‘दौडिन्छिन् हजुरआमा’को दोस्रो संस्करण भदौ २१ गते हुने

जेष्ठ नागरिक महिलाको स्वास्थ्य, सक्रिय जीवनशैली तथा मनोसामाजिक सुस्वास्थ्यप्रति सचेतना अभिवृद्धि गर्दै पुस्ताबीचको सम्बन्धलाई थप आत्मीय र सुदृढ बनाउने उद्देश्यले नेपालगन्जमा आयोजना हुँदै आएको ‘दौडिन्छिन् हजुरआमा’ कार्यक्रमको दोस्रो संस्करण आगामी २०८३ भदौ २१ गते आयोजना हुने भएको छ।

दैनिक नेपालगन्जको प्रकाशन संस्था सम्यक हब मिडिया प्रा.लिको आयोजना तथा नाट्टा बाँके च्याप्टरको सह–आयोजनामा कार्यक्रम हुन लागेको हो। आयोजकका अनुसार आइतबारदेखि कार्यक्रमका लागि सहभागिता दर्ता खुला गरिएको छ। कार्यक्रममा सहभागी हुन कुनै शुल्क लाग्ने छैन।

कार्यक्रमको रणनीतिक साझेदारका रूपमा धारा नेपालगन्ज म्याराथनले सम्पूर्ण प्राविधिक जिम्मेवारी सम्हाल्नेछ। आयोजकले ‘दौडिन्छिन् हजुरआमा’लाई केवल दौड प्रतियोगिताका रूपमा नभई जेष्ठ महिलाको शारीरिक सक्रियता, आत्मविश्वास, सामाजिक सहभागिता र मनोसामाजिक खुसी प्रवद्र्धन गर्ने सामाजिक अभियानका रूपमा अघि बढाएको जनाएको छ।

कार्यक्रमअन्तर्गत ५० वर्ष उमेर पूरा गरेका हजुरआमाहरूबीच दौड प्रतियोगिता हुनेछ। सहभागीहरूले नेपालगन्जको बीपी चोकदेखि धम्बोझी चोकसम्मको १ हजार १ मिटर दूरी पार गर्नेछन्। प्रतियोगितामा जीत–हारभन्दा आफ्नै उमेर र क्षमतामाथि विश्वास गर्दै सक्रिय जीवनको उत्सव मनाउने विषयलाई प्राथमिकता दिइएको आयोजकको भनाइ छ।

दौडअघि स्वास्थ्य शिविरसमेत सञ्चालन गरिनेछ। शिविरमा स्वास्थ्य परामर्श, स्वास्थ्य परीक्षण तथा आधारभूत उपचारको व्यवस्था गरिनेछ।

यसअघि आयोजित पहिलो संस्करणमा ५० वर्षभन्दा माथिका १५० भन्दा बढी हजुरआमा सहभागी भएका थिए। पहिलो संस्करणको प्रतियोगितामा नेपालगन्ज उपमहानगरपालिका–२० नयाँबस्ती थपुवाकी ५५ वर्षीया धनसरा बुढा प्रथम, नन्दमाया वली द्वितीय र नेपालगन्जकी रेवती सिंह तृतीय भएकी थिइन्।

पहिलो संस्करणमा हजुरआमाहरूको उत्साह, सहभागिता र आत्मविश्वासले कार्यक्रमलाई थप विस्तार गर्न प्रेरणा दिएको आयोजकले जनाएको छ। यही अनुभवलाई फराकिलो बनाउँदै यस वर्ष कार्यक्रमलाई दौडमा मात्र सीमित नराखी ‘भन्छिन् हजुरआमा’ अन्तरपुस्ता संवादसमेत आयोजना गरिने भएको छ।

संवाद कार्यक्रममा ५० वर्ष पार गरेका हजुरआमा र नयाँ पुस्ताका ५० भन्दा बढी छोरीहरूबीच प्रत्यक्ष संवाद हुनेछ। हजुरआमाहरूले आफ्ना जीवनका संघर्ष, अनुभव, सपना, सिकाइ र भोगाइ सुनाउनेछन् भने नयाँ पुस्ताले ती अनुभव सुन्ने, बुझ्ने र संवादमार्फत सम्बन्धलाई नयाँ अर्थ दिने अवसर पाउनेछन्।

आयोजकका अनुसार पुस्तान्तरण सम्पत्ति वा ज्ञानको हस्तान्तरणमा मात्र सीमित नभई जीवन भोगाइ र भावनाको हस्तान्तरणसमेत हो। हजुरआमाका अनुभव र कथालाई नयाँ पुस्तासम्म पुर्याउँदै परिवार, समाज र इतिहाससँग जोड्ने तथा पुस्ताबीचको भावनात्मक दूरी घटाउने उद्देश्यले संवाद कार्यक्रम आयोजना गर्न लागिएको हो।

द गोल्डेन ग्रान्डमाकी संयोजक सजल गैरेका अनुसार, आगामी दिनमा अभियानलाई अझ व्यवस्थित र प्रभावकारी बनाउँदै जेष्ठ नागरिक महिलाको स्वास्थ्य, सामाजिक सहभागिता, आत्मविश्वास तथा अन्तरपुस्ता सम्बन्धसँग जोडिएको वार्षिक कार्यक्रमका रूपमा स्थापित गर्ने लक्ष्य लिइएको छ।

कार्यक्रममा सहभागी हजुरआमा, नयाँ पुस्ताका छोरीहरू, परिवार, विद्यालय, सामाजिक संघसंस्था, निजी क्षेत्र, पर्यटन व्यवसायी, सञ्चारकर्मी तथा सम्पूर्ण शुभेच्छुकलाई सहभागी हुन आयोजकले आग्रह गरेको छ।

‘दौडिन्छिन् हजुरआमा’ केवल दौड होइन, हजुरआमाको सम्मान, स्वस्थ बुढ्यौलीको प्रवद्र्धन र पुस्ताबीचको सम्बन्धलाई अझ आत्मीय बनाउने सामाजिक अभियानका रूपमा अघि बढाइएको आयोजकले जनाएको छ।