बैकुण्ठधाम आध्यात्मिक महोत्सव आयोजनाका लागि सोमबार सचिवालय सञ्चालनमा ल्याइएको हो ।
राप्ती नदीको सिधनियाघाटमा बैकुण्ठधाम निर्माणका लागि आर्थिक सहयोग जुटाउन आगामी कार्तिक २२ देखि ३० गतेसम्म महोत्सव सञ्चालन हुन लागेको हो ।
महोत्सवका लागि सोमबार कृष्ण जन्माष्टमीको अवसर पारेर नेपालगन्जमा आयोजकले बैकुण्ठधाम आध्यात्मिक महोत्सव मूल समारोह समितिको सचिवालयको सञ्चालनमा ल्याएका छन् ।
नेपालगन्ज उपमहानगरपालिकाका प्रमुख विष्टले सचिवालयको उद्घाटन गर्दै बैकुण्ठधाम निर्माणका लागि सबैले सहयोग गर्न आवश्यक रहेको बताए । उनले बैकुण्ठधाम निर्माणका लागि सक्दो सहयोग गर्ने प्रतिबद्धता जनाएका थिए ।
नगरप्रमुख विष्टले बैकुण्ठधाम निर्माणका लागि आफ्नो व्यक्तिगत तर्फबाट ५१ हजार रुपियाँ सहयोग गर्ने प्रतिवद्धतासमेत व्यक्त गरे ।
“सामाजिक सञ्जालबाट पछिल्ला केही दिनहरूमा नकारात्मक टिका टिप्पणीहरू आउन सुरु भएको छ, यो गलत हो, बैकुण्ठधाम हामी सबैको हो, सबै जना एकदिन त्यही बाटो भएर जाने हो, काम सुरु नहुँदै नकारात्मक धारणा राख्नुहुँदैन ।” उनले भने, “अन्त्येष्टि स्थल सबैको साझा हो, सबैले आ–आफ्नो ठाउँबाट सक्दो सहयोग गर्नुपर्छ, तपाईँ सबैले यसका बारेमा सकारात्मक धारणा राख्नुहोस् ।”
बैकुण्ठधाम आध्यात्मिक महोत्सव मूल समारोह समितिका अध्यक्ष डा.सुरेशकुमार कनोडियाले सिधनियाघाटमा बैकुण्ठधाम निर्माणका लागि सहयोग जुटाउन बैकुण्ठधाम आध्यात्मिक महोत्सवको आयोजना गरिएको भन्दै यसमा सबैको अमूल्य सहभागिता, सहयोग र सुझावको खाँचो रहेको बताए ।
स्थानीय नागरिक, सरकारका सरोकारवाला निकायहरू, स्थानीय सरकार, प्रदेश सरकार र सङ्घीय सरकार सबैको सहयोग र समन्वयको खाँचो रहेको भन्दै अध्यक्ष कनोडियाले जग्गा प्राप्ति र डिपिआरसम्म गर्दा करिब २० करोड रुपियाँको आवश्यक पर्ने बताए ।
