प्रसिद्ध शक्तिपीठ बागेश्वरी मन्दिर परिसरमा नौकुण्डीय गायत्री महायज्ञ एवं संगीतमय प्रज्ञा पुराण कथा आयोजना भएको छ । गायत्री परिवार नेपालगन्जको आयोजनामा यही नयाँ वर्ष २०८३ को पावन अवसरमा मंगलवारदेखि प्रज्ञा पुराण आयोजना भएको हो ।
‘परम वन्दनीया माता भगवती देवी शर्माज्यूको जन्मशताब्दी वर्षको अवसर पारेर बैशाख १ गतेदेखि ५ गतेसम्म नेपालगन्जस्थित बागेश्वरी मन्दिर पार्क परिसरमा यो आध्यात्मिक महोत्सव संचालन भइरहेको हो,’ आयोजक समितिका मनोजराजा श्रीवास्तवले दैनिक नेपालगन्जसँग भने ।
श्रीवास्तवका अनुसार, कार्यक्रममा विभिन्न आध्यात्मिक र संस्कारगत गतिविधिहरू समावेश गरिएका छन् ।
आयोजक गायत्री परिवार महिला मण्डल एवं समस्त गायत्री परिवार बाँकेको सहभागितामा मंगलवार भव्य कलश शोभायात्राबाट कार्यक्रमको शुभारम्भ गरिएको हो । बुधवारदेखि ४ गतेसम्म दैनिक रूपमा बिहान ५ देखि ६ बजेसम्म प्रज्ञा योग व्यायाम, ८ देखि ११ बजेसम्म देव पूजन तथा विभिन्न संस्कारहरू र साँझ ४ देखि ७ बजेसम्म प्रज्ञा पुराण कथा संचालन हुने आयोजकले जनाएको छ । ‘बैशाख ४ गते साँझ विशेष दीप महायज्ञ समेत आयोजना गरिनेछ,’ श्रीवास्तवले भने ।
महायज्ञ अवधिभर सहभागी हुने भक्तजनहरूका लागि विभिन्न संस्कारहरू निःशुल्क रूपमा गराइने आयोजकले उल्लेख गरेको छ । ‘भगवती देवी शर्माको जन्मशताब्दी र नयाँ वर्षको सुखद अवसरमा आयोजित यो कार्यक्रमले समाजमा सकारात्मक ऊर्जा र आध्यात्मिक चेतना फैलाउने विश्वास गरिएको छ,’ श्रीवास्तवले भने ।
