नेपालगन्जक व्यापार व्यवसायलाई चलाउनमान बनाउने भन्दै आयोजना गरिंदै आएको प्रादेशिक घरेलु, कृषि, सूचना प्रविधि, पर्यटन तथा औद्योगिक प्रदर्शनी एवं व्यापार महोत्सवको आठौं संस्करण घोषणा भएको छ ।
शुक्रवार आयोजक नेपाल घरेलु तथा साना उद्योग महासंघ बाँकेले पत्रकार सम्मेलन गरि मेला अवधिभर १ लाख ५० हजारदेखि २ लाखसम्म दर्शक भित्र्याउने लक्ष्यसहित महोत्सव तयारी अगाडी बढाइएको घोषणा गरेको हो ।
आयोजक मूल समितिका संयोजक समर बहादुर खत्रीले महोत्सवमा डेढलाखबढी दर्शक भित्र्याउने योजनामात्रै सुनाएनन्, करोडबढीको कारोबार र २० लाख बचतका योजना सुनाए ।
महोत्सवले लुम्बिनी प्रदेशभित्र रहेका विभिन्न कला, संस्कृति, भेषभुषा, मौलिक तथा सांस्कृतिक महत्व बोकेका विविधतायुक्त झाँकी, बाजा, परम्परागत पेशा, सीप लगायतलाई राष्ट्रिय स्तरमा पहिचान दिलाउन सहयोग पुरÞ्याउने अपेक्षा गरिएको आयोजक मूल समितिका सह–संयोजक विष्णु प्रसाद खनालको भनाइ छ ।
नेपालगन्ज कारकादोस्थित सडक डिभिजन परिसरमा पुस ३० गतेदेखि माघ १० गतेसम्म सञ्चालन हुने महोत्सव नेपाल घरेलु तथा साना उद्योग महासंघ बाँकेको आयोजना एवम् महिला उद्यमी समिति नेपालगन्ज उपमहानगरपालिका समितिको सह–आयोजनामा हुने बताइएको छ ।
नेपाल घरेलु तथा साना उद्योग महासंघ तथा महिला उद्यमी समितिको कार्यालय भवन निर्माणार्थ ‘मेहनत, सिर्जना, उत्पादन र बस्तु मेरै नेपालको’ भन्ने मूल नाराका साथ आठौं प्रादेशिक घरेलु, कृषि, सूचना प्रविधि, पर्यटन तथा औद्योगिक प्रदर्शनी एवं व्यापार महोत्सव गर्न लागिएको खत्रीले बताए ।
सह–संयोजक खनालले महोत्सवमा २०० देखि २५० वटासम्म नविनतम् प्रविधिजन्य उत्पादनहरु, महिलाद्वारा संचालित उद्यम तथा स्थानीय स्तरमा उत्पादित बस्तुहरुको स्टल मेलाको प्रमुख आकर्षणको रुपमा रहने जानकारी दिए । देशभित्रका सबै प्रकारका उत्पादनमूलक उद्योगका अलावा कृषि, वन पैदावार, हस्तकला, उर्जा, बायोग्यास लगायत पर्यटन, औद्योगिक तथा व्यापारिक प्रतिष्ठान क्षेत्रका स्टलहरु रहने बताइएको छ । साथै महोत्सवमा स्थानीय एवं राष्ट्रिय स्तरको सांस्कृतिक कार्यक्रम हरेक दिन हुने सह–संयोजक खनालले बताए ।
महोत्सवमा नेपाल घरेलु तथा साना उद्योग महासंघ तथा महिला उद्यमी समिति कोहलपुर पालिका समिति, खजुरा पालिका समिति, बैजनाथ पालिका समिति, राप्तिसोनारी पालिका समिति, जानकी पालिका समिति, डुडुवा पालिका समिति र नरैनापुर पालिका समितिले सहकार्य गरेको महासंघका महासचिव दीपक भण्डारीले बताए ।
स्थानीय स्रोतको सदुपयोग गरी उत्पादन गरिएका लघु, घरेलु तथा साना उद्योगहरुको उत्पादित बस्तुहरुको दिगो बजार पहुँच स्थापित गर्ने महोत्सवको उद्देश्य रहेको आयोजकको भनाइ छ ।
महोत्सवले लुम्बिनी प्रदेशभित्र रहेका विभिन्न कला, संस्कृति, भेषभुषा, मौलिक तथा सांस्कृतिक महत्व बोकेका विविधतायुक्त झाँकी, बाजा, परम्परागत पेशा, सीप लगायतलाई राष्ट्रिय स्तरमा पहिचान दिलाउन सहयोग पुरÞ्याउने अपेक्षा गरिएको छ ।
त्यसैगरी बाँके जिल्लाभित्र रहेका तथा सम्भावना बोकेका पर्यटकीय स्थलहरु बागेश्वरी मन्दिर, बाँके राष्ट्रिय निकुञ्ज, सन्तानेश्वर बाबाको मन्दिर, वर्फानी बाबाको मन्दिर, वाटरपार्क, गाभर भ्याली लगायतलाई राष्ट्रिय स्तरमा चिनाउन सहयोग पुरÞ्याउनेमा पनि महासंघ विश्वस्त रहेको महोत्सव संयोजक खत्रीले बताए ।
कोहलपरमा महोत्सवको रौनक
समाचारदाता
कोहलपुरमा जारी कोहलपुर महोत्सव विभिन्न आकर्षणका कारण चर्चामा आएको छ । पुष ९ गतेदेखि न्यूरोडमा सुरु भएको महोत्सवमा यस वर्ष विशेषगरी फरक ढंगले सजाइएको थारु गाउँले अवलोकनकर्ताको ध्यान तानेको छ । परम्परागत कलाकृति, सामग्री र खानपानले थारु संस्कृतिको झल्को दिएको छ ।
महोत्सवको अर्को आकर्षण मट्का चिया स्टल बनेको छ । कोहलपुरका युवा उद्यमी रमेश चौधरीले परम्परागत माटोको भाँडोमा पकाइने चियालाई व्यवसायिक रूपमा प्रस्तुत गर्दै युवामाझ लोकप्रियता कमाएका छन् ।
स्थानीय उत्पादनका स्टलहरू—जस्तै गुडिया, अगरबत्ती, अचार, घरेलु औजार तथा खाद्य सामग्रीमा पनि उल्लेख्य भीड देखिएको छ । साथै पुस्तक प्रदर्शनी, शैक्षिक तथा पर्यटन प्रवद्र्धन कार्यक्रम सञ्चालनमा छन् । नाट्टा बाँकेले बाँके राष्ट्रिय निकुञ्ज अवलोकनका लागि सहुलियत प्याकेज उपलब्ध गराएको जनाएको छ ।
महोत्सवमा निःशुल्क स्वास्थ्य जाँच, एम्बुलेन्स सेवा तथा दन्त सेवा समेत उपलब्ध छन् । बाल उद्यान, जलपरी र होटल–रेस्टुरेन्टका स्टलहरूले पनि महोत्सवको रौनक बढाएका छन् ।
