बाँकेको खजुरामा जारी एमटि एरिना प्रथम खजुरा गोल्ड कप फुटबल प्रतियोगितामा आयोजक टिमलाई भारत लखनऊको जेभिएम फुटबल एकेडेमीले सुन्यका विरुद्ध १ गोल गर्दै सेमिफाइनलको यात्रा तय गरेको छ ।
आयोजक न्यू डाँफे स्पोर्ट्स क्लबलाई हराउँदै भारत लखनउको जेबिएम फुटबल एकेडेमीले प्रथम खजुरा गोल्डकपमा सेमिफाइनल यात्रा सुरक्षित गरेको हो । प्रथम खजुरा गोल्डकपमा बुधबार भएको खेलमा घरेलु टोलीले हार बेहोरेको हो । जेबिएम फुटबल एकेडेमीका अरुण अधिकारीले खेल सुरु भएको ३३ औं मिनेटमा एक गोल गरेर टिमलाई जित दिलाए । खेलमा दुबै तर्फबाट गोल गर्ने पटक–पटकको प्रयास असफल भएको थियो ।
बुधबारको खेलमा जेबिएम फुटबल एकेडेमी लखनउका खेलाडी उमेश दर्लामी प्लेयर अफ द म्याच घोषित भए । उनले नगद १० हजारसहित ट्रफी, मेडल र प्रमाणपत्र प्राप्त गरे । खजुरा गाउँपालिका उपाध्यक्ष मञ्जु मल्ल र वडाअध्यक्ष टेकबहादुर रोकाक्षेत्रीले हस्तान्तरण गरे ।
प्रतियोगिता अन्तर्गत बिहीबार सशस्त्र प्रहरीको विभागिय टिम एपिएफ क्लब र नाइजेरियन जोन क्लब नाइजेरियाबीच हुने प्रचार संयोजक खगेन्द्र दाहालले जनाए । न्यू डाँफे स्पोर्ट्स क्लबको आयोजना तथा खजुरा गाउँपालिकाको संरक्षकत्वमा सोमबारबाट प्रतियोगिता चैत ३० गतेबाट बाँकेको खजुरा गाउँपालिका–४ डिगाउँस्थित मिनी रंगशालामा प्रतियोगिता चलिरहेको छ ।
प्रतियोगितामा कुल ८ वटा टिम सहभागी भएका छन् । नक आउटका आधारमा खेलाएको उक्त प्रतियोगिता बैशाख ६ गतेसम्म चल्ने क्लबका अध्यक्ष बालाराम खत्रीले जनाए । प्रतियोगिताका विजेता टिमले नगद ७ लाखसहित ट्रफी, मेडल र प्रमाणपत्र तथा उप–विजेता टिमले नगद ४ लाखसहित ट्रफी, मेडल र प्रमाणपत्र गर्नेछन् । यस्तै विधागततर्फ उत्कृष्ठ खेलाडीलाई नगद सहित ट्रफी, मेडल र प्रमाणपत्र प्रदान गरिनेछ । प्रतियोगितामा प्रथम हुने टिमलाई प्रदान गरिने पुरस्कार राशीलाई अमेरिकामा रहेका खजुराबासी लिलबहादुर थापाले ब्यहोरेका छन् ।
बुधबार समाजसेवी थापाले आयोजकलाई प्रथम पुरस्कार राशी आफ्ना दाई बालविर थापा मार्फत हस्तान्तरण गराएका थिए । गोल्डकपलाई एमटी एरिनाले टाईटल स्पोन्सर गरेको छ । विहिबार एपिएफ काठमाडौ र नाइजेरियन जोन क्लब, नाइजेरिया विच प्रतिश्पर्धा हुनेछ ।
