लागू औषध चुनौती चिनौ: सामाजिक समाधानको बाटो रोजौ” (Recognize the drug problem: Seek pathways for Social Solution) भन्ने मूल नाराका साथ आज शुक्रबार नेपालगन्जमा ३९औं अन्तर्राष्ट्रिय लागू औषध दुरुपयोग तथा अवैध ओसारपसार विरुद्धको दिवस भव्य रूपमा मनाइएको छ।
जिल्ला प्रशासन कार्यालय बाँके र नेपालगन्ज उपमहानगरपालिकाको संयुक्त आयोजनामा एक विशेष प्रभातफेरि कार्यक्रम सम्पन्न भएको हो। सीमा चौकी जयपुरबाट सुरु भएको उक्त प्रभातफेरि जमुनाहा पुगेर कोणसभामा परिणत हुँदै समापन भएको थियो।
कार्यक्रममा जिल्लाका उच्चपदस्थ अधिकारी, सुरक्षा निकाय र सामाजिक संघसंस्थाको बाक्लो उपस्थिति रहेको थियो। नेपालगन्ज उपमहानगरपालिकाका नगर प्रमुख प्रशान्त विष्ट, बाँकेका प्रमुख जिल्ला अधिकारी दिल कुमार तामाङ र सहायक प्रमुख जिल्ला अधिकारी, जिल्ला प्रहरी कार्यालय बाँकेका प्रमुख प्रहरी उपरीक्षक (SP) अङ्गुर जि.सी., सशस्त्र प्रहरी बल ३० नम्बर गणका प्रमुख तथा नेपाली सेनाका प्रतिनिधिहरू सहभागी थिए ।
नेपाल पत्रकार महासंघ बाँके, स्थानीय मिडियाकर्मी, रिकभरिङ्ग नेपाल लुम्बिनी प्रदेशका फोकल पर्सन प्रबिन वि.सी., परिवर्तन समूह, दमयन्ती फाउन्डेसन नेपाल, जिल्लास्थित लागू औषध पुनःस्थापना केन्द्रहरू, विद्यार्थी तथा नागरिक समाजको सहभागिता थियो।
स्वास्थ्य कार्यालय बाँके लगायतका सरोकारवाला निकायहरूको समेत समन्वय रहेको उक्त कार्यक्रममा सहभागीहरूले लागू औषधको बढ्दो चुनौतीलाई बेलैमा पहिचान गरी यसको सामाजिक र व्यावहारिक समाधान खोज्नुपर्नेमा जोड दिएका थिए। लागू औषध मुक्त समाज निर्माणका लागि सीमा क्षेत्रमा निगरानी बढाउनुपर्ने र चेतनामूलक अभियानलाई तीव्रता दिनुपर्ने सन्देश कोणसभा मार्फत प्रवाह गरिएको थियो।
