विपद् जोखिम न्यूनीकरणका लागि निजी क्षेत्रको साझेदारी खोजिएको छ । नेपालगन्ज उपमहानगरपालिकाले बिहीबार निजी क्षेत्रका प्रतिनिधिहरू बीच त्यसको अपिल गर्दै महत्व र आवश्यकताबारे जानकारी गराएका हो ।
‘हामीले त्यसको औपचारिक पहलकदमी र लाभ समेत वितरण गर्न थालिसकेका छौं’, उपमहानगरपालिकाका प्रमुख प्रशासकिय अधिकृत मान बहादुर बमले निजी क्षेत्रका प्रतिनिधिहरू बीच भने, ‘यसको लाभ पनि वितरण भैसकेकाले तपाईहरूको सहभागिता र साझेदारी महत्वपूर्ण हुनेछ ।’
विपद् फोकल पर्सन समेत रहेका उपमहानगरपालिकाका प्रशासकीय अधिकृत दिपेन्द्र श्रेष्ठले सहजीकरण गरेको कार्यक्रममा नेपालगन्ज उद्योग वाणिज्य संघका वरिष्ठ उपाध्यक्ष चिरञ्जीवि ओली, पूर्व अध्यक्ष कृष्ण प्रसाद श्रेष्ठ, होटल व्यवसायी संघ बाँके नेपालगन्जका अध्यक्ष भीमलाल कंडेल, उद्योगपति कश्मिरा खातुन लगायतले विषयवस्तुबारे आफ्ना धारणा राखेका थिए । कार्यक्रममा प्रमुख प्रशासकिय अधिकृत बमले निजी क्षेत्रले श्रम र रोजगारीमा स्थानीय तहको कस्तो भूमिकाको आवश्यकता खोजेको हो त्यसबारे लिखित जानकारी लिएर आगामी नीति तथा कार्यक्रममा सम्बोधनका लागि सहयोग पुर्याउन अपिल पनि गरे । उनले त्यसक्रममा संस्थागत सामाजिक उत्तरदायित्व सम्बन्धी व्यवस्थाबारे प्रस्तुतिकरण दिएका थिए ।
प्रमुख प्रशासकीय अधिकृत बमले नगरको सरसफाईमा निजी क्षेत्रको प्रभावकारी सहभागिताको आवश्यकता औंल्याउँदै क्रमशः दण्डनीय बनाउँदै जाने चेतावनी पनि दिए ।
