नेपालगन्जमा बहुभाषिक स्वरको उत्सव

मातृभाषाप्रति सम्मान र सद्भावको सन्देशअवधी सांस्कृतिक प्रतिष्ठानको आयोजनामा अन्तर्राष्ट्रिय मातृभाषा दिवसका अवसरमा नेपालगन्जमा बहुभाषिक काव्य गोष्ठी तथा विचार गोष्ठी भव्य रूपमा आयोजना भएको छ ।महेन्द्र पुस्तकालयको सभाहलमा आयोजित कार्यक्रममा उर्दु, नेपाली, हिन्दी, अवधी, मैथिली, नेवारी, देउडा लगायत विविध भाषाका स्रष्टाहरू एकै मञ्चमा उभिँदा भाषा र संस्कृतिको इन्द्रेणी झल्किएको थियो । कार्यक्रमको अध्यक्षता प्रतिष्ठानका अध्यक्ष रमेश चन्द्र कुमालले गरेका थिए भने प्रमुख अतिथिका रूपमा मधेशी आयोगका पूर्व सदस्य विजय कुमार गुप्ताको उपस्थिति रहेको थियो । प्रमुख अतिथिले सरस्वती माताको तस्बिरमा अबीर अर्पण गरी कार्यक्रमको उद्घाटन गरेका थिए ।गोष्ठीमा उर्दुका चर्चित शायर मेराज अहमद ‘हिमालय’, वरिष्ठ शायर सैय्यद अशफाक रसुल हाश्मी ‘सैय्यद नेपाली’, गुल्जार–ए–अदबका महासचिव मोहम्मद आरिफ अन्सारी तथा शायरा शाहिदा बानो शाह ‘वाहिदी’ले उर्दु गजलमार्फत मातृभाषाको सौन्दर्य अभिव्यक्त गरे ।नेपाली भाषामा किरण आचार्य र कल्पना पौडेल जिज्ञासुले कविता वाचन गरे भने पंकज श्रेष्ठले नेवारी भाषामा रेखा गुप्ताले हिन्दीमा आफ्ना सिर्जना सुनाए । विपिन वर्माले मैथिली, कमल बलमुवा र सुभद्रा यादवले अवधी गीत, रमराजा यादवले बिरहा, डा. जगत तिमिल्सिनाले देउडा गीत प्रस्तुत गर्दा सभाहल सांगीतिक र साहित्यिक तरंगले भरिएको थियो ।वरिष्ठ उर्दु साहित्यकार सैयद असफाक रसुल हाशमी, मेराज अहमद हिमालय, नूरुल हसन राई, अनिता लामिछाने, मीना गुप्ता, सुरजलाल गुप्ता, बिमला यादव लगायतका स्रष्टाहरूले आ–आफ्नो मातृभाषामा रचना वाचन गर्दै भाषिक विविधताको सौन्दर्य उजागर गरे ।कार्यक्रमका सञ्चालक तथा प्रतिष्ठानका संस्थापक अध्यक्ष विष्णुलाल कुमालले मातृभाषा केवल संवादको माध्यम नभई पहिचान, संस्कार र आत्माको स्वर भएको उल्लेख गर्दै यस्ता कार्यक्रमले भाषा संरक्षण, आपसी सद्भाव र सांस्कृतिक एकतालाई थप मजबुत बनाउने विश्वास व्यक्त गरे ।अवधी अभियन्ता आनन्द गिरी मायालुले अन्तर्राष्ट्रिय मातृभाषा दिवसको ऐतिहासिक पृष्ठभूमि र यसको महत्वबारे प्रकाश पार्दै ‘आमाले सिकाएको भाषा नै आत्माको पहिलो ध्वनि हो’ भन्ने भावपूर्ण अभिव्यक्ति दिएका थिए ।कार्यक्रममा विभिन्न क्षेत्रमा योगदान पु¥याएका साहित्यकार तथा समाजसेवीलाई मायाको चिनो प्रदान गरिएको थियो । प्रमुख तथा विशिष्ट अतिथिहरूलाई अबीर र गम्छा ओढाएर सम्मान गरिएको थियो ।समापनका क्रममा अध्यक्ष रमेश चन्द्र कुमालले सहभागिता जनाउने सम्पूर्ण स्रष्टा, अतिथि तथा सहयोगी संस्थाप्रति कृतज्ञता व्यक्त गर्दै आसन्न होली र ईद पर्वको शुभकामना दिएका थिए ।नेपालगन्जमा आयोजित यस बहुभाषिक काव्य गोष्ठीले मातृभाषाको सम्मान, सांस्कृतिक विविधताको उत्सव र सहअस्तित्वको सन्देश एकसाथ प्रवाह गर्दै साहित्यिक वातावरणलाई जीवन्त बनाएको सहभागीहरूको अनुभूति थियो ।