नेपालमा बढ्दो साइबर अपराधका घटनामा पीडित हुनेहरुको संख्या मध्ये अत्याधिक महिला हुने गरेको पाइएको छ । पछिल्लो सात बर्षदेखि नेपाल प्रहरीको साइबर ब्यूरोमा कार्यरत प्रहरी नायब उपरीक्षक प्रदिन ताम्राकारले शनिबार एउटा कार्यक्रममा भने, ‘९० प्रतिशत तथ्यांकमा महिलाहरु नै पीडित पाइएको छ ।’
त्यसो हुनुको तमाम कारणहरु औंल्याउँदै साइबर अपराध विज्ञ ताम्राकारले झट्ट विश्वास गरिहाल्ने बानी र साइबर अपराध विरुद्धको सचेतना अभावले त्यसो भएको पाइएको बताए । ‘समस्या आउने वित्तिकै प्रहरी कहाँ पुग्नुको साटो लुकाउने प्रवृत्तिले झनै पीडित हुने अवस्था पाइएको छ’, साइबर अपराधमा यौनजन्य क्रियाकलापले निकै ठूलो संख्या ओगटेको तथ्य प्रस्तुत गर्दै ताम्राकारले भने, ‘लुकाएर भन्दा प्रहरी कहाँ पुगे समस्या छिटो समाधान हुन्छ ।’
नेपाल प्रहरीको साइबर ब्यूरोमा दैनिक ८०–९० घटना विरुद्ध उजुरी आउने गरेको तथ्य प्रस्तुत गर्दै प्रहरी नायब उपरीक्षक ताम्राकारले दैनिक २ सय बढी घटना सामाजिक सञ्जाल फेसबुकसँग सम्बन्धित मात्रै रहेको बताए । ‘घटनाको संख्या घट्ने अवस्था छैन’, अपराध अनुसन्धानका लागि २०६३ सालकै विद्युतीय कारोबार ऐनमा निर्भर रहनु परेको गुनासो सुनाउँदै साइबर अपराध विज्ञ ताम्राकारको प्रश्न थियो, ‘त्यसले अहिले विकसित भएको एआईलाई कसरी सम्बोधन गर्छ ?’
डिजिटल मार्केटिङ्ग कम्पनी, डटवक्र्सले नेपालगन्ज उपमहानगरपालिका वडा नं। १८ सँगको सहयोगमा आयोजना गरेको शिक्षकहरुलाई साइबर अपराध सचेतना कार्यक्रममा आफ्नो प्रस्तुति राख्दै प्रहरी नायब उपरीक्षक ताम्राकारले सामाजिक सञ्जालका कर्पोरेट कार्यालयहरु नेपालमा नभएका कारण पनि अपराध विरुद्धको अनुसन्धानमा भैरहेको अप्ठ्यारो खुलासा गरे ।
