बुधबार नेपालगन्जको अधिकतम तापक्रम ४१ डिग्री सेल्सियससम्म पुग्यो । जल तथा मौसम विज्ञान विभागका अनुसार, नेपालगन्जको अधिकतम तापक्रम ३९ देखि ४१ डिग्रीसम्म रहेको हो । अधिकतम तापक्रम सँगै नेपालगन्जको न्यूनतम तापक्रममा पनि वृद्धि हुँदै गएको छ । बुधबार नेपालगन्जको न्यूनतम तापक्रम नै २७ देखि २९ डिग्री सेल्सियससम्म रहेको थियो ।
पछिल्ला दिन नेपालगन्जमा एकाविहानैदेखि साँझसम्म चर्को घामसँगै तातो हावा (लु) चल्ने गरेको छ । चर्को गर्मीका बेला विद्युत अनियमित हुँदा त्यसले सास्ती बढाएको छ ।
दिनभरको गर्मीपछि राती आनन्दले सुत्ने अवस्था समेत नभएको स्थानीय बताउँछन् । ‘छिनछिनमा विद्युत जाने, आउने गर्दा निकै समस्या भएको छ,’ उनीहरू भन्छन् ।
होटल व्यवसायी संघ बाँकेका अध्यक्ष भीमलाल कंडेलले विद्युत अनियमित हुँदा व्यवसाय नराम्ररी प्रभावित भएको बताउँछन् । ‘विद्युत अनियमित हुँदा होटल सञ्चालनको खर्च मात्रै वृद्धि भएको छैन, व्यवसाय नै सञ्चालन गर्न नसक्ने अवस्था सिर्जना हुन थालेको छ’, उनले भने, ‘सेवाको दररेट बढाउन सक्ने अवस्था छैन, विद्युत अनियमित हुँदा जेनेरेटर चलाउनु पर्छ, अहिले पेट्रोलियम पदार्थको मूल्यवृद्धि हुँदा कसरी खर्च धान्ने भन्ने चिन्ता होटल व्यवसायीलाई छ ।’
होटल व्यवसायी संघका अध्यक्ष कंडेलले विद्युत आउँदा समेत लोभोल्टेजका कारण विद्युतीय उपकरणहरू नचलेको बताएका छन् । ‘यसबारे प्राधिकरणमा सम्पर्क गरी भनेको छु, तर सुनुवाई हुन्छ जस्तो लाग्दैन’, उनले भने । थ्रि फेसको लाइन आउनेजाने तथा हाई र लोभोल्टेजका कारण मिटर ह्वात्तै घुम्ने, विद्युतीय सामाग्रीमा क्षति पुग्ने भैरहेको संघ अध्यक्ष कंडेल बताउँछन् ।
नेपाल उद्योग वाणिज्य महासंघका पूर्व केन्द्रीय सदस्य समेत रहेका नागरिक समाजका संयोजक कृष्ण प्रसाद श्रेष्ठले हरेक बर्ष नेपालगन्जबासीले विद्युत अनियमितताको समस्या झेल्नु परिरहेको बताए । ‘हामी प्रत्येक बर्ष प्राधिकरणलाई यसबारे गुनासो गर्छौ, तर समस्या दोहोरिन्छ’, उनले भने, ‘केही समस्या भए भन्न र पहल आफुहरूले गर्ने बताउँदै आएको बर्षौ बित्दा पनि समस्या समाधान हुन सकेको छैन ।’ उनले भने, ‘विद्युत अनियमित हुँदा आम नागरिक, विद्यार्थी, उद्योगी, व्यवसायी सबै प्रभावित छन् ।’
विद्युत अनियमित भएपछि नागरिक समाजका अगुवाहरूले बुधबार नेपाल विद्युत प्राधिकरण नेपालगन्ज वितरण केन्द्रका प्रमुख इन्जिनियर सञ्जय कुमार मिश्रलाई भेटेर ध्यानाकर्षण गराएका छन् । त्यसक्रममा नागरिक समाजका अगुवा श्रेष्ठले विगतका विगतका बर्षमा विद्युत सुधार गर्ने प्रतिबद्धता प्राधिकरण पूरा नगरेको बताएका थिए । उनले विगतका बर्षजस्तै यसबर्ष पनि गर्मीका बेला विद्युत अनियमित हुने समस्याले निरन्तरता पाएको बताएका थिए । ‘कुनै पनि बहानामा विद्युत अनियमित हुने कुरा नागरिक समाजलाई सह्य हुँदैन’, उनले भने ।
खेतीपातीको सिजन नजिकिंदै गर्दा विद्युत अनियमितताले सिंचाईका लागि समस्या हुने चिन्ता किसानहरूले गरेका छन् ।
त्यस्तै, हरित अभियन्ता हेमन्तराज काफ्लेले गर्मीले आक्रान्त नेपालगन्जमा विना सुचना लाइन काटिदा विद्यार्थीहरूलाई निकै मर्का परेको बताएका छन् ।
बास नेपालका निर्देशक हेमराज भट्टले नेपालगन्ज वितरण केन्द्र र मातहतका सबै कार्यालयहरूबाट समयमा सूचना आम नागरिक सम्म पुर्याउने गरी सुधार गर्न सुझाव दिए । उनले कार्यालयको फोनसँगै एउटा मोबाइल नम्बर समेत आम नागरिकको समस्या र गुनासो सम्बोधनका लागि सार्वजनिक गर्न माग गरे ।
नेपालगन्ज उद्योग बाणिज्य संघका महासचिब भिम रानाभाटले विद्युत समस्या बढ्दै जादा त्यसको प्रत्यक्ष असर आम ब्यवसायीहरूमा परेको भन्दै समयमा नै सुधार गर्न अनुरोध गरेका थिए ।
नेपालगन्ज वितरण केन्द्र प्रमुख ई. संजय कुमार मिश्रले विगतमा भन्दा विद्युत प्रसारणमा सुधार भएको दाबी गरेका थिए । उनले अब लामो समय विद्युत नजाने बताएका थिए ।
