नेपाल पत्रकार महासंघ बाँके शाखाले नेपालगन्ज उपमहानगरपालिका–४ मा रहेको २ कट्ठा १४.५ धुर जग्गाको भोगाधिकारलाई लिजमा परिणत गरी महासंघको नाममा उपलब्ध गराउन आवश्यक प्रक्रिया अघि बढाउने निर्णय गरेको छ । महासंघको कार्यालय भवन निर्माण भइसकेको उक्त जग्गा संस्थागत प्रयोजनका लागि निरन्तर आवश्यक रहेको भन्दै यस्तो निर्णय गरिएको हो ।
महासंघ बाँके शाखाको साउन ३१ गते आइतबार बसेको कार्यसमिति बैठकले उक्त निर्णय गरेको हो । शाखाका अध्यक्ष नवीन गिरीको अध्यक्षतामा बसेको बैठकले महासंघको कार्यालय सञ्चालन भइरहेको जग्गाको उपयोगलाई दीर्घकालीन र व्यवस्थित बनाउन लिजको प्रक्रिया अघि बढाउने निर्णय गरेको शाखाले जनाएको छ ।
नेपालगन्ज उपमहानगरपालिकाले महासंघ बाँकेलाई उक्त जग्गा भोगाधिकारका रूपमा उपलब्ध गराएको थियो । १५ वर्षदेखि सोही जग्गामा महासंघको कार्यालय भवन निर्माण भई संस्थाको नियमित कार्यालय सञ्चालन भइरहेको छ । संस्थागत कामका लागि जग्गा निरन्तर आवश्यक रहेकाले प्रचलित कानुन तथा सरकारी जग्गा दर्ता, उपयोग तथा लिजमा उपलब्ध गराउने सम्बन्धी कार्यनीति, २०७९ बमोजिम भोगाधिकारलाई लिजमा परिणत गर्न माग गर्ने निर्णय भएको हो ।
‘यसका लागि नेपाल पत्रकार महासंघ बाँकेको नाममा लिज उपलब्ध गराउन आवश्यक प्रक्रिया अघि बढाइने भएको छ,’ महासंघ बाँकेका अध्यक्ष नविन गिरीले भने, ‘सरकारी जग्गाको उपयोगसम्बन्धी प्रचलित व्यवस्था र कार्यनीतिअनुसार प्रक्रिया पूरा गरेर जग्गा लिजमा लिन पहल गर्ने निर्णय कार्यसमितिले गरेको हो ।’
यसैगरी महासंघले पत्रकार महिलाका लागि तीज मिलन कार्यक्रम आयोजना गर्ने भएको छ । हिन्दु महिलाको महान् चाड हरितालिकाको अवसर पारेर भदौ २१ गते आइतबार ‘तीज मिलन’ कार्यक्रम गर्ने निर्णय भएको हो । कार्यक्रममा पत्रकार महिलालाई दर खुवाउने कार्यक्रमसमेत राखिएको छ ।
सोही अवसरमा पत्रकार महिलाबीच ‘तीज विशेष कविता’ प्रतियोगिता पनि आयोजना गरिने भएको छ । कार्यक्रमको तयारी र व्यवस्थापनको जिम्मेवारी महासंघको महिला विभागलाई दिइएको छ । महिला पत्रकारको सहभागिता रहने गरी कार्यक्रम सञ्चालन गर्ने निर्णय कार्यसमितिले गरेको हो ।
शाखा सचिव कृष्ण ओलीले दिएको जानकारी अनुसार, महासंघ बाँके शाखामा आबद्ध साधारण सदस्यको सदस्यता नवीकरणको म्यादसमेत थप गरिएको छ । यसअघि तोकिएको समयभित्र सदस्यता नवीकरण गर्न नसकेका साधारण सदस्यलाई लक्षित गर्दै भदौ १५ गतेसम्म समय थप गर्ने निर्णय भएको हो ।
यसैबीच नेपाल पत्रकार महासंघ बाँकेका पूर्वसभापति तथा प्रेस स्वतन्त्रता सेनानी स्वर्गीय पन्नालाल गुप्ताको ९८औँ जन्मजयन्तिका अवसरमा निःशुल्क स्वास्थ्य जाँच शिविर आयोजना गर्ने निर्णय पनि बैठकले गरेको छ । भदौ २७ गते शनिबार स्वास्थ्य जाँच शिविर सञ्चालन गरिने भएको छ ।
गुप्ताको जन्मजयन्तिलाई पत्रकारिता तथा प्रेस स्वतन्त्रताको क्षेत्रमा उनको योगदानको स्मरणसँग जोड्दै महासंघले स्वास्थ्य जाँच शिविर आयोजना गर्न लागेको हो । शिविर निःशुल्क हुने महासंघले जनाएको छ ।
नेपाल पत्रकार महासंघ बाँके शाखाको कार्यालयमा साउन ३१ गते बसेको कार्यसमिति बैठकले संस्थाको सम्पत्ति तथा कार्यालय व्यवस्थापन, पत्रकार महिलासँग सम्बन्धित कार्यक्रम, सदस्यता नवीकरण र पूर्वसभापति गुप्ताको स्मृतिमा स्वास्थ्य शिविर सञ्चालन गर्ने गरी विभिन्न निर्णय गरेको हो ।
