हुलाकी सडक अन्तर्गत नेपालगन्जको धम्बोझीचोकदेखि नन्दनी मिलसम्मको साँघुरो खजुरारोड छिट्टै फराकिलो हुने भएको छ ।
हुलाकी राजमार्ग निर्देशनालय अन्तर्गत योजना कार्यालय नेपालगन्जले दिएको जानकारी अनुसार, त्यसका लागि आवश्यक बजेट सुनिश्चित भएकाले सडक छिट्टै फराकिलो हुने भएको हो ।
‘स्थानीय घरधनीले सडकका लागि आवश्यक क्षेत्रफलमा बनेका संरचनाहरू अधिकांसले भत्काइसक्नुभएको छ’, योजना कार्यालय नेपालगन्जका प्रमुख लिला बहादुर भण्डारीले दैनिक नेपालगन्जसँग भने, ‘नेपाल राष्ट्र बैंकले पनि आवश्यक प्रक्रिया अगाडि बढाइसकेकाले छिट्टै टेण्डर प्रक्रियामा अगाडि बढ्दैछौं ।’ भण्डारीका अनुसार, सर्भे पूरा भैसकेकाले यो साताभित्र डिपिआरको रिपोर्ट पनि आइपुग्ने सम्भावना छ ।
‘त्यसलगत्तै नेपालगन्ज उपमहानगरपालिकासँग समन्वय गरेर सडक बिस्तार कार्य अगाडि बढ्छ’, भण्डारीले त्यतिञ्जेल राष्ट्र बैंकले सडकका लागि आवश्यक क्षेत्रफल खाली गरिसक्ने विश्वास पनि गरिएको जानकारी दिंदै भने ।
