एसियन पेन्टस् च्याम्पियन कपअन्तर्गत जारी अन्डर–१८ फुटबल प्रतियोगितामा नेपालगन्जको सगरमाथा इङ्लिस बोर्डिङ सेकेण्डरी स्कुलले गण्डकी प्रदेशको गुरुकुल विद्या सदनलाई ४–३ गोलले पराजित गरेको छ । नेपालगन्ज रंगशालामा बिहीबार भएको खेलमा सगरमाथाले ४ गोल गर्दै जित निकालेको हो ।
लुम्बिनी प्रदेशको प्रतिनिधित्व गरिरहेको सगरमाथाका लागि अमित बोहरा, सन्जय रोका र मनोज परियारले गोल गरे । खेलको ३२ औं मिनेटमा ११ नम्बर जर्सीका अमित बोहराले गोल गर्दै सगरमाथालाई सुरुआती अग्रता दिलाए । त्यसपछि २२ नम्बर जर्सीका सन्जय रोकाले ३८ औं मिनेटमा दोस्रो गोल गरे ।
सन्जयले नै खेलको ५१ औं मिनेटमा अर्को गोल थपे । निर्धारित समय सकिएपछि थपिएको समयमा १० नम्बर जर्सीका मनोज परियारले ९१ औं मिनेटमा गोल गरेपछि सगरमाथाको गोल संख्या ४ पुगेको थियो ।
गण्डकी प्रदेशको गुरुकुल विद्या सदनका लागि ८ नम्बर जर्सीका सफल बिकले दुई गोल गरे । उनले खेलको ४५ औं र ९० औं मिनेटमा गोल गरेका थिए । गुरुकुलकै ३ नम्बर जर्सीका अपिल कुवरले ५० औं मिनेटमा एक गोल थपे । तर, तीन गोलमा सीमित हुँदा गुरुकुल ४–३ ले पराजित भयो ।
जिल्ला तहदेखि नै लगातार राम्रो प्रदर्शन गर्दै आएको सगरमाथा अहिले केन्द्रीय उपाधिको यात्रामा पुगेको छ । बाँके जिल्लाका ३२ टोलीलाई पछि पार्दै सगरमाथा स्कुल जिल्ला प्रथम बनेको थियो । त्यसपछि दाङमा भएको लुम्बिनी प्रदेशस्तरीय चरणमा मेचीकाली सेकेण्डरी स्कुललाई पराजित गर्दै उसले प्रदेशस्तरीय उपाधि हात पारेको थियो ।
जिल्ला र प्रदेश दुवै चरणमा सफलता हात पारेपछि सगरमाथा घरेलु मैदानमै केन्द्रीय उपाधिका लागि बलियो प्रदर्शन गर्ने लक्ष्यसहित मैदानमा उत्रिएको हो । बाँकेका ३२ टोलीलाई पछि पारेर जिल्ला च्याम्पियन बनेको सगरमाथाले प्रदेश च्याम्पियन हुँदै केन्द्रिय च्याम्पियन बन्ने यात्रालाई अघि बढाएको छ ।
प्रतियोगिताले फुटबलको विकाससँगै नयाँ युवा खेलाडीलाई आफ्नो क्षमता देखाउने अवसरसमेत दिएको छ । प्रतियोगिताको स्थानीय संयोजक, नेपालगन्ज– ११ का अध्यक्ष घनश्याम थापाका अनुसार, युवा प्रतिभालाई राष्ट्रिय स्तरमा अघि बढाउने उद्देश्यले आयोजना भइरहेको अन्डर–१८ प्रतियोगितामा प्रदेशस्तरमा उत्कृष्ट प्रदर्शन गरेका टोलीले केन्द्रीय उपाधिका लागि प्रतिस्पर्धा गरिरहेका छन् ।
लुम्बिनी प्रदेशको अन्डर–१८ फुटबलमा नयाँ च्याम्पियनको टुंगो लगाउन शुक्रबार सुदूरपश्चिम र गण्डकी प्रदेशबीच प्रतिस्पर्धा हुनेछ । त्यस खेलको विजेता टोलीले सगरमाथासँग फाइनलका लागि प्रतिस्पर्धा गर्नेछ । ‘तीन टोलीबीचको प्रतिस्पर्धाबाट विजेता बन्ने टोलीले काठमाडौंमा हुने केन्द्रीय स्तरको खेलमा सहभागी हुने अवसर पाउनेछ,’ नेपालगन्ज ११ का अध्यक्ष थापाले दैनिक नेपालगन्जसँग भने ।
