नेपालगन्जका होटल तथा पर्यटन क्षेत्रको सेवा गुणस्तर सुधार तथा व्यवसायीको व्यावसायिक क्षमता अभिवृद्धि गर्ने उद्देश्यसहित आतिथ्य तथा सरसफाइसम्बन्धी तालिम सञ्चालन हुने भएको छ ।
होटल व्यवसायी संघ बाँके नेपालगन्जले नेपाल पर्यटन बोर्डसँगको संयुक्त आयोजनामा यहाँका ५० जना होटल तथा पर्यटन व्यवसायीहरुलाई दुई दिनसम्म उक्त तालिम दिने भएको हो ।
‘व्यवस्थापन आफैं सहभागी व्यवसायी तथा होटल व्यवस्थापकको क्षमता अभिवृद्धि गर्ने आयोजनाको उद्देश्य हो,’ आज विहीवारदेखि नेपालगन्जको कारकाँदोस्थित होटल इन्द्रेणी एन्ड रेष्टुरेन्ट्समा तालिम सुरु हुने जानकारी दिंदै आयोजकले भन्यो ।
आयोजक होटल व्यवसायी संघ बाँके नेपालगन्जका अध्यक्ष भिमलाल कंडेलका अनुसार, तालिममा होटल तथा पर्यटन उद्योगसँग प्रत्यक्ष सरोकार राख्ने विविध विषयमा प्रशिक्षण दिइने कार्यक्रम रहेको छ । सहभागीलाई सेवा व्यवस्थापनदेखि सरसफाइ, सुरक्षा र बजार प्रवद्र्धनसम्मका विषयमा व्यवहारिक ज्ञान प्रदान गरिने अध्यक्ष कंडेलले जानकारी दिए ।
तालिममा आतिथ्य सेवा र सरसफाइलाई केन्द्रमा राखिएको बताइएको छ । तालिमका प्रशिक्षकका रूपमा विषय विज्ञहरु निम्त्याइएको अध्यक्ष कंडेलले जानकारी दिए । ‘पर्यटन व्यवसायको गुणस्तर सुधारका लागि आवश्यक मानिएका विभिन्न विषयमा केन्द्रित भएर प्रशिक्षण सञ्चालन गरिनेछ,’ अध्यक्ष कंडेलले दैनिक नेपालगन्जसँग भने ।
आन्तरिक राजस्व कार्यालय नेपालगन्जका प्रमुख पुण्यप्रसाद न्यौपाने र खाद्य प्रविधि तथा गुण नियन्त्रण कार्यालयका प्रमुख प्रशान्त पोख्रेलले राज्यसँग जोडिएका विभिन्न विधि पद्धती तथा प्रणालीबारे सहभागीलाई प्रशिक्षित गर्नेछन् । भने, बद्री कोइराला, संगम कँडेल, नवीन भट्ट लगायतका होटल तथा पर्यटन क्षेत्रका विज्ञहरु दुई दिनसम्म सहभागीलाई विभिन्न विषयमा प्रशिक्षण तथा सहजीकरण गर्ने कार्यक्रम तय गरिएको छ ।
तालिममा ग्राहक सेवा, व्यक्तिगत साजसज्जा तथा स्वच्छता, खाद्य सुरक्षा र खाद्य सरसफाइ, बजार प्रवद्र्धन तथा विज्ञापनबारे प्रशिक्षण दिइने कार्यक्रम रहेको संघका अध्यक्ष कंडेलले जानकारी दिए । उनका अनुसार, फोहोर व्यवस्थापन तथा कीट नियन्त्रण प्रणाली, स्वास्थ्य तथा सुरक्षा, आपत्कालीन प्रतिकार्य, प्रचार सामग्रीको डिजाइन तथा मुद्रण, कार्ययोजना निर्माणलगायत विषय समेटिएका छन् ।
होटल व्यवसायी संघ बाँकेका अध्यक्ष कँडेलले नेपालगन्ज पर्यटन क्षेत्रको महत्वपूर्ण गन्तव्यका रूपमा विकासको चरणमा रहेको बताए । उनका अनुसार, पर्यटनसँग जोडिएका व्यवसायलाई थप व्यावसायिक, प्रतिस्पर्धी र सेवामैत्री बनाउन दक्ष जनशक्ति आवश्यक रहेकाले तालिम आयोजना गरिएको हो ।
तालिमबारे जानकारी दिंदै उनले पत्रकारसँग भने, ‘पर्यटकीय विकासको उच्च सम्भावना बोकेको नेपालगन्जमा होटल तथा पर्यटन क्षेत्रका व्यवसायीको व्यावसायिक दक्षता र क्षमता अभिवृद्धि गर्ने उद्देश्यले यो तालिम आयोजना गरेका हौं ।’
कँडेलका अनुसार, पर्यटन क्षेत्रमा सेवा प्रवाहको स्तर उकास्न र अन्तर्राष्ट्रिय अभ्यासअनुसार गुणस्तरीय सेवा संस्कृतिको विकास गर्न यस्ता कार्यक्रम प्रभावकारी हुने अपेक्षा गरिएको छ । तालिमबाट सहभागी व्यवसायीले आफ्नो संस्थाको व्यवस्थापन, सरसफाइ तथा ग्राहक सेवामा सुधार ल्याउन सक्ने विश्वास आयोजकको छ ।
नेपाल पर्यटन बोर्डको ‘नेपाल ः लाइफटाइम एक्सपेरियन्सेस’ अभियानसँग आबद्ध उक्त कार्यक्रमले नेपालगन्ज र बाँकेको पर्यटन उद्योगलाई थप व्यवस्थित, प्रतिस्पर्धी तथा गुणस्तरीय बनाउन योगदान पु¥याउने विश्वास आयोजकको रहेको छ ।
