शैक्षिक रूपान्तरणको थालनीस्वरूप आर्थिक वर्ष २०७९/८० मा लुम्बिनी प्राविधिक विश्वविद्यालयको स्थापना हुँदै बाँकेमा पहिलो पटक प्राविधिक शिक्षालाई संस्थागत स्वरूप दिइयो ।
कुल १० करोड रुपैयाँको प्रारम्भिक बजेट विनियोजनसहित सुरू गरिएको लुम्बिनी प्राविधिक विश्वविद्यालयले बाँकेको शिक्षा क्षेत्रमा ऐतिहासिक मोड सिर्जना ग¥यो ।
२०७९ असार १८ गतेबाट औपचारिकरूपमा सञ्चालनमा आएको विश्वविद्यालयले सुरुमा दुई संकाय– वि.टेक ईन सिएस एण्ड एआई (कम्प्युटर साइन्स एण्ड आर्टिफिसिएल ईन्टिलिजेन्स), र वि.टेक ईन आईटी मार्फत शैक्षिक यात्रा आरम्भ ग¥यो । पहिलो ब्याचमा वि.टेक ईन सिएस एण्ड एआईमा १६ जना र वि.टेक ईन आईटीमा २१ जना गरी कुल ३७ जना विद्यार्थीले भर्ना लिए। यो सहभागिताले बाँकेको शैक्षिक सम्भावनामा नयाँ आशा पलायो ।
तर, त्यसपछिको चालु आर्थिक वर्ष २०८०/८१ मा विश्वविद्यालयको बजेट ९ करोड रुपैयाँमा सीमित भयो । यद्यपि, बजेट अभाव चुनौतीबीच पनि विश्वविद्यालयले शैक्षिक विस्तारको गतिलाई निरन्तरता दिँदै दुई नयाँ संकाय– वि.टेक ईन सिभिल इन्जिनियरिङ र वि.टेक ईन आइ.टी इन्जिनियरिङ सञ्चालनमा ल्यायो ।
सिभिल इञ्जिनियरिङको पहिलो ब्याचमा ४८ जना र आइ.टी इञ्जिनियरिङमा २३ जना विद्यार्थीले नाम दर्ता गरेका छन्। त्यस्तै, दोस्रो ब्याचमा वि.टेक ईन सिएस एण्ड एआईमा २३ जना र वि.टेक ईन आईटीमा ३५ जना विद्यार्थीले भर्ना लिएका छन् ।
छोटो अवधिमा संकाय र विद्यार्थी संख्या दुबैमा देखिएको उत्साहजनक वृद्धि विश्वविद्यालयप्रति बढ्दो विश्वासको प्रमाण हो। यस्ता तथ्यांकहरूले बाँकेको प्राविधिक शिक्षामा उज्यालो भविष्य संकेत गर्छन् ।
यसैबीच, आगामी आर्थिक वर्ष २०८१/८२ का लागि लुम्बिनी प्रदेश सरकारले विश्वविद्यालयको लागि ५ करोड रुपैयाँ चालू अनुदान र ६ करोड रुपैयाँ पुँजीगत अनुदान सहित कुल ११ करोड रुपैयाँ बजेट विनियोजन गरेको छ । यसले विश्वविद्यालयको पूर्वाधार सुदृढीकरण र शैक्षिक गुणस्तर वृद्धिमा महत्वपूर्ण भूमिका खेल्ने अपेक्षा गरिएको छ ।
लुम्बिनी प्राविधिक विश्वविद्यालयको यो शैक्षिक यात्रा बाँकेको मात्रै नभई सिंगो प्रदेशकै लागि उच्च शिक्षामा गहिरो सम्भावनाको नयाँ आयाम बन्ने दिशातर्फ अग्रसर देखिन्छ ।
