बाँकेको राप्तीसोनारी गाउँपालिका आफैंमा प्रकृतिको अनुपम देन हो — एकातिर विशाल राप्ती नदी, अर्कोतिर बाँके राष्ट्रिय निकुञ्जको हरियाली र वन्यजीवनको आकर्षण । यही हरित वातावरणबीच आज शनिबार मानिसहरू प्रकृतिसँगै दौडनेछन् — ‘राप्तीसोनारी नेचर रन’ मा ।
आयोजकका अनुसार, धारा नेपालगन्ज म्याराथनको भगिनी इभेन्टका रूपमा गत वर्षदेखि सुरु गरिएको यो प्रतियोगिता यसपटक अझै रोचक र विशेष बन्ने तयारीमा छ ।
यसका प्रवद्र्धक, धारा नेपालगन्ज म्याराथनका रणनीतिक तथा अन्तर्राष्ट्रिय समन्वय प्रमुख तीर्थ ओलीका अनुसार, ‘राप्तीसोनारीको प्राकृतिक सुन्दरतासँगै मानिसलाई रमाउन र वातावरणीय चेतना फैलाउन यो दौडको अवधारणा तयार गरिएको हो ।’ ‘हाम्रो चाहना राप्तीसोनारीका बढीभन्दा बढी युवाहरू नेपालगन्ज म्याराथनमा दौडुन् र नेपालगन्ज लगायत सहरी व्यस्त जीवनका मानिसहरु नेचर रनमार्फत यहाँको प्रकृति महसुस गर्न आउन् भन्ने हो,’ उनले भने । आगामी मंसिर ६ गते नेपालगन्ज म्याराथनको ११ औं संस्करण आयोजना हुँदैछ ।
राप्तीसोनारीमै जन्मिएका र हाल जर्मनीमा एथलेटिक्स प्रशिक्षकका रूपमा कार्यरत ओलीले बालबालिकादेखि युवासम्मलाई प्रकृति र वातावरणप्रतिको जिम्मेवारीबोध जगाउने उद्देश्यले यो कार्यक्रमलाई हरेक वर्ष निरन्तरता दिने योजना रहेको बताए । यो आयोजनालाई ओलीले स्थानीय सरकारले अपनत्व र स्वामित्व लिइदेओस् भन्ने चाहन्छन् ।
पालिका खेल संयोजक तथा प्रशिक्षक प्रताप चौधरीले विभिन्न विद्यालयसँग सहकार्य गरी सयभन्दा बढी विद्यार्थीलाई सहभागिताका लागि तयारी गराइएको जानकारी दिए ।
प्रवद्र्धक ओलीका अनुसार, धारा नेपालगन्ज म्याराथनका रेस निर्देशक चन्द्रबहादुर गुरुङसहितको प्राविधिक टोली शुक्रवारनै फिल्डमा पुगेर तयारीमा जुटेको छ । विजेताहरूलाई नगद र पदकद्वारा सम्मान गरिने आयोजकले जनाएका छन् ।
राप्तीसोनारी नेचर रन, विश्व दौड संस्था एसोसिएसन अफ इन्टरनेसनल म्याराथन एन्ड डिस्टेन्स रेस ९एम्स० को पूर्ण सदस्य नेपालगन्ज म्याराथनको भगिनी कार्यक्रम हो । यस अन्तर्गत नेपालगन्ज १० नाइट रन, गौघाट ग्रीन रन, काठमाडौं २५के हेरिटेज रेस र कर्णाली हाफ म्याराथन जस्ता दौड इभेन्टहरू समावेश छन् ।
गत असोजमा सम्पन्न गौघाट ग्रीन रनमा मिस नेपाल २०२३ श्रृच्छा प्रधान र कमनवेल्थ गेम्सका स्वर्णधारी जोन केलाईजस्ता अन्तर्राष्ट्रिय व्यक्तित्वहरूको सहभागिताले वातावरण संरक्षणप्रति सकारात्मक सन्देश फैलाएको थियो । आयोजकहरूले राप्तीसोनारी नेचर रनमा पनि यस्ता पर्यावरण–प्रेमी सेलिब्रिटीहरूलाई जोड्ने योजना अघि बढाएको बताएका छन् ।
धारा नेपालगन्ज म्याराथनका संस्थापक निर्देशक टी।एस। ठकुरीका अनुसार, दौडलाई केवल प्रतिस्पर्धा होइन, जीवनशैली र संस्कारका रूपमा विकास गर्नुपर्छ । ‘त्यसैले हामी नियमित प्रशिक्षणदेखि स्थानीयस्तरका प्रतियोगितासम्म निरन्तरता दिइरहेका छौं,’ उनले दैनिक नेपालगन्जसँग भने ।
यस्तो लाग्छ, राप्ती नदीको किनारमा दौडँदा, पाखामा हरियो घाँसको सुवास र हावाको स्पर्श — ‘राप्तीसोनारी नेचर रन’ केवल एक खेलकुद कार्यक्रम होइन, यो प्रकृतिसँगको आत्मीय सम्बन्धलाई पुनः महसुस गराउने हरित उत्सव हो ।
वातावरण संरक्षणमा अभियान चलाइरहेकी मिस नेपाल २०२३ श्रृच्छा प्रधान र कमनवेल्थ गेम्स २०१०का स्वर्णधारी केन्यानिवासी जोन केलाई समेतको उपस्थितिमा गौघाट ग्रीन रन निरन्तरता दिन सफल भएको थियो । राप्तीसोनारी नेचर रनमा समेत यस्ता सेलिब्रिटीलाई जोड्दै लैजाने तयारी रहेको धारा नेपालगन्ज म्याराथनका कार्यक्रम संयोजक कपिल थापाले बताए ।
