नेपालगन्ज उपमहानगरपालिका समितिको नेतृत्वमा कविराम जैसी, सर्वसम्मत बन्यो ११ सदस्यीय कार्यसमिति
नेपाल उद्योग व्यापार महासंघअन्तर्गत उद्योगी व्यवसायी संघ, बाँकेको नेपालगन्ज उपमहानगरपालिका समितिको नयाँ नेतृत्वमा कविराम जैसी चयन भएका छन् । समितिको चौथो साधारण सभा तथा दोस्रो अधिवेशनले आगामी कार्यकालका लागि जैसीको अध्यक्षतामा ११ सदस्यीय कार्यसमिति सर्वसम्मत रूपमा निर्वाचित गरेको हो ।
नेकपा सम्बद्ध व्यापारीहरुको उक्त संगठनको अधिवेशनबाट उपाध्यक्षमा जामिया खातुन, महासचिवमा चक्र ब. मल्ल, सचिवमा रन्जु श्रेष्ठ तथा कोषाध्यक्षमा लालसिंह भण्डारी निर्वाचित भएका छन् । त्यसैगरी सदस्यहरूमा बसन्ती तिवारी, कोपिला पौडेल, सुशिला ढकाल, पदम व बिक, सावित्री थापा र चन्द्र प्रसाद संज्याल चयन भएका छन् ।
पश्चिम नेपालकै प्रमुख आर्थिक केन्द्रका रूपमा परिचित नेपालगन्जमा उद्योगी तथा व्यवसायीहरूको हक, हित र अधिकारको संरक्षण गर्दै स्थानीय अर्थतन्त्रलाई थप गतिशील बनाउने अपेक्षासहित नयाँ नेतृत्व चयन गरिएको जनाइएको छ । अधिवेशनमा सहभागी उद्योगी तथा व्यवसायीहरूले विद्यमान आर्थिक चुनौतीका बीच निजी क्षेत्रका समस्या र सरोकारलाई सरकार तथा सम्बन्धित निकायसम्म प्रभावकारी रूपमा पु¥याउन नयाँ कार्यसमितिले सक्रिय भूमिका निर्वाह गर्ने विश्वास व्यक्त गरेका छन् ।
नवनिर्वाचित टोलीप्रति शुभकामना व्यक्त गर्दै सहभागीहरूले व्यवसायी समुदायका साझा मुद्दालाई एकीकृत रूपमा उठाउने दायित्व अब नयाँ नेतृत्वको काँधमा आएको बताएका छन् । उनीहरूले निजी क्षेत्रको एकतालाई अझ सुदृढ बनाउँदै व्यावसायिक वातावरण सुधारका लागि नेतृत्वदायी भूमिका खेल्नुपर्नेमा जोड दिएका थिए ।
अधिवेशनका क्रममा व्यवसायीहरूको संगठित सहभागिता, संस्थागत सुदृढीकरण र निजी क्षेत्रका अधिकार संरक्षणलाई प्राथमिकतामा राख्दै आगामी दिनमा समितिले थप प्रभावकारी रूपमा काम गर्ने अपेक्षा पनि व्यक्त गरिएको थियो । सहभागीहरूले ‘उद्योगी र व्यवसायीका आवाजलाई सम्बन्धित निकायसम्म पु¥याउने, व्यावसायिक वातावरण सुधारका लागि पहल गर्ने तथा स्थानीय अर्थतन्त्रलाई चलायमान बनाउने दिशामा नयाँ कार्यसमितिले परिणाममुखी काम गर्ने विश्वास लिएका छौं’ भन्ने धारणा राखेका थिए ।
