अबदेखि एसइइ प्रदेशले सञ्चालन गर्ने
माध्यमिक शिक्षा परीक्षा (एसइई) मा बाँके जिल्लाबाट सृजना डिसी उत्कृष्ट भएकी छन् । बाँकेबाट ६२ दशमलव २३ प्रतिशत विद्यार्थी उत्तीर्ण भएकोमा चार जिपिए ल्याउने उनीमात्रै हुन् । कोहलपुरस्थित बालविद्या स्कुलकी छात्रा उनी ‘बाँके टपर’ भएकी हुन् ।
शिक्षा विकास तथा समन्वय एकाइ बाँकेका प्रमुख धनसुदन चौलागाईंका अनुसार, जिल्लाबाट सात हजार नौ सय २१ जना विद्यार्थीले परीक्षा दिएकोमा चार हजार नौ सय २९ जना विद्यार्थी उत्तीर्ण भएका छन् । दुई हजार ९ सय ९२ विद्यार्थी अनुत्तीर्ण भए । ग्रेड बृद्धिका लागि परीक्षा दिएका दुई हजार ४३ जना मध्ये एक हजार ४३ जना उत्तिर्ण भएका छन् ।
शिक्षा विकास तथा समन्वय एकाइ बाँकेका अनुसार, बाँकेमा ३.६१ देखि ४ जिपिए ल्याउने ६ सय ४२ जना, ३.२१ देखि ३.६० जिपिए ल्याउने एक हजार छ सय ७ जना, २.८१ देखि ३.२० जिपिए ल्याउने एक हजार ४ सय ९८ जना, २.४१ देखि २.८० जिपिए ल्याउने एक हजार ४७ जना र २.०० देखि २.४० जिपिए ल्याउने १३५ जना विद्यार्थी छन् ।
यसैबीच, अब माध्यमिक शिक्षा परीक्षा (एसइई) प्रदेशस्तरबाटै सञ्चालन हुने भएको छ । शनिवार सिंहदरबारमा बसेको प्रतिनिधि सभाअन्तर्गतको शिक्षा, स्वास्थ्य तथा सूचना प्रविधि समितिको बैठकले विद्यालय शिक्षा विधेयकमा एसइई यथावत राख्दै प्रदेश स्तरबाट सञ्चालन गर्ने सहमति जुटाएको हो ।
उक्त विधेयक पारित भएपछि एसइई परीक्षा राष्ट्रिय बोर्डको समन्वयमा प्रदेश सरकारको जिम्मेवारीमा सञ्चालन हुने व्यवस्था लागू गर्ने सहमति भएको छ ।
शनिवारको समितिको बैठकले जिल्लामा शिक्षा समन्वय इकाई राख्ने पनि सहमति गरेको छ । संविधानको मर्म विपरित नजाने गरी जिल्लामा शिक्षा समन्वय इकाई राख्ने समिति सभापति अम्मरबहादुर थापाले राखेको प्रस्तावमा सांसदहरूले टेबल बजाएर सहमति जनाएका हुन् ।
विद्यालय शिक्षा विधेयकलाई समितिले पारित गरेपछि संसदमा पठाउने छ । सांसदबाट पारित भएपछि सहमति भएको व्यवस्थाहरू कार्यान्वयनमा जानेछन् । विधेयकलाई अन्तिम रूप दिने गरी समितिको अर्को बैठक आज आइतबारका लागि बोलाइएको छ ।
