दैनिक नेपालगन्ज
बडादसैंमा नवदुर्गाको प्रसादस्वरूप टीका लगाउने र मान्यजनबाट आशीर्वाद लिने क्रम कोजाग्रत पूर्णिमासम्म जारी रहँदा आइतबार सडकमा चहलपहल देखिएको छ । केही दिनदेखि सुनसान देखिएका सहरका सडकमा बिहानैदेखि टीका थाप्न जानेहरूको आवागमन बढेको हो ।
विजयादशमीका दिन कात्तिक ४ गतेदेखि सुरु भएको टीका लगाउने क्रम आइतवारसम्म जारी रहेको थियो । दस दिनसम्म देवीको पूजा आराधना गरी विसर्जन गरेपछि सुरु भएको टीका र आशीर्वाद ग्रहण गर्ने परम्परा कोजाग्रत पूर्णिमासँगै समापन हुने भएकाले मान्यजनका घरमा जानेहरूको चहलपहल बढेको हो ।
आश्विन शुक्ल चतुर्दशी र पूर्णिमा एकै दिन परेकाले आइतवार नवदुर्गाको प्रसाद ग्रहण गर्ने अन्तिम दिनका रूपमा टीका थाप्नेहरू घरबाट निस्किएका हुन् । बजारमा सार्वजनिक यातायातमा यात्रा गर्नेहरूको चाप पनि बढेको थियो । यद्यपि, सवारीसाधनको संख्या कम हुँदा यात्रुहरूले सहज रूपमा आवतजावत गर्न नसकेको गुनासो थियो ।
नेपाल पञ्चाङ्ग निर्णायक विकास समितिका अध्यक्ष सहप्रा डा. पुरुषोत्तम भट्टराईका अनुसार कोजाग्रत पूर्णिमाका दिन अखिल बलिपूर्ति नभएसम्म नवदुर्गाको प्रसादस्वरूप टीका लगाउन शास्त्रीय रूपमा बाधा छैन ।
पश्चिम नेपालका केही जिल्लामा भने विजयादशमीका दिन मात्रै दुर्गाको प्रसादस्वरूप टीका लगाउने र मान्यजनबाट आशीर्वाद लिने प्रचलन रहेको छ ।
