नेपालगन्जमा पार्श्वसंगीत सहित भोलि शनिवार ४ बजे हुने कविता प्रस्तुति कार्यक्रमको तयारी अन्तिम चरणमा पुगेको छ। अन्तरालले आयोजना गरेको कवि बीपी अस्तुको एकल कविता वाचनको अभ्यास (रियल्सर्ल) लगायतको तयारी अन्तिम चरणमा पुगेको आयोजकले जनाएको छ ।
कार्यक्रममा कवि अस्तुका एक दर्जनबढी कविताहरू पार्श्व संगितसहित प्रस्तुत गर्ने तयारी भइरहेको छ। आत्मआलोचना, समाज, प्रेम र वातावरण सम्बन्धी कविता प्रस्तुत गर्न लागेको कवि अस्तुले बताए।
पार्श्व सांगितका लागि गायक महेन्द्र सेडाई, तबलामा अनुभव अधिकारी, हमिङमा भोकलिष्ट सुरज घिमिरे, गितारमा रेनिस सेडाई, बाँसुरीमा समराज पोखरेल लगायतले साथ दिदै छन् ।
लामो समयपछि संगीतसहित कार्यक्रम हुनुले यस क्षेत्रको साहित्यको गरिमा बढाएको महसुस गरेको पत्रकार महासंघ बाँकेका पुर्व अध्यक्ष झलक गैरेले बताए।
कार्यक्रममा बरिष्ठ वाध्यवाधक तथा लोकगीत संकलक प्रेमदेव गिरी र बरिष्ठ लेखक तथा सन्चारकर्मी डा. नवराज लम्सालको विशेष सहभागिता हुने अन्तरालका प्रमुख कार्यकारी जयनारायण शाहले जानकारी दिए।
नेपालगन्ज सुर्खेत रोडस्थित वेष्टर्न मलमा रहेको अन्तराल हलमा हुने उक्त कार्यक्रममा सशुल्क सहभागिताको व्यवस्था गरिएको छ।
कार्यक्रममा प्रभावकारी र एकाग्रतापूर्ण वातावरणमा कविता प्रस्तुतिले कार्यक्रमलाई स्मरणीय बनाउने गरी तयारी भैरहेको अन्तरालका प्रमुख कार्यकारी शाहले बताए ।
अन्तराल डेढ दशक बढी समयदेखि सन्चार, कला, साहित्य, गीतसंगीत, खेलकुद, ईभेन्ट म्यानेजमेन्ट र पर्यावरणका क्षेत्रमा काम गर्दै आएको संस्था हो।
कवि अस्तु साहित्य र पत्रकारिताका सशक्त कलम चलाउँछन् ।
अन्तराल शृङ्खला अब हरेक महिना निरन्तरता दिने ढंगले तयारी भईरहेको आयोजकले जनाएको छ। `कविता र संगीतको बेजोड प्रस्तुति दर्शक तथा स्रोताहरुले मन पराउने हाम्रो विश्वास छ,’ अन्तरालका प्रमुख कार्यकारी शाह भन्छन्, ‘अन्तरालको यो मंचमा आगामी महिनाहरुमा कला, साहित्य, सगीतसंगीत र खेलकुदका विशिष्ट व्यक्तित्वलाई प्रस्तुत गरिनेछ। ´
कार्यक्रम निर्धारित समयमा सुरु हुने र दर्शकहरु पलेंटीमा बस्ने प्रवन्ध मिलाईएको आयोजकले जनाएको छ। कार्यक्रम अघिको आधा घण्टा भलाकुशारी र जलपानका लागि छुट्याईएको छ। कार्यक्रम शुरु हुनु १० मिनेट अघि हलको ढोका खुल्ने र एक घण्टा कविता प्रस्तुतिको कार्यक्रम रहनेछ ।
टिकट अन्तरालको कार्यालय र विभिन्न क्याफेहरुमा उपलब्ध छ।
