको विषयलाई सकारात्मक पहलका रूपमा उल्लेख गर्दै उनले यसले न्यायिक उत्तरदायित्वलाई सुदृढ बनाउने विश्वास व्यक्त गरे।
न्यायाधीश मुसलमानले द्वन्द्वकालदेखि नै नेपालगंजमा नागरिक समाजसँग सहकार्य गर्दै सार्वजनिक सरोकारका विषयमा आफू संलग्न रहेको स्मरण गर्दै यस्ता विषयमा समूहले खेलेको भूमिकाको प्रशंसा गरे। उनले न्यायपालिका न्यायको अन्तिम आश्रयस्थल भएको उल्लेख गर्दै संविधान र कानूनी मूल्यमान्यताप्रति प्रतिबद्ध, सक्षम र सुदृढ संस्थाको रूपमा यसको विकास आवश्यक रहेको धारणा राखे।
सामाजिक सञ्जालमार्फत न्यायालय र न्यायाधीशप्रति हुने अवाञ्छित टिप्पणी नियन्त्रण गर्नुपर्ने आवश्यकता औंल्याउँदै उनले अदालती निर्णय कार्यान्वयन सुनिश्चित गर्ने प्रणालीगत सुधार अपरिहार्य भएको बताए। साथै, “अदालत किन जल्यो वा जलाइयो भन्ने विषयमा गम्भीर विश्लेषण हुनुपर्छ,” भन्ने धारणा पनि उनले व्यक्त गरे।
कार्यक्रममा उच्च अदालत तुल्सीपुर, नेपालगंज इजलासका वरिष्ठतम न्यायाधीश बामदेव ज्ञवालीले सार्वजनिक सरोकारका मुद्दामा अदालतबाट भएका आदेशहरूको कार्यान्वयन अवस्थाबारे अनुसन्धान आवश्यक रहेको बताए। उनले उच्च अदालतले फैसला कार्यान्वयनमा सहयोग पुर्याउन एक अधिकृत तोकेको जानकारी दिँदै ध्वनि प्रदूषण, यातायात क्षेत्रको अव्यवस्था लगायतका विषयमा भएका आदेशहरू प्रभावकारी रूपमा कार्यान्वयन हुन नसकेकोप्रति चिन्ता व्यक्त गरे।
सार्वजनिक सरोकार कानून व्यवसायी समूहका संयोजक वरिष्ठ अधिवक्ता सुनिल कुमार श्रेष्ठले सार्वजनिक सरोकारका मुद्दाको उठान तथा वकालतको अभ्यास नेपालगंजमा काठमाडौंपछि दोस्रो स्थानमा रहेको उल्लेख गर्दै यस्ता मुद्दा पक्ष–विपक्षभन्दा माथि उठेर सबैको साझा सरोकारको विषय भएको बताए। उनले न्याय क्षेत्रसँग सम्बन्धित निकायहरूबीच समन्वय र सहकार्य आवश्यक रहेकोमा जोड दिए।
कार्यक्रममा समूहका तर्फबाट संयोजक वरिष्ठ अधिवक्ता सुनिल कुमार श्रेष्ठ, सहसंयोजक वरिष्ठ अधिवक्ता लोक बहादुर शाह र अधिवक्ता बसन्त गौतमले प्रमुख अतिथि न्यायाधीश मुसलमानलाई फूलमाला तथा खादाले स्वागत गरेका थिए।
समूहका अध्यक्ष वरिष्ठ अधिवक्ता श्रेष्ठको अध्यक्षता तथा सचिव अधिवक्ता विकास आचार्यको सञ्चालनमा सम्पन्न कार्यक्रममा वरिष्ठ अधिवक्ता विजय कुमार गुप्ता, बाँके जिल्ला बारका अध्यक्ष मेहर सिंह खत्री तथा नेपालगंज उच्च बारका अध्यक्ष पवन कुमार गुप्तालगायत वक्ताहरूले समूहले सार्वजनिक सरोकारका क्षेत्रमा पुर्याएको योगदानको सराहना गर्दै नयाँ वर्षले न्याय क्षेत्रमा सुधार तथा गुणस्तरीय सेवाको अपेक्षा व्यक्त गरे।
मानव अधिकार, कानूनी शासन, दण्डहीनता र सामाजिक न्यायका सवालमा वकालत तथा पैरवी गर्दै आएको उक्त समूह मानव अधिकारवादी कानून व्यवसायीहरूको सक्रियतामा स्थापना भएको हो। समूहले यसअघि सार्वजनिक सरोकारका मुद्दामा उच्च अदालतबाट भएका महत्वपूर्ण फैसलाहरूको संग्रह (२०८०) समेत प्रकाशन गरिसकेको जानकारी सहसंयोजक अधिवक्ता बसन्त गौतमले दिए।
