नेपालगन्जस्थित होटल पौवामा बिहीबारदेखि चलेको ‘स्वाद उत्सव’ मा सहभागिताको उत्साह देखिएको छ । होटलको १०औँ वार्षिकोत्सवको अवसरमा आयोजना गरिएको उक्त उत्सव पौवाका देशभर रहेका २० वटै शाखामा एकसाथ सञ्चालन गरिएको हो ।
ग्राहकहरूलाई निःशुल्क रूपमा विभिन्न परिकारको स्वाद चखाउने उद्देश्यसहित प्रत्येक वर्ष आयोजना हुँदै आएको यो उत्सवप्रति यसपटक पनि उल्लेख्य आकर्षण देखिएको हो । आयोजकका अनुसार, पहिलो दिन र दोस्रो दिन मात्रै करिब एक हजार जनाले उत्सवमा सहभागिता जनाइसकेका छन् ।
‘यो दुई दिनमा झण्डै एक हजार स्वादका पारखीले उत्साहजनक सहभागिता जनाउनु भएको छ,’ होटल पौवाका जनसम्पर्क प्रमुख नेत्र भण्डारीले शुक्रवार दैनिक नेपालगन्जसँग भने, ‘अन्तिम दिन शनिवार पनि परेकाले सहभागिताको उत्साह अझै उल्लेख्य हुनेमा विश्वस्त छौं ।’
होटल पौवा नेपालगन्जका महाप्रबन्धक गिरीराज पाण्डेले १० वर्षको यात्राबाट सिक्दै ग्राहकलाई अझ गुणस्तरीय सेवा, सन्तुष्टि र अपनत्व प्रदान गर्ने प्रतिबद्धता व्यक्त गरेका छन् । उनका अनुसार, देशभरका २० शाखामार्फत ४० हजारभन्दा बढीलाई उत्सवमा सहभागी गराउने लक्ष्य राखिएको छ ।
स्वाद, सेवा र आतिथ्यको अनुभव एकै ठाउँमा दिने उद्देश्यले सञ्चालन गरिएको उत्सवले ग्राहकहरूबीच उत्साह थपेको छ । ‘इच्छुक सबै स्वादका पारखीलाई उत्सवमा सहभागी भई स्वादको अनुभव लिन आग्रह गरिरहेका छौं,’ भण्डारीले भने । उत्सवमा शाकाहारी र मांसाहारी दुबैका लागि अलग–अलग स्वाद पस्किइएको जनसम्पर्क प्रमुख भण्डारीले बताए ।
