युवाको क्षमता र ऊर्जालाई विकासमा जोड्नुपर्नेमा जोड
युवा घर नेपालगन्जको तेस्रो अधिवेशनले शिव कुमार वर्माको अध्यक्षतामा नयाँ कार्यसमिति चयन गरेको छ । बुधबार भएको अधिवेशनको बन्द सत्रले वर्माको अध्यक्षतामा नयाँ कार्यसमिति चयन गरेको हो ।
नवनिर्वाचित कार्यसमितिको उपाध्यक्षमा वसन्ती रोकाया, सचिवमा रबिन्द्र बोहरा, कोषाध्यक्षमा शोभा थापा मगर र सहसचिवमा रमिता शाह चयन भएका छन् । सदस्यमा शुद्ध चौधरी, विवेक पराजुली, मनिष कर्माचार्य, सरीफ धोवि, प्रदिप बोहरा र मिना घर्ती चयन भएका छन् ।
युवा घर नेपालगन्जको पाँचौँ वार्षिक साधारण सभा तथा तेस्रो अधिवेशनले युवालाई विकासको साझेदारका रूपमा अघि बढाउनुपर्नेमा जोड दिएको छ । संस्थाले वर्षभरि सञ्चालन गरेका कार्यक्रमको समीक्षा गर्दै आगामी कार्ययोजनासमेत तय गरेको छ ।
लुम्बिनी प्रदेश सभा सदस्य अम्बिका काफ्लेले युवाको क्षमता र सिर्जनशीलतालाई समाज तथा राष्ट्र निर्माणमा उपयोग गर्नुपर्ने बताइन् । अवसर र जिम्मेवारी पाए युवा विकासका महत्वपूर्ण साझेदार बन्न सक्ने उनको भनाइ छ ।
’युवालाई अवसर र जिम्मेवारी प्रदान गर्न सके उनीहरू विकासका महत्वपूर्ण साझेदार बन्न सक्छन्,’ काफ्लेले भनिन्, ’युवा लक्षित कार्यक्रमलाई प्रभावकारी र परिणाममुखी बनाउन तीनै तहका सरकार तथा गैरसरकारी संस्थाबीच सहकार्य आवश्यक छ ।’
युवालाई नेतृत्व विकास, सीपमूलक शिक्षा, रोजगारी र उद्यमशीलतासँग जोड्नुपर्ने उनले बताइन् । युवा घरले युवाको भविष्य सुरक्षित बनाउने विषयमा काम गर्दै आएको उल्लेख गर्दै काफ्लेले आगामी दिनमा संस्थाले अझ सशक्त ढंगले काम गर्नुपर्ने बताइन् ।
गैरसरकारी संस्था महासंघ नेपालका केन्द्रीय सचिव नमस्कार शाहले युवाको सक्रिय सहभागिताबिना देशको समग्र विकास सम्भव नहुने बताए । नीति निर्माणदेखि कार्यान्वयन तहसम्म युवाको अर्थपूर्ण सहभागिता सुनिश्चित गर्नुपर्ने उनको भनाइ थियो ।
’युवाको क्षमता र ऊर्जालाई सही दिशामा परिचालन गर्न गैरसरकारी संस्था, स्थानीय सरकार र समुदायबीच सहकार्य आवश्यक छ,’ शाहले भने । युवा घर नेपालगन्जले युवाको क्षमता विकास, नेतृत्व निर्माण र सामाजिक क्षेत्रमा सक्रिय सहभागिताका लागि गर्दै आएको कामलाई निरन्तरता दिनुपर्ने उनले बताए ।
नेपालगन्ज उपमहानगरपालिका शिक्षा, युवा तथा खेलकुद महाशाखा प्रमुख गोर्ख बहादुर थापाले युवाको क्षमता विकास र सकारात्मक परिचालनका लागि स्थानीय सरकार प्रतिबद्ध रहेको बताए । युवाका आवश्यकता र चाहनाअनुसार शिक्षा, सीप, खेलकुद, रोजगारी तथा नेतृत्व विकासका कार्यक्रमलाई प्रभावकारी बनाउनुपर्ने उनले बताए ।
’स्थानीय तहले युवालाई विकासका लाभग्राहीका रूपमा मात्र नभई विकास निर्माणका साझेदारका रूपमा अघि बढाउन आवश्यक छ,’ थापाले भने । युवा घर नेपालगन्जजस्ता संस्थासँग सहकार्य र समन्वयलाई आगामी दिनमा अझ मजबुत बनाउने उनले बताए ।
नेपालगन्ज उपमहानगरपालिका वडा नम्बर १ का वडाध्यक्ष मजहर अली शाइले युवाको क्षमता र ऊर्जालाई सकारात्मक क्षेत्रमा परिचालन गर्नुपर्ने बताए । युवा लक्षित कार्यक्रमलाई प्राथमिकता दिँदै सामाजिक विकासमा उनीहरूको सक्रिय सहभागिता बढाउनुपर्ने उनले बताए ।
नेपालगन्ज उपमहानगरपालिका वडा नम्बर १९ का कार्यबाहक वडाध्यक्ष सोहन वर्मा र नाइस नेपालगन्जका अध्यक्ष हेमराज भट्टलगायतले संस्थाको नयाँ कार्यसमितिलाई शुभकामना दिए ।
साधारण सभामा युवा घरका अध्यक्ष भण्डारीले संस्थाले वर्षभरि गरेका कार्यक्रम तथा आगामी कार्ययोजनासहितको प्रतिवेदन प्रस्तुत गरेका थिए । कार्यक्रममा उपाध्यक्ष वसन्ती रोकायाले स्वागत गरेकी थिइन् ।
युवा घरका सदस्य शिव कुमार वर्माले सञ्चालन गरेको कार्यक्रममा संस्थाको वार्षिक गतिविधि, आगामी योजना र युवासँग सम्बन्धित विषयमा छलफल गरिएको थियो । साधारण सभापछि भएको बन्द सत्रबाट वर्माको अध्यक्षतामा नयाँ कार्यसमिति चयन गरिएको हो ।
