नेपालगन्जमा जारी महोत्सवमा चैत १२ गते नायक पल शाहले प्रस्तुति दिने कार्यतालिका थियो । तर, त्यस दिन होली भएकाले जिल्ला प्रशासन कार्यालयले सोही दिन महोत्सव बन्द गर्न निर्देशन दियो । त्यसपछि सुरु भयो सामाजिक सञ्जालमा जिल्ला प्रशासन कार्यालयको आलोचना । तर, उक्त आलोचनाको प्रतिक्रिया भने प्रशासनले दिएन ।
होलीको दिन महोत्सव रोक्नुको एउटै कारण थियो, ‘नायक शाह आउँदा अन्य दिनभन्दा दर्शकको घुइँचो बढ्ने र सोही दिन होली भएकाले पनि केही अवाञ्छित गतिविधि हुने सक्ने भएकाले सुरक्षा व्यवस्थालाई सवल एवम् सुदृढ तुल्याइ सार्वजनिक शान्ति र व्यवस्था र भरपर्दा र विश्वसनीय बनाउन ।’ होलीका दिन हुन सक्ने सम्भावित घटना हुन नदिन प्रशासनले लगाएको महोत्सव रोकले ठूलो घटना टरेको अहिले भने आँकलन गरिएको छ । जिल्लाका केही स्थानमा सामान्य घटना घटे । नेपालगन्ज-१९ भैयापुरमा लफडा भयो ।
‘भैयापुरको सानो मेलामा त सामान्य घटनाहरु भए,’ नेपालगन्जका स्थानीय किरण बर्माले भने, ‘महोत्सव हुन दिएको भए त झन ठूलो घटना हुनसक्थ्यो । झन्न महोत्सव हुन नदिएपछि घटना हुन पाएनन् ।’ बाँकेका प्रमुख जिल्ला अधिकारी श्रवणकुमार पोखरेलको तर्क पनि यस्तै छ । उनले पनि महोत्सवमा ठूलो संख्यामा दर्शक हुने र केही घटना हुन सक्ने सम्भावना हुँदा मेलामा रोक लगाइएको बताए । ‘पर्वको बेलामा भएको महोत्सवमा केही उग्र समूहले अवाञ्छित गतिविति गर्न सक्थे,’ उनले भने, ‘त्यस्तो हुन नदिँदा त्यस दिन महोत्सव बन्द गरिएको थियो । बाँकेमा त्यस्ता ठूला घटना हुन पाएनन् ।’
उनले यस वर्षको फागु पर्व (होली) भव्य, सभ्य र सद्भावपूणर् वातावरणमा सम्पन्न भएको बताए । यस पर्वले एकआपसमा सद्भाव र मेलमिलापको सन्देश दिएको उनको भनाइ छ । होलीका दिन एक सयवटा मोटरसाइकल र स्कुटी नियन्त्रणमा लिइएको जिल्ला प्रशासन कार्यालयले जनाएको छ । आवश्यक कागजात पेश गर्न नसकेका १६ वटाबाहेक अरुलाई छाडिएको प्रमुख जिल्ला अधिकारी पोखरेलले जानकारी दिए । साथै त्यस दिन ७५ हजार रुपैयाँ जरिवानासमेत असुल भएको उनी बताउँछन् । उनका अनुसार ३८ जना व्यक्तिलाई नियन्त्रणमा लिइएको र त्यसमध्ये नौजना उपर थप अनुसन्धान भइरहेको छ ।
