शेयर पूँजीबाटै कारोबार गरेर सुरक्षित पूँजी परिचालनको योजना अघि सारेको टकसार बचत तथा ऋण सहकारी संस्थाले त्यसका लागि शेयर लगानी दोब्बर गर्न प्रस्ताव गरेको छ । शनिबार १५आंै बार्षिक साधारणसभामा अध्यक्ष इश्वर पोखरेलको प्रस्ताव स्वीकृत गर्दै प्रतिव्यक्ति कम्तिमा दुई लाख शेयर पूँजी कायम गरेर आउने रकमबाट कारोबार बढाउँदै लैजाने निर्णय गरिएको सचिव महेश्वर जोशीले जानकारी दिए ।
‘तीन करोड ५५ लाख शेयर पूँजीलाई पाँच करोड २५ लाख पुर्याउने लक्ष्य साधारणसभाले पारित गरेको छ’, सचिव जोशीले हरेक सूचकांकमा टकसार उत्साहजनक देखिएकाले बजारबाट बचत संकलन गरी कारोबार वृद्धि गर्नुभन्दा शेयर सदस्यहरूबाटै पूँजी बढाएर अगाडि बढ्ने योजना अघि सारिएको बताए ।
अध्यक्ष पोखरेलका अनुसार, ३४ प्रतिशतले कारोबार वृद्धि गरेको पछिल्लो आर्थिक बर्षको अंकलाई ४० प्रतिशतले आउने आर्थिक बर्ष पुर्याउने लक्ष्य पनि संस्थाले लिएको छ । ‘एक अर्बको कारोबार गर्ने लक्ष्यका साथ पूँजी वृद्धिलाई साधारणसभाले अनुमोदन गरेको छ’, पछिल्लो आर्थिक बर्षको ६५ करोड बढीको कारोबार तथ्यांक देखाउँदै अध्यक्ष पोखरेलले भने ।
टकसारले लघु उद्यम कर्जालाई गतबर्षदेखि स–साना व्यवसायिक क्षेत्रका लागि छुट्याएको जनाएको छ । ‘यो बाँकेमै राम्रो प्रयोग देखिएको छ’, सचिव जोशीले सहकारीको वास्तविक मर्म र धर्मलाई टकसारले अघि सारेको दाबी गर्दै भने ।
शनिबार औपचारिक समारोह बीच लुम्बिनी प्रदेशसभा सदस्य, पूर्व मन्त्री रत्न खत्रीले टकसारको १५औं बार्षिक साधारणसभा समुद्घाटन गरे । समारोहमा उत्कृष्ट कारोबारीहरूलाई सम्मान गर्नुका साथै विभिन्न क्षेत्रका प्रतिनिधिहरूले सहकारी क्षेत्रका बेथितिहरू विरुद्ध राम्रा सहकारीहरू आफैले चिरेर अगाडि बढ्न सुझाव दिएका थिए ।
‘सहकारी निकै आवश्यक क्षेत्र हो, तर त्यसलाई गलत मानिसहरूले बेलगाम घोडा बनाएर बदनाम गरे र जनताका बचतमाथि खेलवाड गरे’, सहकारीको महत्वबारे प्रकाश पार्दै विभिन्न वक्ताहरूले भने, ‘नियामक निकायले गलत गर्नेलाई कारवाही र राम्रो गर्नेलाई पुरस्कृत गर्दै सहकारीको विकासमा योगदान दिनुपर्छ ।’
शनिबार नै बन्द सत्रले अध्यक्ष पोखरेलको बार्षिक प्रगति प्रतिवेदन, कोषाध्यक्ष भानुभक्त रेग्मीको आर्थिक प्रतिवेदन, निर्मल कुमार उपाध्यायको लेखा सुपरिवेक्षण प्रतिवेदन सर्वसम्मत पारित गरेको सचिव जोशीले जानकारी दिए ।
