बर्दियाका युवा महिला उद्यमीहरूले उत्पादन गरेका स्थानीय सामग्रीको प्रदर्शनी तथा ग्यालरी प्रस्तुति कार्यशाला गोष्ठी मधुवन–१ मा आयोजना भएको छ । हरित उद्यमको प्रवद्र्धन, स्थानीय उत्पादनको बजार विस्तार र महिला उद्यमीलाई सशक्त बनाउने उद्देश्यसहित आयोजना गरिएको कार्यक्रममा राजापुर र ठाकुरबाबा नगरपालिकाका महिला उद्यमीहरूको उल्लेखनीय सहभागिता रहेको थियो ।
ग्रीन इकोनोमी परियोजना अन्तर्गत प्लान इन्टरनेसनल नेपाल र बाँके युनेस्को क्लबको साझेदारीमा तथा राजापुर नगरपालिका र ठाकुरबाबा नगरपालिकाको समन्वयमा कार्यक्रम सञ्चालन गरिएको हो । कार्यक्रममा युवा महिला उद्यमीहरूले उत्पादन गरेका सामग्री प्रत्यक्ष रूपमा प्रदर्शन गरिएको थियो भने स्थानीय सरकारका जनप्रतिनिधि, विभिन्न शाखाका प्रमुख तथा सरोकारवालाले ती सामग्रीको अवलोकन गरेका थिए ।
कार्यक्रममा हरित उद्यमको अवधारणा, त्यसको आवश्यकता, आर्थिक सम्भावना तथा राष्ट्रिय र अन्तर्राष्ट्रिय स्तरका सफल अभ्यासबारे प्रस्तुति गरिएको थियो । सहभागी उद्यमीहरूले आफ्ना व्यवसाय सञ्चालनका अनुभव, उत्पादनको बजारीकरण, नाफा–नोक्सान, चुनौती र अवसरका विषयमा खुला छलफलसमेत गरेका थिए ।
राजापुर नगरपालिका वडाध्यक्ष तथा नगर प्रवक्ता असराज न्यौपानेले स्थानीय स्रोतसाधनको प्रयोगबाट तयार गरिएका सामग्रीले ग्रामीण अर्थतन्त्र बलियो बनाउन सहयोग पुगेको बताए । उनले बेत, बाँस तथा अन्य स्थानीय सामग्री प्रयोग गरेर बनाइएका हस्तकलाका सामग्रीको प्रशंसा गर्दै यस्ता उद्यमले महिलालाई आत्मनिर्भर बनाउनुका साथै रोजगारी सिर्जना र आयआर्जनमा समेत योगदान पु¥याएको उल्लेख गरे । ‘स्थानीय स्रोतको सही उपयोग गर्न सके गाउँमै रोजगारी सिर्जना गर्न सकिन्छ,’ उनले भने, ‘यस्ता साना उद्यमले महिलाको आर्थिक अवस्था सुधार्न महत्वपूर्ण भूमिका खेलेका छन् ।’
ठाकुरबाबा नगरपालिकाका रोजगार शाखा संयोजक रविन्द्र अर्यालले स्वरोजगार कोषमार्फत व्यवसाय विस्तारका लागि सहुलियतपूर्ण ऋण उपलब्ध हुने जानकारी दिए । उनले स्थानीय स्तरमै उद्यम विस्तार गर्न चाहने युवालाई यस्ता अवसर उपयोग गर्न आग्रह गरे । ‘उद्यम गर्न चाहने युवाका लागि अहिले विभिन्न अवसर उपलब्ध छन्,’ उनले भने, ‘त्यसको सही उपयोग गर्न सके आत्मनिर्भर बन्न सकिन्छ ।’
कार्यक्रमका सहभागीहरूले स्थानीय उत्पादनलाई बजारसम्म पु¥याउन अझ प्रभावकारी प्रचारप्रसार आवश्यक रहेको धारणा राखेका थिए । उनीहरूले उत्पादनको गुणस्तर सुधार, प्याकेजिङ, डिजिटल प्रचारप्रसार र बजार पहुँच विस्तारमा स्थानीय सरकार र सरोकारवाला निकायको सहकार्य आवश्यक रहेको बताएका थिए ।
समापन कार्यक्रममा बोल्दै बाँके युनेस्को क्लबकी वरिष्ठ उपाध्यक्ष पञ्चम गुरुङले युवा उद्यमीहरूले डिजिटल माध्यमलाई व्यवसाय विस्तारको साधनका रूपमा प्रयोग गर्नुपर्नेमा जोड दिइन् । उनले सामाजिक सञ्जाल र डिजिटल प्लेटफर्ममार्फत उत्पादनको प्रचारप्रसार गर्न सके बजार विस्तार गर्न सहज हुने बताइन् । ‘अहिलेको समय डिजिटल प्रविधिको समय हो,’ उनले भनिन्, ‘उद्यमलाई दिगो बनाउन डिजिटल माध्यमको प्रयोग अपरिहार्य भइसकेको छ ।’ उनले स्थानीय सरकारले पनि युवा उद्यमीलाई आवश्यक सहजीकरण र प्रोत्साहन दिनुपर्ने धारणा राखिन् ।
कार्यक्रममा राजापुर नगरपालिका वडा नम्बर ५, ६, ८ र १० तथा ठाकुरबाबा नगरपालिका वडा नम्बर २, ३, ४ र ५ का वडाध्यक्ष तथा सदस्यहरूको उपस्थिति रहेको थियो । त्यसैगरी उद्यम विकास शाखा, रोजगार शाखा र पशु सेवा शाखाका प्रमुखहरूको पनि सहभागिता रहेको आयोजकले जनाएको छ ।
बाँके युनेस्को क्लबका अध्यक्ष प्रवेज अली सिद्दिकी, उपकार्यकारी निर्देशक गोविन्द प्रसाद लामिछाने लगायतको उपस्थिति रहेको कार्यक्रममा ग्रीन इकोनोमी परियोजनाका परियोजना अधिकृत राधे थारुले कार्यक्रमको सुरुवात गरेका थिए । स्वागत मन्तव्य फिल्ड सुपरभाइजर सञ्जिता रिजालले राखेकी थिइन् भने कार्यक्रमको सहजीकरण विनय दिल लामाले गरेका थिए ।
